شىنجاڭ. فوتو: RFA.Org

ازات ازيا راديوسى (RFA) سايتىنىڭ حابارىنا قاراعاندا، وتكەن اپتادا قىتايعا قاراستى التاي ايماعىنداعى قوعام اماندىعىن باسقارۋ جانە التاي ايماقتىق لاڭكەستىككە قارسى تۇرۋ قىزمەت گرۋپپاسى بىرلىكتە «جالپىعا بىردەي لاڭكەستىك ارەكەتتەردى اشكەرەلەگەندەردى ماراپاتتاۋ» حابارلاماسىن تاراتقان. بۇل حابارلاما جەرگىلىكتى باق قۇرالدارى ارقىلى كەڭ كولەمدى ناسيحاتتالعان.

ازات ازيا راديوسىنىڭ حابارىنا سۇيەنسەك، حابارلاما مازمۇنى تومەندەگىدەي: «التاي ايماعىنداعى ۇكىمەت ورگاندارىنا جانە وزگە دە ماڭىزدى نىساندارعا لاڭكەستىك شابۋىل ىستەرىن الدىن الا اشكەرەلەگەندەرگە 5 ملن مەن 3 ملن يۋان (شامامەن 225 – 135 ملن تەڭگە)  كولەمىندە;  قۇرال نەمەسە جارىلعىش زاتتار جاسىرعانداردى مالىمدەگەندەرگە ¥4 ملن.; شەكارادان كىرگەن نەمەسە شىققان تەرروريستەردى انىقتاعاندارعا ¥3 ملن،; شەتەلدىك لاڭكەستەر مەن لاڭكەستىك توپتارعا قارجىلاي كومەك كورسەتكەندەردى مالىمدەگەندەرگە 2 ميلليون يۋان كولەمىندە اقى تولەنەدى»، – دەلىنگەن.

سونىمەن بىرگە، لاڭكەستىك ارەكەتتەردى بەينەلەيتىن فوتو، ۆيدەو جازبالاردى تاراتقاندار، وزگەلەردى لاڭكەستىككە، ۇلتتىق بولشەكتەۋشىلىككە جەلىكتىرگەندەردى جانە زاڭسىز اۆتوكولىكتەردى ساتىپ الۋ، ساتۋ، سۇيىلتىلعان گازدى الىپ ءجۇرۋ، توپتىق سپورتتىق قيمىلدارمەن شۇعىلدانۋ قاتارلى ارەكەتتەردى بىردەن تەررورلىق ارەكەت رەتىندە قارالىپ، قاتاڭ جازالاۋ شاراسى جاريالانعان. مۇنداي ارەكەت پەن جەكە ادامداردى اشكەرەلەگەندەرگە دە مول سىياقى تاعايىنداعان.

اقش كاليفورنيا ۋنيۆەرسيتەتىنىڭ دوكتورى، پروفەسسورى جوۋ گلەندي قىتاي جەرگىلىكتى ۇكىمەتىنىڭ جاساپ جاتقان مۇنداي ارەكەتتەرى شەكتەن شىققاندىق جانە كىسىلىك قۇقىقتى تاپتاعاندىق دەپ سانايتىندىعىن ايتقان. ول: «قىتاي ۇكىمەتى راديكالدى يسلام تەررورلىق ارەكەتتەرى شىنجاڭدا ەتەك الىپ، پاكىستان، اۋعانستانعا اينالىپ كەتپەۋىنە تىرىسىپ باعۋدا. بىراق، مەنىڭ ويىمشا، بۇل جاعدايدى ءتىپتى دە ناشارلاتۋ بولىپ سانالادى. سەبەبى، ۇلتتارعا قانشالىقتى قىسىم تۇسىرسە، نارازىلىق سونشالىقتى كۇشەيەدى. ويلاپ قاراڭىز، قانشالىق قاتاڭ باقىلاۋ بولسا دا، ەگەر ءبىر ادام جانكەشتىلىك جاسايمىن دەسە، قالاي دا ءبىر امالىن تابادى. ەگەر، قىتاي ۇكىمەتى قانداي دا ءبىر تەررورلىق ارەكەتپەن جۇزدەسكىسى كەلمەسە، وندا حالىققا قىسىم جاساۋىن توقتاتۋى كەرەك»،  – دەگەن پىكىرىن بىلدىرگەن.

The Qazaq Times