بۇۇ ترامپ-كيم كەلىسسوزىندە ادام قۇقىعى ماسەلەسى ايتىلماعانىنان الاڭدايدى

بۇۇ تارابى ترامپ پەن كيم جوڭ ۋننىڭ تاريحي كەزدەسۋى كەزىندە، سولتۇستىك كورەياداعى ادام قۇقىعى ماسەلەسىنىڭ ايتىلماعانىنان الاڭداۋشىلىق بىلدىرۋدە. بۇنداي مالىمدەمەنى بۇۇ-نىڭ سولتۇستىك كورەيا ماسەلەسى بويىنشا ارنايى مالىمدەمەشىسى كينتانا جاسادى. ول سوزىندە: «ءدال قازىر سولتۇستىك كورەياداعى ادام قۇقىعى ماسەلەسىن جاقسارتۋ، وسى ماسەلە بويىنشا حالىقارالىق قاۋىمداستىقپەن ديالوگقا كەلتىرۋ ءۇشىن، اقش-تىڭ كيم رەجيمىنە قىسىم تۇسىرەتىن ۋاقىتى»، – دەدى. بۇل تۋرالى VOA اقپاراتتىق اگەنتتىگى حابارلادى.

بۇۇ تارابى اقش پەن سولتۇستىك كورەيا اراسىنداعى ديپلوماتيانىڭ دامۋى قارساڭىندا، ادام قۇقىقتارىن جاقسارتۋ ىستەرىن كۇن تارتىپكە قويۋ كەرەكتىگىن ايتادى. بۇۇ لاۋازىمدىسىنىڭ سوزىنشە: «قازىر سولتۇستىك كورەيا ۇكىمەتى ءوز ەلىن قالىپقا كەلتىرۋگە تىرىسۋدا. سولتۇستىك كورەيانى بۇۇ-نىڭ بەدەلدى مۇشەسىنىڭ ءبىرى ەتكىسى كەلەدى. بۇل ءۇشىن ولار ادام قۇقىعى ماسەلەسى بويىنشا ءوز پوزيتسيالارىن وزگەرتىپ، حالىقارالىق قاۋىمداستىقپەن كەلىسسوزگە كەلۋى كەرەك»، – دەيدى.

كينتانا پرەزيدەنت ترامپتىڭ سولتۇستىك كورەيامەن كەلىسسوزدە يادرولىق قارۋدان باس تارتۋ ماسەلەسىن باستى ورىنعا قويعانىنا تۇسىنىستىكپەن قارايتىنىن، الايدا،  سولتۇستىك كورەيادا ادام قۇقىقتارى ماسەلەسى جاقسارماسا، بۇل كەز-كەلگەن كەلىسىمنىڭ جۇزەگە اسۋىنا توسقاۋىل بولاتىنىن ايتادى.

دەگەنمەن، ترامپ-كيم سامميتىنەن كەيىن وتكەن ءباسپاسوز جيىنىندا اقش پرەزيدەنتى اتالعان ماسەلەنى كيم جوڭ ۋنعا ايتقانىن مالىمدەگەن.

“The Qazaq Times”