كوروناۆيرۋستىڭ «دەلتا» دەپ اتالاتىن ءۇندى شتامى الەمنىڭ 90 ەلىندە تىركەلدى. مالىمەتتەر بويىنشا، ىندەتتىڭ بۇل ءتۇرى ادامعا وتە تەز جۇعادى، ءارى تەز تارايدى.

قازىر ۆيرۋستىڭ بۇل شتامى اقش، ۇلىبريتانيا، پورتۋگاليا، شۆەيتساريا، جاپونيا، پولشا، نەپال، رەسەي، قىتايدا جانە قازاقستاندا دا انىقتالعان. ۇلىبريتانيادا ۆيرۋس جۇقتىرۋ دەرەكتەرىنىڭ 98%-ى ءدال وسى دەرتپەن بايلانىستى. ون شاقتى كۇن بۇرىن عانا بۇل كورسەتكىش 91% شاماسىندا بولعان. فرانتسيا بويىنشا «دەلتا» شتامىن جۇقتىرۋ كورسەتكىشى 10%-عا جەتكەن. سالىستىرمالى تۇردە بۇل اقش پەن گەرمانياداعى جاعدايمەن بىردەي.

جاقىندا عانا كومەندانتتىق ساعاتتى الىپ تاستاعان يتاليادا ءار بەسىنشى ناۋقاس «دەلتا» دەرتىنە شالدىققان. ال ينفەكتسياعا شالدىققان تۇرعىنداردىڭ 60%-ىنەن ءۇندى شتامى تابىلعان پورتۋگاليا پاندەميانىڭ ءتورتىنشى تولقىنىن جانيالاماق.

ەۋروپاداعى سانيتارلىق ۆەدومستۆولار تامىزدىڭ سوڭىنا قاراي ەۋرووداق اۋماعىنداعى ناۋقاستاردىڭ 90%-ىنان «دەلتا» شتامى انىقتالۋى مۇمكىن دەگەن بولجام جاسادى.

كوروناۆيرۋستىڭ ءۇندى شتامى باسقا تۇرلەرىنە قاراعاندا 60%-عا جۇقپالى. ورتاشا العاندا، ءبىر ادامنان 5-6 ادامعا جۇعۋى مۇمكىن. ءۇندىستاننىڭ باس ۆيرۋسولوگى شاحيد دجاميل: «B.1.617 شتامى ەكى مۋتاتسياعا ۇشىراعان. ياعني ادامنىڭ جاسۋشاسىنا جابىساتىن ۆيرۋستىڭ تىكەن ءپىشىندى اقۋىزى وزگەرگەن» دەيدى. ال دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، B.1.617 شتامى ءۇندىستاندا العاش رەت بىلتىر قازاندا شىققان. ددسۇ ءۇندىستان شتامىن «قىزىق مۋتاتسيا» دەپ سيپاتتاپ، «بۇل شتامم ەكپەنى اينالىپ ءوتۋى دە مۇمكىن»، – دەيدى.

"The Qazaq Times"