جاپونيا ۇكىمەتى كۋريل ارالدارىندا اسكەري جاتتىعۋ باستاعان رەسەي ۇكىمەتىنە نارازىلىق نوتاسىن جولدادى. 

مينيسترلەر كابينەتىنىڭ باس حاتشىسى كاتسۋنوبۋ كاتو: «ءبىز رەسەي اسكەري كۇشتەرىنىڭ سولتۇستىك ايماقتارداعى اسكەري ارەكەتىن باقىلاپ وتىرمىز. رەسەيدىڭ بۇل قادامى جاپونيانىڭ ساياسي ۇستانىمىنا قايشى كەلەدى»، – دەدى.

سارسەنبىدە رەسەي تاراپى ساحالين، يتۋرۋپ جانە كۋناشير ارالدارىندا، سونداي-اق جاپون تەڭىزىندە 10 مىڭنان استام اسكەردىڭ قاتىسۋىمەن ارنايى اسكەري جاتتىعۋ باستاعان. قازىر ايماقتا 500 تەحنيكا، 12 كەمە بار. قورعانىس كۇشتەرىنىڭ بۇل جاتتىعۋى بەس كۇنگە جالعاسىپ، ەكى كەزەڭمەن وتەدى.

جاپونيا جانە رەسەي 1855 جىلدىڭ 7 اقپانىندا يتۋرۋپ جانە ۋرۋپ ارالدارىنىڭ اراسىنداعى شەكارانى انىقتايتىن ءبىرىنشى ورىس-جاپون كەلىسىمشارتىنا (سيمود تراكتاتى) قول قويعان. سول ۋاقىتتان باستاپ يتۋرۋپ، كۋناشير، شيكوتان جانە حابوماي اتالعان شارتقا سايكەس جاپونياعا تيەسىلى. بۇل كۇن جاپونيادا «سولتۇستىك اۋماقتار كۇنى» رەتىندە اتاپ وتىلەدى. رەسەي 1875 جىلى بارلىق كۋريل ارالدارىن ساحالين ارالىنىڭ جاپون بولىگىمەن ايىرباستاۋ ءۇشىن جاپونياعا بەرگەن. بىراق، 1905 جىلى ورىن العان ورىس-جاپون سوعىسىنان كەيىن رەسەي جەڭىلىس تاۋىپ، وڭتۇستىك ءساحاليندى جاپونياعا تيەسىلى دەپ سانايتىن «پورتسمۋت» بەيبىت كەلىسىمشارتى جاسالدى.

بىلتىر قىركۇيەكتە جاپونيا پرەمەر-ءمينيسترى ەسيحيدە سۋگا مەن رەسەي پرەزيدەنتى 1956 جىلعى كەڭەستىك-جاپوندىق بىرلەسكەن دەكلاراتسيا نەگىزىندە بەيبىت شارت جاساسۋ جونىندەگى كەلىسسوزدەر پروتسەسىن جالعاستىرۋعا كەلىسكەن. الايدا، ەكى ەل اراسىنداعى «ارال داۋى» ءالى دە شەشىمىن تاپقان جوق.

"The Qazaq Times"