استاناداعى انالار نارازىلىعى: كولگىنوۆتى كۇزەتۋمەن وتكەن ون كۇن

10 كۇننەن بەرى استانا اكىمدىگىنىڭ تابالدىرىعىندا تالاپ كوتەرىپ جۇرگەن انالاردىڭ قاتارىنا دۇيسەنبىدە مۇگەدەك بالا تاربيەلەپ وتىرعان ايەلدەر قوسىلدى. دەسە دە وسى كۇنگە دەيىن اشىنعان، «الەۋمەتتىك ساياساتتىڭ دۇرىس جۇرگىزىلمەۋىنەن ابدەن زارەزاپ بولدىق» دەگەن انالاردىڭ الدىنا اكىم التاي كولگىنوۆ شىعىپ، «ەستۋشى مەملەكەتتىڭ» تۇجىرىمداماسىنا ساي قادامعا بارا قويعان جوق. رەداكتسيا ءتىلشىسى بارلىق تاراپتى تىڭداپ كوردى. 

ەڭبەك ءمينيسترى سەرىك شاپكەنوۆ، قالا اكىمى التاي كولگىنوۆ جانە ءماجىلىستىڭ جاڭا دەپۋتاتتارىمەن كەزدەسۋدى تالاپ ەتكەن ءبىر توپ انا ەلوردا اكىمدىگىندە تۇنەپ جۇرگەنىنە وسىمەن ونىنشى كۇنگە تايادى. ولار «حالىق تالابى ورىندالمايىنشا» فويەدە-دالىزدە، ورىندىقتا تۇنەۋگە ءماجبۇر ەكەنىن ايتادى.

اقپاننىڭ اقىرعى اپتاسىنان كوكتەمگە جالعاسقان نارازىلىققا ناۋرىزدىڭ العاشقى كۇنى مۇگەدەك بالالاردىڭ قۇقىقتارى بۇزىلىپ جاتقانىنا شاعىنعان تاعى ءبىر توپ ايەل قوسىلدى. كۇندىز نارازىلاردىڭ قاتارى ارتىپ، كەشكىسىن وتباسىلىق جاعدايىنا بايلانىستى ءبىرشاما سيرەيدى. ولار دەپۋتاتتاردىڭ «حالىق الدىنا شىعۋدان تارتىناتىنىنا نەمەسە ادام ەسەبىندە ەلەمەۋىنە»، تالاپتارىن كوزبە-كوز تىڭداماعانىنا قاپالى.

قوعامدىق ماسەلەنى كوتەرگەن ايەلدەر باستى ءۇش تالاپتان وزگە تومەندەگى ماسەلەلەردى دەرەۋ رەتتەۋدى سۇرايدى. ەرەكشەلىگى بار بالانى اسىراپ-باعىپ وتىرعان انالار قازىرگى تاڭدا:

• «ساناتوري-كۋرورتتا 14 كۇندىك ەمدەۋ 7 كۇنگە قىسقارعانىن;
• ەم الاتىن كەزدە بالانىڭ قاسىندا كۇتىمىن جاسايتىن قامقورشىنىڭ ءجۇرۋى اقىلى نەگىزگە وزگەرگەنىن;
• مۇگەدەكتىگى بار بالالارعا ءبىرىنشى كەزەكتە وتەۋسىز بەرىلەتىن باسپانا باعدارلاماسىنىڭ الىنىپ تاستالىپ، مۇگەدەك بالالار جالپى تىزىمگە ەنگىزىلگەنىن;
• مۇگەدەكتىگى بار بالاعا بەرىلەتىن كۋالىكتە اتا-انانى «قامقورشى» رەتىندە كورسەتۋىن سۇرايدى، وسى سەبەپتى بالا كامەلەت جاسىنا تولعاندا ايلاپ ءجۇرىپ اتا-انالىق مارتەبەسىن سوت ارقىلى دالەلدەۋگە ءماجبۇر بولاتىنىن» ايتادى.

مۇنىڭ ءبارى «وتكەن شاقىرىلىمدارداعى دەپۋتاتتاردىڭ ءىسى» دەگەن انالار ماجىلىستەن وسى نورمالاردى قايتا قاراپ تۇزەتۋدى تالاپ ەتەدى.

