قازاقستاندا «ۇندىستاندىق شتامعا» ۇقسايتىن ۆيرۋس مۋتاتسياسىنىڭ انىقتالۋىنا بايلانىستى شەكتەۋ شارالارى كۇشەيتىلۋى مۇمكىن.

كەشە دەنساۋلىق ساقتاۋ مينيسترلىگى ۇندىستاندىق شتامعا ۇقسايتىن كوروناۆيرۋستىڭ مۋتاتسياسى انىقتالدى دەپ مالىمدەدى. الايدا تۇپكىلىكتى قورىتىندىسى سىناق اياقتالعاننان كەيىن بەلگىلى بولادى.

وسىعان بايلانىستى پرەمەر-مينيستر اسقار مامين استانادا سانيتارلىق-ەپيدەميولوگيالىق احۋالدى كۇشەيتۋدى تاپسىردى. سونىمەن قاتار مەملەكەتتىك شەكارادا باقىلاۋدى كۇشەيتۋ قاجەتتىگىن دە ايتتى.

ال دەنمين الەكسەي تسوي: «رەسپۋبليكا اۋماعىندا ۇندىستاندىق شتامنىڭ اينالىمى بارىن ەسكەرسەك، ەپيدەميولوگيالىق احۋالدى تۇراقتى ۇستاپ تۇرۋ ءۇشىن جەرگىلىكتى اتقارۋ ورگاندارى ۆاكتسينالاۋ ناۋقانىن كۇشەيتىپ، حالىق اراسىندا ۆاكتسينا مەن پروفيلاكتيكانىڭ ماڭىزى جونىندە اقپاراتتىق-ءتۇسىندىرۋ جۇمىستارىن كۇشەيتۋى ءتيىس»، – دەيدى.

دۇنيەجۇزىلىك دەنساۋلىق ساقتاۋ ۇيىمىنىڭ 20 ماۋسىمداعى دەرەكتەرى بويىنشا SARS-CoV-2 دەلتا شتامى الەمنىڭ 74 ەلىندە انىقتالعان. كوروناۆيرۋستىڭ ءۇندى شتامى باسقا تۇرلەرىنە قاراعاندا 60%-عا جۇقپالى. ورتاشا العاندا، ءبىر ادامنان 5-6 ادامعا جۇعۋى مۇمكىن.

ءۇندىستاننىڭ باس ۆيرۋسولوگى شاحيد دجاميل: «B.1.617 شتامى ەكى مۋتاتسياعا ۇشىراعان. ياعني ادامنىڭ جاسۋشاسىنا جابىساتىن ۆيرۋستىڭ تىكەن ءپىشىندى اقۋىزى وزگەرگەن» دەيدى. ال دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، B.1.617 شتامى ءۇندىستاندا العاش رەت بىلتىر قازاندا شىققان. ددسۇ ءۇندىستان شتامىن «قىزىق مۋتاتسيا» دەپ سيپاتتاپ، «بۇل شتامم ەكپەنى اينالىپ ءوتۋى دە مۇمكىن»، – دەيدى.

"The Qazaq Times"