اقش قىتايدىڭ شىڭجاڭداعى ارەكەتتەرىن گەنوتسيد دەپ تانىدى. مەملەكەتتىك دەپارتامەنتى سەيسەنبى كۇنى تاراتقان مالىمدەمەسىندە، قىتاي ۇكىمەتى شىڭجاڭدا  ۇيعىرلار مەن وزگە دە مۇسىلمان ەتنيكالىق ازشىلىقتارعا قاماۋ لاگەرلەرى مەن ءماجبۇرلى ۇرپاق سۇيدىرمەۋدى قامتىعان  كەڭ اۋقىمدى رەپرەسسيا جۇرگىزىپ، گەنوتسيد مەن ادامزاتقا قارسى قىلمىستار جاسادى دەپ ايىپتاعان. 

بەيجىڭ بيلىگىنىڭ شىڭجاڭداعى ارەكەتتەرىن گەنوتسيد دەپ تانۋ – ترامپ ۇكىمەتىنىڭ بيلىكتەن كەتەر الدىندا قىتايعا قارسى سوڭعى شاراسى. شىڭجاڭداعى از ساندى ۇلتتارعا جاسالعان قىسىمدار مەن بەيجىڭنىڭ ادام قۇقىقتارىن اۋىر دارەجەدە بۇزۋ ارەكەتتەرى كوپتەگەن ەلدەردە تالقىلانىپ كەلدى. الايدا، قىتاي كوممۋنيستىك بيلىگىن قالاي ايىپقا تارتۋ تۋرالى تالاس-تارتىس ۇزاققا سوزىلدى. The New York Times باسىلىمى شىڭجاڭداعى گەنوتسيدتىڭ مويىندالۋى وسى ۇزاق ۋاقىتتىق تالاس-تارتىسپەن، نارازىلىقتاردىڭ ەڭ ۇلكەن ناتيجەسى دەپ باعالادى.

اقش مەملەكەتتىك حاتشىسى مايكل پومپەو اتالعان مالىمدەمەنى جاريالاعان كەزدە: "مەن شىڭجاڭداعى ۇلتتارعا گەنوتسيد ءالى دە جالعاسىپ جاتىر دەپ سانايمىن. ءبىز قكپ-نىڭ ۇيعىرلاردى جويۋعا جۇيەلى ارەكەت ەتىپ وتىرعانىن كۋا بولىپ وتىرمىز", – دەپ قوستادى. سونداي-اق مالىمدەمەدە قكپ مۇشەلەرى ءالسىز ەكتنيكالىق توپتار مەن ءدىني ازشىلىقتى ماجبۇرلەپ اسسيميلياتسيالاۋعا جانە تۇپكىلىكتى جويۋعا قاتىسقانى تۋرالى ايتىلدى.

ساراپشىلاردىڭ بولجاۋىنشا، ترامپ ۇكىمەتىنىڭ بۇل شەشىمى الداعى بايدەن ۇكىمەتىن قىتايعا قارسى سانكتسيا سالۋعا ءماجبۇر ەتەدى. بايدەن دەموكراتيا مەن ادام قۇقىقتارىن قولداۋشى رەتىندە قىتايدىڭ بۇل ارەكەتتەرىن جاۋاپسىز قالدىرماۋ مىندەتىن الادى دەپ بولجايدى. سوعان قوسا، اقش-تىڭ شىڭجاڭداعى گەنوتسيدتى مويىنداۋى ەۋروپا ەلدەرىنە اسەر ەتەتىنىن، الداعى ۋاقىتتا شىڭجاڭداعى از ساندى ۇلتتارعا جاسالعان گەنوتسيدتى تانيتىن ەلدەر قاتارى ءتىپتى دە كوبەيە ءتۇسۋى مۇمكىن.

“The Qazaq Times”