الەۋمەتتىك جەلىلەردە ءماجىلىس دەپۋتاتى بەكبولات تىلەۋحاننىڭ ديسسيدەنت ارون اتابەك پەن شاڭىراق وقيعاسى تۋرالى جانە "ازاتتىق راديوسى" جايىندا ايتقان پىكىرلەرى قىزۋ تالقىعا تاقىرىپ بولدى. دەپۋتات بەكبولات تىلەۋحان 8 جەلتوقساندا "ازاتتىق"تىلشىسىنە بەرگەن پىكىرىندە شاڭىراق وقيعاسى ءىس بويىنشا سوتتالعان ديسسيدەنت، اقىن ارون اتابەك مارقۇمدى  «ەلبۇزار» دەپ ايىپتاعان. دەپۋتاتتىڭ سوزىنشە ارون اتابەك تە، "ازاتتىق راديوسى" دا "ارتىندا باسقا كۇشتەر تۇرعان" "ەلبۇزارلار" بولىپ شىقتى. 

بەكبولات تىلەۋحانوۆتىڭ ايتىسىنشا، «شاڭىراق وقيعاسى» كەزىندە ارون اتابەك ونىڭ كومەكشىسى بولعاندىقتان، ونىڭ مۇددەسىن قورعاعان. سول ءۇشىن ىشكى ىستەر ءمينيسترى مەن الماتىنىڭ سول كەزدەگى اكىمى يمانعالي تاسماعامبەتوۆپەن كەزدەسكەنىن ايتادى. الايدا، بەكبولات قانايۇلى ءىستىڭ ءمان-جايىن بىلگەندە بارىپ ءوزىنىڭ ەموتسياعا بەرىلىپ، ىستەگەن ءىسى ءۇشىن قاتتى وكىنگەن ەكەن.

«ءبارى زاڭ بويىنشا بولدى. مەن قاسىندا بولعان جوقپىن. ماعان دالەل كەلتىردى. قوعامدىق كومەكشىمدى قورعادىم، بىراق ونىڭ ءىسى قاتە بولدى. سوت دۇرىس جاسادى. ادۆوكاتتاردىڭ، تەكسەرۋشىلەردىڭ سوزىنە قاراساق، ءبارى زاڭدى»، – دەگەن دەپۋتات مىرزا ارون اتابەككە بەرىلگەن جازانى ءادىل دەپ سانايتىنىن جەتكىزدى.

سونداي-اق:  «... ەلگىلى ءبىر ساياسي كۇشتەردىڭ مۇددەسىن قورعاعانىن بىلگەم جوقپىن. بۇكىل كۇشىممەن سالىنىپ كىرىسىپ كەلدىم دە ەڭ سوڭىندا وپىق جەدىم. سول كەزدە شىن جۇرەگىممەن حالىققا جانى اشيدى دەپ قورعادىم. كەيىن ساياسي قۇرال، ديسسيدەنت ەكەنىنە كوزىم جەتتى»، – دەگەن تىلەۋحان مارقۇم اتابەكتى «ەلبۇزار» دەپ ايىپتايدى.

بۇدان كەيىن دەپۋتات ارون اتابەكتى «قازاقتىڭ اقىنى» دەپ اتاعان جۋرناليستكە اشۋلانىپ: «ول – ورىستىڭ اقىنى، ورىس مادەنيەتىنىڭ وكىلى. ادام قاي تىلدە سويلەسە، سول ەلگە قىزمەت ەتەدى. ول كىسى قالماقتىڭ دىنىندەگى پۇتقا تابىنۋشى بولعان. جۇرەگى دە، ءتىلى دە، ءدىنى دە قازاقشا ەمەس»، – دەپ سالدى.

وكىنىشىنە وپىنعان دەپۋتات سوڭىندا ەلدىگى ەڭ باستى تاۋەلسىز باسىلىم ازاتتىق راديسىنىڭ تىلشىسىنە «امەريكانىڭ اقشاسىنا ۇلتتى ساتىپ، قازاقتى قان-قاقساتىپ جاتقان ادامسىڭدار... مەن فاكتىنى ايتىپ وتىرمىن، مىقتى بولساڭىز وسىنى [ەفيردەن] جىبەرىڭ»، – دەگەن.

بىلدەي ءبىر بيلىك پارتياسىنان ماجىلىستە دەپۋتات بولىپ وتىرعان بەكبولات تىلەۋحاننىڭ جاقىندا عانا كوز جۇمعان ارون اتابەك پەن ازاتتىق تىلشىسىنە قاتىستى مۇنداي الابوتەن پىكىرى جۇرتشىلىقتىڭ نارازىلىعىن قوزعادى.

The Qazaq Times