قىتاي ەۋروپا وداعىنا سەنىمسىز بولا ءتۇستى. فوتو: CEIAS

رەسەي-ۋكراينا سوعىسىنىڭ باستالعانىنا ەكى ايدان اسسا دا قىتاي ءوزىنىڭ ۇستانىمىن ءالى دە تۇسىنىكسىز كۇيدە ۇستاپ كەلەدى. بۋچا قالاسىنداعى جاعدايعا بايلانىستى حالىقارالىق قاۋىمداستىق رەسەيدى اسكەري قىلمىسپەن ايىپتاپ جاتقان تۇستا، رەسمي بەيجىڭ بۇنى «بۋچا وقيعاسىنىڭ دۇربەلەڭى» دەپ قانا اتادى.

قىتايلىق رەسميلەر مەن اقپارات قۇرالدارى بۋچا وقيعاسى بويىنشا ءبىر عانا رەسەيدى كىنالاۋعا بولمايدى دەگەن ۇستانىمدارىن اشىق جازىپ جاتىر. 4 ساۋىردە ەۋروپالىق سىرتقى ارەكەتتەر قىزمەتى ءوزىنىڭ رەسمي سايتىندا جاريالاعان ماقالاسىندا قىتايلىق شەنەۋنىكتەر مەن باق-ىنىڭ بۇل ۇستانىمدارىنا باسا نازار اۋداردى. بەيجىڭ ءوزىن مەملەكەتتەردىڭ تۇتاستىعىن ساقتاۋ جونىندەگى حالىقارالىق قاۋىمداستىقتىڭ نەگىزگى قاعيداتتارىن قورعايتىندارىن ايتا وتىرىپ، رەسەيدىڭ ۋكرايناعا باسىپ كىرۋىنە قاتىستى ناتو-نىڭ شىعىسقا كەڭەيۋىن جانە رەسەيدىڭ زاڭدى ۇلتتىق قاۋىپسىزدىك مۇددەلەرىن ەلەمەگەن باتىستى ايىپتايدى. اتالعان ماقالادا قىتايدىڭ وسى ءبىر ۇستانىمىن ءوز-وزىنە قايشىلىق دەپ باعالاي كەلە، ۋكراينا جاعدايىندا قىتاي ىشكى جانە سىرتقى اۋديتورياعا اقش پەن باتىس الەمىن ايىپتاۋعا نەگىزدەلگەن ەسكى مەتوتىن جالعاستىرىپ جاتىر دەپ سانايدى.

قىتاي تارابى ەۋروپالىق سىرتقى ارەكەتتەر قىزمەتىنىڭ اتالعان جازباسىنا سول كۇنى-اق جاۋاپ بەرىپ، قىتايدىڭ رەسمي ۇستانىمىن ماقساتتى تۇردە بۇرمالاپ وتىر دەپ ايىپتادى.

باتىس پەن رەسەي قاتىناسى داعدارىستىڭ تەرەڭ باتپاعىنا باتقان قازىرگى كەزدە، باتىس  پەن قىتاي قاتىناسى دا سول باعىتقا قاراي دامىپ بارا جاتقانىن كورىپ وتىرمىز. قىتاي ۋكراينا جاعدايىندا رەسەي مەن باتىس ەلدەرىنىڭ قايشىلىعىن پايدالانا وتىرىپ، ءوزىنىڭ گەوساياسي مۇددەلەرىنە وڭتايلى پوزيتسيانى بەرىك قارمانۋعا كۇش سالارى انىق. ءتىپتى، «قىرعىي-قاباق سوعىس جىلدارىنداعىداي» رەسەيگە بايلانىستى قىتاي ءوزىنىڭ پوزيتسياسىن گەوساياسي ساۋداعا سالۋى دا مۇمكىن.

ساراپشىلار بەيجىڭنىڭ ۋكراينا ماسەلەسىنە قاتىستى تۇسىنىكسىز، قاراما-قايشىلىققا تولى پوزيتسياسىن جالعاستىرۋ جانە ونى قورعاۋى ەۋروپا وداعى ءۇشىن قىتايدىڭ سەنىمسىزدىگىن ارتتىرىپ كەلەدى. بۇنىڭ سالدارىنان ەۋروپا كەڭىستىگىندە قىتايدىڭ اقش-قا قارسى جۇرگىزگەن باسەكەلەستىك ويىنىندا ساتسىزدىككە ۇشىرادى.

The Qazaq Times