بۇگىن الماتى اكىمى باقىتجان ساعىنتاەۆتىڭ قالا تۇرعىندارىمەن ەسەپتىك كەزدەسۋى ءوتتى.

ساعىنتاەۆ سوزىندە: «ءبىز «الماتى جاستارى 3.0» جاڭا باعدارلاماسىن ازىرلەدىك. جاڭا تۇرعىن ءۇي باعدارلاماسىنىڭ ارتىقشىلىعى - ونىڭ كومەگىمەن جاستار 3 جىلدان 25 جىلعا دەيىنگى مەرزىمگە تومەن پايىزدىق مولشەرلەمەمەن قارىز الا الادى. جىلدىق 5 پايىزدىق جەڭىلدىكپەن. العاشقى جارنا 10%. بۇل باعدارلاماعا 10 ملرد تەڭگە ءبولىندى. تۇرعىن ءۇي قۇرىلىس جيناق بانكى 3 ملرد تەڭگە ءبولدى»، – دەدى.

قالا اكىمىنىڭ ايتۋىنشا، قوعامدىق كولىكتەر ماسەلەسى وڭتايلى شەشىم تاپقان. ماسەلەن، 2019 جىلى سۋبسيديا 23,1 ملرد تەڭگەگە جەتسە، ونىڭ 24,2 ملرد-ى 2020-شى جىلعا بولىنگەن. وسى ارقىلى جولاقى تاريفىنىڭ وسپەۋىن قامتاماسىز ەتۋ كوزدەلمەك.

جيىندا اۋەجاي ماڭىنداعى جەرلەردى قالا مەنشىگىنە قايتارۋ ماسەلەسى ءسوز بولدى. مەگاپوليس اكىمى: «بۇعان دەيىن «كازكوممەرتسبانك» كەپىلگە بەرگەن 383 گەكتار جەر كۇردەلى نەسيەلەر قورىنا بەرىلگەن ەدى. ەندى بۇل جەر قالا اكىمدىگىنە قايتارىلادى. ءبىز بۇل تۋرالى ەلباسىنا ءوتىنىش جازعان بولاتىنبىز. ۇكىمەت ءبىزدى قولدادى. ال جاڭا جىلعا دەيىن 383 گەكتار جەر قايتارىلدى. ەندىگى 185 گەكتار جەر قالدى. بۇل اۋەجاي اۋماعىنا تيەسىلى. وسى ماسەلە بويىنشا قازىر ۇكىمەتپەن كەلىسسوز جۇرگىزىپ جاتىرمىز. تالعار اۋداندىق اكىمدىگىنىڭ لاۋازىمدى تۇلعالارى 2015-2019 جىلى قىزمەتتىك وكىلەتتىلىگىن اسىرا پايدالانىپ، اۋەجايدىڭ سانيتارلىق قورعاۋ ايماعىنداعى جەكە قوسالقى ۋچاسكەلەرى، سونىڭ ىشىندە تۇرعىن-ءۇي سالۋعا جەر بەرگەنى ءۇشىن زاڭسىز شەشىمدەر قابىلداعانى انىقتالدى»، – دەدى. سونىمەن قاتار قالا اكىمى الماتى اۋەجايى ماڭىنداعى جەر ۋچاسكەلەرىن زاڭسىز بەرۋ بويىنشا سىبايلاس جەمقورلىققا قارسى قىزمەتتىڭ سوتقا دەيىنگى تەرگەۋ جۇمىستارىن جۇرگىزىپ جاتقانىن ايتتى.

ايتا كەتەيىك، باقىتجان ساعىنتاەۆ 2016 جىلى قىركۇيەكتەن 2019 جىلدىڭ اقپانىنا دەيىن قازاقستان ۇكىمەتىن باسقارعان. 20 اقپاندا بۇرىنعى پرەزيدەنت نازارباەۆ ساعىنتاەۆ باسقارعان ۇكىمەتتى «ەكونوميكانى دامىتا المادى» دەپ سىنعا الىپ، وتستاۆكاعا جىبەرگەن بولاتىن. بىلتىر ماۋسىمدا ول الماتى قالاسىنىڭ اكىمى بولىپ تاعايىندالدى.

"The Qazaq Times"