فوتو: fergana.agencۋ

تۇرىكمەنستان ەكى پالاتالى پارلامەنتتىك جۇيەگە كوشۋدى باستادى: تاريحتا العاش رەت پارلامەنتتىڭ جوعارعى پالاتاسىنا سايلاۋ ءوتتى. ناتيجەسىندە، 100% داۋىسپەن ەل باسشىسى گۋربانگۋلى بەردىمۇحامەدوۆ جاڭادان جاساقتالعان سەناتتىڭ (حالىق ءماسليحاتى) قۇرامىنا ەندى. بۇل تۋرالى تۇرىكمەنستاننىڭ مەملەكەتتىك اقپاراتتىق اگەنتتىگى حابارلادى.

قازىر 63 جاستاعى بەردىمۇحامەدوۆ مەملەكەت باسشىسى جانە پرەمەر-ءمينيسترى قىزمەتىن قاتار اتقارادى. رەسمي باسىلىمدار سايلاۋدىڭ ءادىل وتكەنىن جازدى. بىراق شەتەل باقىلاۋشىلارىنا سايلاۋدى باقىلاۋعا رۇقسات ەتىلمەدى جانە وپپوزيتسيا كانديداتتارىنا دا جول بەرىلمەدى.

بۇعان دەيىن پارلامەنت ءبىر پالاتادان – مەدجليستەن عانا تۇرعان. 48 ماندات ءۇشىن 112 كانديدات كۇرەستى. «تdh» مالىمەتتەرى بويىنشا مونيتورينگتى پارتيالاردان، قوعامدىق ۇيىمداردان جانە ازاماتتاردىڭ جەكەلەگەن توپتارىنان 440 ۇلتتىق باقىلاۋشى جۇزەگە اسىردى. ماندات ءۇشىن «باق سىناعاندار» بەس وبلىستان جانە اشحابادتان جەرگىلىكتى حالىق كەڭەستەرىنىڭ وتىرىستارىندا جاسىرىن داۋىس بەرۋ ارقىلى سايلاندى. تاعى سەگىز مۇشەنى پرەزيدەنت تاعايىندايدى.

اقپاننىڭ ورتاسىندا تۇرىكمەنستان پرەزيدەنتى گۋربانگۋلى بەردىمۇحامەدوۆ ءوزىنىڭ ۇلى سەرداردى ۇكىمەتتىڭ ۆيتسە-توراعاسى ەتىپ تاعايىندادى. ۆيتسە-پرەمەردىڭ مىندەتىنە ءوندىرىستىڭ بارلىق سالالارىنا تسيفرلىق جۇيە مەن يننوۆاتسيالىق تەحنولوگيالاردى ەنگىزۋ، سونداي-اق وسى قىزمەتتى باقىلاۋ كىرەدى.

24 اقپاندا وتكەن پارلامەنت قۇرىلىمىنداعى وزگەرىستەر تۋرالى كونستيتۋتسيالىق تۇزەتۋلەر جاريالانعاننان كەيىن، قازىرگى پرەزيدەنت ءوز مۇراگەرىن بيلىككە دايىنداپ جاتىر دەگەن بولجامدار ايتىلدى. ساراپشىلار 39 جاستاعى سەرداردى مۇراگەر دەپ سانايدى. ول قازىردىڭ وزىندە مەدجليس زاڭ كوميتەتىنىڭ باسشىسى، سىرتقى ىستەر ءمينيسترىنىڭ ورىنباسارى، ايماقتىڭ باسشىسى بولدى (احال ءۋالاياتى). 2020 جىلى اقپاندا اكەسى ونى جاڭا ونەركاسىپ جانە قۇرىلىس ءوندىرىسى مينيسترلىگىنىڭ باسشىسى ەتىپ تاعايىندادى. ول سوڭعى لاۋازىمىن شامامەن ءبىر جىل اتقارعان.

"The Qazaq Times"