اقش ۆيتسە-پرەزيدەنتى مايك پەنس دونالد ترامپتى بيلىكتەن كەتىرۋدەن باس تارتتى. ءتيىستى مالىمدەمە اق ءۇيدىڭ اقش كونگرەسىنىڭ وكىلدەر پالاتاسىنىڭ سپيكەرى نەنسي پەلوسيگە جولدنعان حاتتا جازىلعان.

كونستيتۋتسياداعى 25-تۇزەتۋ بويىنشا پەنس ترامپتى ىعىستىرىپ، مەملەكەت باسشىسى مىندەتىن ۋاقىتشا اتقارۋعا قۇقىعى بار. بىراق پەنس ءوز مالىمدەمەسىندە: «مۇنداي شەشىم ءبىزدىڭ ەلىمىزدىڭ مۇددەسىنە ساي ەمەس. وتكەن اپتادا مەن سايلاۋ ناتيجەلەرىن انىقتاۋ ءۇشىن كونستيتۋتسيالىق وكىلەتتىكتەرىمنىڭ شەڭبەرىنەن شىققان جوقپىن. ەندى مەن وكىلدەر پالاتاسىنىڭ ەلىمىزدىڭ ومىرىندەگى وسىنداي ماڭىزدى ۋاقىتتا ساياسي ويىن باستاۋىنا جول بەرمەيمىن»، – دەدى.

اقش كونستيتۋتسياسىنداعى 25-ءشى تۇزەتۋگە سايكەس، ۆيتسە-پرەزيدەنت پرەزيدەنتتىڭ وكىلەتتىگى مەرزىمىنەن بۇرىن توقتاتىلعان جاعدايدا مەملەكەت باسشىسى قىزمەتىن اتقارا الادى.

6 قاڭتاردا ترامپتىڭ جاقتاستارى كونگرەسكە باسىپ كىرگەن كەزدە مايك پەنس قاراشاداعى پرەزيدەنتتىك سايلاۋدىڭ ناتيجەلەرىن بەكىتۋ جونىندەگى بىرلەسكەن وتىرىسقا توراعالىق ەتكەن. 7 قاڭتار اقش كونگرەسى سايلاۋشىلاردىڭ داۋىسىن ەسەپتەپ، 2020 جىلعى پرەزيدەنت سايلاۋىنىڭ قورىتىندىسىن شىعارۋ ءۇشىن جينالعان بولاتىن. سايلاۋدا دەموكراتتار پارتياسىنىڭ وكىلى دجو بايدەن جەڭىسكە جەتكەن ەدى. الايدا بۇعان دەيىنگى پرەزيدەنت دونالد ترامپتىڭ جاقتاستارى جاپپاي نارازىلىق اكتسياسىن باستاپ، ولاردىڭ ءبىر توبى كونگرەسس عيماراتىنا باسىپ كىردى. شەرۋگە شىققاندار پوليتسيامەن قاقتىعىسىپ، 4 ادام قازا تاپتى.

12 قاڭتاردا دونالد ترامپ دجوزەف بايدەننىڭ يناۋگۋراتسياسى قارساڭىنداعى قاۋىپسىزدىك شارالارىنا بايلانىستى توتەنشە جاعداي جاريالاپ، ۆاشينگتونعا فەدەرالدى كومەك جىبەردى. بۇل شەشىم فەدەرالدى بيلىككە جەدەلدەتىلگەن تۇردە قالاعا كومەك رەتىندە قاراجات بولۋگە مۇمكىندىك بەرەدى. ادەتتە، مەملەكەت باسشىلارى تابيعي اپاتتاردىڭ سالدارىن جويۋعا كومەكتەسۋ ءۇشىن وسىنداي توتەنشە جاعداي ەنگىزەدى.

كاپيتولي شابۋىلىنان كەيىن دەموكراتتار ترامپقا يمپيچمەنت جاريالاۋعا دايىندىق باستادى. ولار ۋاشينگتوندا دەمونسترانتتاردىڭ ميتينگىن ترامپ ۇيىمداستىردى دەپ ايىپتاپ وتىر. 2019 جىلى «وكىلەتتىگىن اسىرا پايدالانعانى ءۇشىن» ترامپقا العاش رەت يمپيچمەنت جاريالانعان بولاتىن. دەموكراتتار جاريالاعان يمپيچمەنتتەن كەيىن رەسپۋبليكاشىلدار اق ءۇي باسشىسىن اقتاپ شىعىپ، ترامپ قىزمەتىن جالعاستىردى.

"The Qazaq Times"