فوتو: aa.com.tr

اقش قىتايدىڭ تاعى بىرنەشە كومپانياسىنا شىڭجاڭداعى مۇسىلمانداردىڭ قۇقىعىن بۇزۋعا قاتىسى بار دەپ سانكتسيا سالاتىنىن مالىمدەدى. بۇل تۋرالى ورتالىق ازيا جاڭالىقتار قىزمەتى جازدى.

اقش-تىڭ ساۋدا مينيسترلىگى قارا تىزىمگە قىتايدىڭ اسكەري-مەديتسينالىق اكادەمياسى مەن ونىڭ 11 زەرتتەۋ ينستيتۋتىن قوستى. بۇل اكادەميا اسكەري ماقساتتاعى بيوتەحنولوگيالاردى جاساۋمەن اينالىسادى.

ۆاشينگتون سانكتسياسىنان كەيىن قىتاي كومپانيالارى اقش-قا ەكسپورت جاساي المايدى.

قىتاي بيلىگى شىڭجاڭدا ۇيعىر، قازاق جانە باسقا دا مۇسىلمانداردى قۋدالاپ، لاگەرگە قاماپ جاتىر دەگەن ايىپپەن حالىقارالىق قاۋىمداستىقتىڭ سىنىنا ۇشىراپ، بۇل ەلگە سانكتسيالار سالىنا باستاعان.

قىتاي شىڭجاڭداعى لاگەرلەردى "كاسىپ ۇيرەنۋ ورتالىعى" دەپ اتاپ، ولكەدەگى ساياساتىن راديكاليزممەن كۇرەس دەيدى.

اقش ۇكىمەتىندە جۇمىس ىستەيتىن شەنەۋنىكتەردىڭ ءبىرى ۆاشينگتون قىتايدىڭ بىرنەشە ۇيىمىنا قارجى سانكتسياسىن دا سالاتىنىن ايتتى. دەرەككوزدىڭ سوزىنشە، اقش بارلاۋشىلارى قىتايدىڭ شىڭجاڭدا ادامنىڭ بەت-ءجۇزىن تانيتىن جانە دنق ۇلگىلەرىن جينايتىن تەحنولوگيالىق جۇيە قولداناتىنىن انىقتاعان. اقش پەكين بۇل تەحنولوگيالارىن ولكەدەگى 12-65 جاستاعى ادامدارعا پايدالانعان دەپ سانايدى.

16 جەلتوقساندا اقش سەناتى شىڭجاڭدا وندىرىلگەن تاۋارلاردىڭ يمپورتىنا تىيىم سالاتىن زاڭ جوباسىن دا ماقۇلدادى. ەگەر كاسىپورىن ونىمدەرىن وندىرگەندە شىڭجاڭدىقتاردى كۇشتەپ جۇمىسقا تارتپاعانىن دالەلدەسە عانا يمپورتقا مۇمكىندىك الادى.

ەكى كۇن بۇرىن بۇل زاڭدى وكىلدەر پالاتاسى ماقۇلداعان ەدى. ەندى زاڭ ەل پرەزيدەنتى دجو بايدەنگە جىبەرىلەدى.

وتكەن اپتادا اق ءۇي جانە باتىستىڭ بىرنەشە ەلى شىڭجاڭداعى جاعدايعا بايلانىستى پەكيندە وتەتىن قىسقى وليمپياداعا ديپلوماتيالىق بويكوت جاريالاعان.