كولگىنوۆتىڭ كابينەتىنە كىرەمىز دەپ پوليتسيانىڭ قۇرىعىنا تۇسكەن ءتورت ايەلدەن وزگە انالار نارازىلىقتى جالعاستىرىپ جاتىر. 2 ناۋرىز 2021 جىل، استانا اكىمدىگى. فوتوكوللاج: انالاردىڭ رەداكتسياعا جولداعان سۋرەتتەرىنەن

«حالىقتى ادام ەسەبىندە كورمەيدى. مۇگەدەك بالالارى بار انالار وسىمەن ەكىنشى ءتۇن قونىپ جاتىر. نەگە ماسەلەنى ناقتى شەشەتىندەر شىقپايدى؟ قازىر كومەكشىلەرىنىڭ كومەكشىسى جازباشا الادى دا بىرنەشە ايعا جوعالىپ كەتەدى. ەكى جىلدان بەرى وسىلاي اينالدىرىپ وتىر. «مەن جاڭادان كەلىپ وتىرمىن، قايتادان جازىپ الايىن، جوعارىعا جەتكىزەيىن» دەپ نەبىر شابارماندارىن جىبەرەدى. ەش ناتيجە جوق»، – دەيدى نارازى انانىڭ ءبىرى نازيرا مۋكۋشەۆا.

بالاسىنان شىعا المايتىن انالار نارازىلىق ءبىلدىرىپ جاتقان تاعدىرلاستارىنا جاپقىش، كورپە-توسەك، اس-تاعام جاعىنان قول ۇشىن سوزىپ وتىر.

– ەرەكشە بالامىزعا جىلىنا جالپى جيىنى بيۋدجەتتەن 4,4 ملن تەڭگە قارجى بولىنەدى. سول قاراجات بىزگە جەتكەنشە جۇلمالانىپ، قىزمەتتەر مەن كەرەك-جاراقتار ساپاسىز بەرىلەدى. جاعداي وتە اۋىر، ونى كەلىپ كورۋ كەرەك. دۇيسەنبى تاڭەرتەڭنەن باستاپ جينالدىق. وسىعان دەيىن بارماعان جەرىمىز جوق: اكىمدىك، نۇر وتان پارتياسىنا، مينيسترلىككە قانشاما رەت باردىق. اۆتوبۋسپەن قاماپ، بەلگىسىز جەرگە اپارىپ تاستاعان كەزى دە بولدى. ورتوپەديالىق اياق كيىمنىڭ ساپاسى ناشار، بالام ونى كيگەندە اياعىن باسا الماي قالادى. مەنى تىركەگەنىمەن، بالامدى 6 ەمحانا ەسەپتەن نەگىزسىز شىعارىپ تاستادى. دۇيسەنبى تۇندە ون شاقتى ادامنىڭ جاتقانىنا قاراماستان، اكىمدىك جىلۋدى ءوشىرىپ تاستادى»، – دەيدى ەرەكشە بالا تاربيەلەپ وتىرعان ءۇش بالانىڭ اناسى توعجان ءادىلوۆا.

نارازى توپپەن تىلدەسىپ تۇرعان اكىمدىك قىزمەتكەرى. 2 ناۋرىز 2021 جىل. استانا اكىمدىگى. فوتو: astana.gov.kz

جينالعاندار قالالىق ءماسليحات دەپۋتاتتارى جۇرە تىڭداعانىنا اشۋلى. بىراق نارازىلار كەۋدەسىنە جالاۋشا تاققانداردىڭ «بۇل ماسەلەلەردى سوڭىنا دەيىن كوتەرەرىنە» كۇمان كەلتىرەدى. ال رەداكتسيا حابارلاسقان اكىمدىك وكىلى انالاردىڭ اپتا بويى اكىمدىكتە تۇنەپ جۇرگەنىن ەكى مارتە تەرىستەدى.

– زاڭ بويىنشا ءۇش جىل تىركەۋدە تۇرۋى قاجەت. ولاردىڭ اراسىندا 2020 جىلى كەزەككە تۇرىپ، پاتەر سۇراپ  جاتقاندار بار. داۋرەن، قۋانىش سياقتى رەسمي وكىلدەر سويلەسۋگە تىرىستى. اكىمدىكتە سەگىز كۇن بويى ەشكىم تۇنەپ جاتقان جوق، – دەيدى اكىمدىكتىڭ ءباسپاسوز قىزمەتىنىڭ مامانى اقمارال ولجاباەۆا.

