قىرعىز-تاجىك شەكارا داۋى: جاپاروۆ پۋتينگە العىس ءبىلدىردى

قىرعىزستان پرەزيدەنتى سادىر جاپاروۆ ۆلاديمير پۋتينگە قىرعىز-تاجىك شەكاراسىنداعى قاقتىعىسقا نازار اۋدارىپ، ماسەلەنى شەشۋگە اتسالىسقانى ءۇشىن العىس ءبىلدىردى.

پۋتينمەن كەلىسسوزدەر بارىسىندا جاپاروۆ: «قۇرمەتتى ۆلاديمير ۆلاديميروۆيچ، قىرعىز-تاجىك شەكاراسىنداعى جاعدايعا كوڭىل بولگەنىڭىز ءۇشىن جەكە العىسىمدى بىلدىرگىم كەلەدى. رەسەي – ءبىزدىڭ باستى وداقتاسىمىز جانە ساۋدا-ەكونوميكالىق سەرىكتەسىمىز، سوندىقتان بارلىق ماسەلەلەر بويىنشا ناتيجەلى كەلىسسوزدەر جۇرگىزۋگە ۇمىتتەنەمىن»، – دەدى.

قىرعىز-تاجىك شەكاراسىنداعى جاعدايدا وزگە ەلدەر قىرعىزستان مەن تاجىكستاننىڭ قايسىسىنا جاق ەكەنىن اشىق كورسەتپەۋگە تىرىستى. كەيىننەن ەكى ەلدىڭ رەسمي تۇلعالارى اراسىندا اسكەري ءىس-قيمىلدى توقتاتۋ تۋرالى كەلىسىم جاسالعاننان كەيىن كەي ەلدىڭ باسشىلارى شەكاراداعى كيكىلجىڭگە بايلانىستى پوزيتسياسىن بىلدىرەتىن مالىمدەمەلەر جاساي باستادى.

قازاقستان پرەزيدەنتى قاسىم-جومارت توقاەۆ ەكى ەل اراسىندا بىتىمگەر بولۋدى ۇسىنعان. ول مالىمدەمەسىندە: «ءوز تاراپىمنان ماسەلەنى شەشۋدىڭ ءتيىمدى جولدارىن قاراستىرۋعا جانە ءوزارا سەنىمدى قايتا قالپىنا كەلتىرۋگە كۇش سالۋعا دايىنمىن. ورتالىق ازيا مەملەكەتتەرى باسشىلارىنىڭ كەزەكتى كونسۋلتاتيۆتىك كەزدەسۋى اياسىندا مۇنداي شەكارالىق قاقتىعىستاردى رەتتەۋدىڭ تەتىكتەرىن قاراستىرۋ قاجەت دەپ سانايمىن»، – دەدى. شەكاراداعى قارۋلى قاقتىعىستى «قاتتى الاڭداۋشىلىقپەن» قابىلداعانىن جەتكىزگەن توقاەۆ ەكى ەلدىڭ اتىستى توقتاتىپ، كەلىسسوز باستاۋ نيەتىن قۇپتادى.

28-30 ساۋىردە قىرعىزستان مەن تاجىكستان شەكاراسىندا قارۋلى قاقتىعىس بولىپ، قىرعىز جاعىنان 36 ادام، ونىڭ ەكەۋى بالا، قازا بولعان. 183 قىرعىز ازاماتى جارالانعان.

قاقتىعىستىڭ سالدارىنان قىرعىزستاننىڭ باتكەن وبلىسىندا 78 تۇرعىن ءۇي، ەكى مەكتەپ، فەلدشەر-اكۋشەرلىك پۋنكت، ءۇش شەكارا بەكەتى، بالاقشا، ون جانار-جاعارماي ستانتسياسى، ميليتسيا بولىمشەلەرى، سەگىز دۇكەن ورتەنگەن. 29 ساۋىردە شەكاراداعى جاعداي ۋشىعىپ، ەكى ەلدىڭ اسكەري قىزمەتكەرلەرى اراسىندا اتىس بولعان. سول كۇنى كەشكە تاراپتار اتىستى توقتاتۋعا كەلىسكەنمەن، اتىس جەكەلەگەن جەرلەردە 1 مامىرعا دەيىن جالعاستى.

1 مامىردا باتكەن وبلىسىندا ەكى ەل ۇكىمەتتەرىنىڭ دەلەگاتسياسى دەليميتاتسيا جانە دەماركاتسيا ماسەلەلەرى بويىنشا كەلىسسوز وتكىزدى، كەزدەسۋ كەزىندە تاراپتار اتىستى تولىق توقتاتۋ جانە شەكارادان اسكەر اكەتۋ تۋرالى كەلىسىمگە كەلگەن. ەكى ەل پروكۋراتۋراسى اۋىر باپتار بويىنشا قىلمىستىق ءىس قوزعادى.

"The Qazaq Times"