ترامپ ۇكىمەتى قىتاي بيلىگىنىڭ شىڭجاڭداعى مۇسىلمان ازشىلىققا دەگەن قاتال مامىلەسىن توقتاتۋ ءۇشىن قىسىمدى كۇشەيتۋ ۇستىندە. بۇل رەت اقش شىڭجاڭدا وندىرىلەتىن نەگىزگى تاۋارلاردى يمپورت ەتۋگە شەكتەۋ قويۋ شاراسىن قابىلداعان. بۇعان تاۋارلار جۇمىسشىلاردى ءماجبۇرلى جۇمىس ىستەتۋ ارقىلى وندىرىلەدى دەگەن ايىپتاۋ سەبەپ بولعان.

قۇراما شتاتتار جاساعان بۇل قادام شىڭجاڭنىڭ ازىق-تۇلىك پەن كيىم-كەشەك وندىرىسىنە كەرى اسەرىن تيگىزبەك. قۇراما شتاتتارعا كىرۋگە شەكتەۋ قويىلعان تاۋارلار قاتارىندا ماقتا مەن قىزاناق تا بار. بۇل ەكى تۋار قىتاي ەڭ كوپ ەكسپورت ەتەتىن اۋىل شارۋاشىلىق ءونىمى، ءارى قىتاي بويىنشا وزگە ايماقتارعا سالىستىرعاندا شىڭجاڭدا كوبىرەك وندىرىلەدى. اسىرەسە، قىتاي الەمنىڭ 20 پايىز ماقتاسىن وندىرەدى، ونىڭ باسىم كوبى شىڭجاڭدا وندىرىلەدى. قىتايدىڭ ءوندىرىس ونەركاسىبى ءۇشىن ماڭىزدى بولعان ونىمدەر دە بار.

سوڭعى جىلدارى قىتاي ۇكىمەتى تەرروريزم مەن ءدىني ەكسترەميزمگە قارسى كۇرەس جەلەۋىمەن شىنجاڭداعى تۇركى حالىقتارىنا قاتاڭ ساياسات ۇستانىپ كەلەدى. شىڭجاڭداعى «تاربيە لاگەرلەرىندە» (رەسمي بەيجىڭ «ءبىلىم بەرۋ ورتالىقتارى» دەپ اتايدى) 1 ملن شاماسىندا ۇيعىر، قازاق جانە قىرعىز سەكىلدى ۇلت وكىلدەرى قامالىپ جاتقانىن، ولاردىڭ سوتسىز ەركىندىگىنەن اجىراتىلعانىن بەيجىڭ بيلىگى جوققا شىعارىپ كەلەدى.

بيىل جىل باسىندا اقش پالاتا وكىلدەرى شىڭجاڭدا وندىرىلگەن تاۋارلاردى ءماجبۇرلى ەڭبەك ارقىلى وندىرگەن دەپ تانيتىن زاڭ شىعارۋ تۋرالى ۇسىنىس بىلدىرگەن. ەگەردە جەكە كومپانيالار شىڭجاڭ ونىمدەرىن ەكسپورت ەتەتىن بولسا، ءونىمنىڭ ءماجبۇرلى ەڭبەكپەن وندىرىلمەگەنى تۋرالى دالەلدەۋىنە تۋرا كەلەدى.

“The Qazaq Times”