سونداي-اق، ەلوردا اكىمدىگىنىڭ سايتىندا نارازى انالاردىڭ «ماقساتى» تۋرالى كولگىنوۆ پەن ول باسقارىپ وتىرعان ۇجىمنىڭ ۇستانىمى رەسمي حابار تۇرىندە جاريالاندى.

«بەلسەندىلەردىڭ ماقساتى – باسقا انالاردىڭ ويىنا جاڭساق پىكىر قالىپتاستىرۋ جانە ولاردى اداستىرۋ. مۇنداي زاڭسىز تالاپتار ورىندالمايدى. تۇرعىن ءۇي كەزەگىندە 48 مىڭ ادام تۇر، الەۋمەتتىك پاتەرلەر تەك كەزەك بويىنشا بەرىلەدى. وزدەرىن اگرەسسيۆتى ۇستاعان بەلسەندىلەردىڭ اراسىندا بۇرىن زاڭعا سايكەس جانە كەزەك بويىنشا پاتەر العاندار بار ەكەنىن اتاپ وتكەن ءجون. سونداي-اق، كەلگەندەردىڭ ءبارى بىرنەشە رەت قابىلداۋدا، ونىڭ ىشىندە ەلوردا اكىمىنىڭ ازاماتتاردى قابىلداۋىندا بولعان. ونىڭ قورىتىندىسى بويىنشا ولارعا زاڭناماعا سايكەس بارلىق قاجەتتى كومەك كورسەتىلگەن بولاتىن»، – دەلىنگەن اكىمدىك اقپاراتىندا.

بۇگىن سارسەنبىگە قاراعان ءتۇنى اكىمدىك دالىزىندە 10-15 ايەل تۇنەپ شىقتى.

ون كۇنگە جۋىق تابالدىرىقتا وتىرعان انالاردىڭ نازارىنان تىس قىزمەتتىك ەسىكتەن كىرىپ-شىعىپ جۇرگەن كولگىنوۆتىڭ «ۇنسىزدىگى» سابىرىن تاۋسىپ، اكىم كابينەتىنە بارعان. كولگىنوۆتىڭ كابينەتىنە كىرۋ «زور مەحنات ءارى عانيبەت» ەكەنىن ايتقان ايەلدەردىڭ تورتەۋىن پوليتسيا كۇشتەپ الىپ كەتكەن.

نارازىلاردىڭ ايتۋىنشا، انالاردىڭ «اكىم قايدا، نەگە كەلمەيدى؟» دەگەن ساۋالىنا توعىز كۇننەن بەرى اكىمدىك قىزمەتكەرلەرى بەرگەن جاۋابى – «التاي كولگىنوۆ جينالىستا».

بۇدان وزگە 28 اقپان جەكسەنبى كۇنى كەشكىسىن ءبىر توپ پوليتسەي ەدەندە وتىرعان ايەلدەرگە قاۋمالاپ قىسىم كورسەتىپ، دەزينفەكتسيا شاراسىن «سىلتاۋراتىپ» شىعۋعا ۇگىتتەپ باققانىن ايتادى. ىزالانعان انالار الەۋمەتتىك جەلىلەردە تىكەلەي ەفيرگە شىققاننان كەيىن كەتىپ قالعان.

اپتا بويى اقجاعالىلاردىڭ كوزىنە ىلمەگەن نارازىلاردىڭ جاعدايى تۋرالى رەداكتسيا بىرنەشە ماتەريال جاريالاپ، ورتالىق كوممۋنيكاتسيالار قىزمەتىندە وتكەن بريفينگتە ءىىم مەن ءماجىلىس وكىلدەرىنە، اكىمدىكتىڭ ءباسپاسوز قىزمەتىنە سۇراۋ جولدادى.

وسىدان كەيىن سەيسەنبى كۇنى انالارعا اكىم ورىنباسارلارى – باقتيار ماكەن مەن نۇرلان نۇركەنوۆ، ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ شىقتى. دەگەنمەن انالار اكىم كولىگنوۆ پەن ءماجىلىس دەپۋتاتتارى الدىنا شىعىپ، جۇرت تالابى ورىندالمايىنشا، نارازىلىقتى جالعاستىراتىنىن جەتكىزدى.

"The Qazaq Times"