LRT قۇرىلىسىنا حالىق بانك كومەكتەسەتىن بولدى

نۇر-سۇلتانداعى جەڭىل رەلستى كولىك قۇرىلىسىنا (LRT) حالىق بانك كومەكتەسەدى. بۇل تۋرالى قالا اكىمى التاي كولگىنوۆ مالىمدەدى.

ۇكىمەت وتىرىسىنان كەيىن تىلشىلەردىڭ ساۋالىنا جاۋاپ بەرگەن كولگىنوۆ: «LRT بويىنشا بارلىق ءنورماتيۆتى-قۇقىقتىق قۇجاتتار ۇكىمەتتىك جانە جەرگىلىكتى اتقارۋشى ورگاندار دەڭگەيىندە قابىلداندى. قازىرگى ۋاقىتتا ەكىنشى دەڭگەيلى بانكتەر ءتيىستى جۇمىستاردى جۇرگىزىپ جاتىر. بۇدان بۇرىن ايتقانىمىزداي، ءبىز قىتايلىق قارىزدان باس تارتىپ، 800 ملن اقش دوللارىن ۇنەمدەپ قالدىق. ءبىز «حالىق بانكپەن» 3 پايىزدىق قارىزبەن 500 ملن (اقش دوللارى), سونداي-اق، 100 ملن (اقش دوللارى) بويىنشا «بايتەرەك» حولدينگىمەن كەلىستىك. بۇل قاراجات جۇمىستى باستاپ كەتۋگە جەتكىلىكتى»، – دەدى.

تاياۋدا «استانا LRT» جشس-ءنىڭ بۇرىنعى باسقارما توراعاسى تالعات اردانعا حالىقارالىق ىزدەۋ جاريالانعان بولاتىن. سىبايلاس جەمقورلىققا قارسى ءىس-قيمىل اگەنتتىگى «استانا LRT»-ءنىڭ بۇرىنعى باسشىسىنىڭ اتىنان قىلمىستىق ءىس قوزعاپ، ونى قاماۋعا الۋ تۋرالى ءوتىنىش جولداعان. قازىرگى ۋاقىتتا ينتەرپول وسى ماسەلەنى نازاردا ۇستاپ وتىر.

ايتا كەتەيىك، «استانا LRT» قۇرىلىسى 2016 جىلى باستالعان. باستاپقى جوسپار بويىنشا قۇرىلىس جۇمىستارى 2019 جىلى 31 جەلتوقساندا اياقتالىپ، 2020 جىلى جازدا پايدالانۋعا بەرىلۋى ءتيىس ەدى. 22 كيلومەتردەن اساتىن جولدى سالۋعا 1 ميلليارد 887 ميلليون دوللار بولىنگەن. بىراق كەيىن قۇرىلىس جۇمىستارى توقتاپ قالعان.

"The Qazaq Times"