تۇركىمەنستان پرەزيدەنتى گۋربانگۋلى بەردىمۇحامەدوۆ ءوزىنىڭ 39 جاستاعى ۇلى سەرداردى ەكونوميكا جانە بانك سالاسى، حالىقارالىق قارجى ۇيىمدارىمەن جۇمىس بويىنشا ۆيتسە-پرەمەر ەتىپ تاعايىندادى.

ۇلىن پرەزيدەنتتىككە الدىن الا دايىنداپ جاتقان بەردىمۇحامەدوۆ ۇكىمەت وتىرىسىندا مەملەكەتتىك اپپاراتتا بىرنەشە وزگەرىستەر ەنگىزدى. سەرداردى ۆيتسە-پرەمەر رەتىندە تاعايىنداماس بۇرىن ول ۇلىن جوعارعى باقىلاۋ پالاتاسى توراعاسى جانە مەملەكەتتىك قاۋىپسىزدىك كەڭەسىنىڭ مۇشەسى قىزمەتىنەن بوساتتى. تۇركىمەنستاننىڭ رەسمي باسىلىمدارى سەرداردى «حالىقتىڭ ۇلى» رەتىندە ماداقتايدى.

پرەزيدەنت جاڭا ۆيتسە-پرەمەردىڭ مىندەتتەرىنە مەملەكەتتىك جانە قوعامدىق – دەنساۋلىق ساقتاۋ، ءبىلىم بەرۋ، قارجى جانە ەكونوميكا سالالارىن تسيفرلاندىرۋ جانە يننوۆاتسيالىق تەحنولوگيالار ەندىرۋ كىرەتىنىن ايتتى.

61 جاستاعى گۋربانگۋلى بەردىمۇحامەدوۆ ورتالىق ازياداعى تابيعي گازعا باي تۇركىمەنستاندى وزىنە دەيىنگى پرەزيدەنت ساپارمۇرات نيازوۆ قايتىس بولعان 2006 جىلدىڭ جەلتوقسانىنان بەرى باسقارىپ كەلەدى. تۇركىمەنستان بيلىگىن سىنايتىندار مەن قۇقىق قورعاۋشىلار بەردىمۇحامەدوۆتىڭ بيلىككە كەلگەلى وزگەشە ويلايتىنداردى قۋدالاعانىن جانە ايتارلىقتاي وزگەرىس جاساماعانىن ايتادى. پرەزيدەنت بەردىمۇحامەدوۆتىڭ جالعىز ۇلىنان باسقا ءۇش قىزى بار.

ال سەرداردىڭ ساياساتتاعى مانسابى 2016 جىلدىڭ سوڭىندا باستادى. سول كەزدە ول تۇركىمەنستان پارلامەنتىنىڭ مۇشەسى بولىپ سايلاندى. سونىمەن قاتار ەلدىڭ ءوندىرىس جانە قۇرىلىس ءمينيسترى قىزمەتىن اتقارعان.

"The Qazaq Times"