Astanadağı analar narazılığı: Kölginovti küzetumen ötken on kün

10 künnen beri astana äkimdiginiñ tabaldırığında talap köterip jürgen analardıñ qatarına düysenbide mügedek bala tärbielep otırğan äyelder qosıldı. Dese de osı künge deyin aşınğan, «äleumettik sayasattıñ dwrıs jürgizilmeuinen äbden zärezap boldıq» degen analardıñ aldına äkim Altay Kölginov şığıp, «Estuşi memlekettiñ» twjırımdamasına say qadamğa bara qoyğan joq. Redakciya tilşisi barlıq taraptı tıñdap kördi. 

Eñbek ministri Serik Şäpkenov, qala äkimi Altay Kölginov jäne Mäjilistiñ jaña deputattarımen kezdesudi talap etken bir top ana elorda äkimdiginde tünep jürgenine osımen onınşı künge tayadı. Olar «halıq talabı orındalmayınşa» foyede-dälizde, orındıqta tüneuge mäjbür ekenin aytadı.

Aqpannıñ aqırğı aptasınan köktemge jalğasqan narazılıqqa naurızdıñ alğaşqı küni mügedek balalardıñ qwqıqtarı bwzılıp jatqanına şağınğan tağı bir top äyel qosıldı. Kündiz narazılardıñ qatarı artıp, keşkisin otbasılıq jağdayına baylanıstı birşama sireydi. Olar deputattardıñ «halıq aldına şığudan tartınatınına nemese adam esebinde elemeuine», talaptarın közbe-köz tıñdamağanına qapalı.

Qoğamdıq mäseleni kötergen äyelder bastı üş talaptan özge tömendegi mäselelerdi dereu retteudi swraydı. Erekşeligi bar balanı asırap-bağıp otırğan analar qazirgi tañda:

• «sanatoriy-kurortta 14 kündik emdeu 7 künge qısqarğanın;
• em alatın kezde balanıñ qasında kütimin jasaytın qamqorşınıñ jürui aqılı negizge özgergenin;
• mügedektigi bar balalarğa birinşi kezekte öteusiz beriletin baspana bağdarlamasınıñ alınıp tastalıp, mügedek balalar jalpı tizimge engizilgenin;
• mügedektigi bar balağa beriletin kuälikte ata-ananı «qamqorşı» retinde körsetuin swraydı, osı sebepti bala kämelet jasına tolğanda aylap jürip ata-analıq märtebesin sot arqılı däleldeuge mäjbür bolatının» aytadı.

Mwnıñ bäri «ötken şaqırılımdardağı deputattardıñ isi» degen analar Mäjilisten osı normalardı qayta qarap tüzetudi talap etedi.

Kölginovtiñ kabinetine kiremiz dep policiyanıñ qwrığına tüsken tört äyelden özge analar narazılıqtı jalğastırıp jatır. 2 naurız 2021 jıl, Astana äkimdigi. Fotokollaj: analardıñ redakciyağa joldağan suretterinen

«Halıqtı adam esebinde körmeydi. Mügedek balaları bar analar osımen ekinşi tün qonıp jatır. Nege mäseleni naqtı şeşetinder şıqpaydı? Qazir kömekşileriniñ kömekşisi jazbaşa aladı da birneşe ayğa joğalıp ketedi. Eki jıldan beri osılay aynaldırıp otır. «Men jañadan kelip otırmın, qaytadan jazıp alayın, joğarığa jetkizeyin» dep nebir şabarmandarın jiberedi. Eş nätije joq», – deydi narazı ananıñ biri Nazira Mukuşeva.

Balasınan şığa almaytın analar narazılıq bildirip jatqan tağdırlastarına japqış, körpe-tösek, as-tağam jağınan qol wşın sozıp otır.

– Erekşe balamızğa jılına jalpı jiını byudjetten 4,4 mln teñge qarjı bölinedi. Sol qarajat bizge jetkenşe jwlmalanıp, qızmetter men kerek-jaraqtar sapasız beriledi. Jağday öte auır, onı kelip köru kerek. Düysenbi tañerteñnen bastap jinaldıq. Osığan deyin barmağan jerimiz joq: äkimdik, Nwr Otan partiyasına, ministrlikke qanşama ret bardıq. Avtobuspen qamap, belgisiz jerge aparıp tastağan kezi de boldı. Ortopediyalıq ayaq kiimniñ sapası naşar, balam onı kigende ayağın basa almay qaladı. Meni tirkegenimen, balamdı 6 emhana esepten negizsiz şığarıp tastadı. Düysenbi tünde on şaqtı adamnıñ jatqanına qaramastan, äkimdik jıludı öşirip tastadı», – deydi erekşe bala tärbielep otırğan üş balanıñ anası Toğjan Ädilova.

Narazı toppen tildesip twrğan äkimdik qızmetkeri. 2 naurız 2021 jıl. Astana äkimdigi. Foto: astana.gov.kz

Jinalğandar qalalıq mäslihat deputattarı jüre tıñdağanına aşulı. Biraq narazılar keudesine jalauşa taqqandardıñ «bwl mäselelerdi soñına deyin kötererine» kümän keltiredi. Al redakciya habarlasqan äkimdik ökili analardıñ apta boyı äkimdikte tünep jürgenin eki märte teristedi.

– Zañ boyınşa üş jıl tirkeude twruı qajet. Olardıñ arasında 2020 jılı kezekke twrıp, päter swrap  jatqandar bar. Däuren, Quanış siyaqtı resmi ökilder söylesuge tırıstı. Äkimdikte segiz kün boyı eşkim tünep jatqan joq, – deydi äkimdiktiñ baspasöz qızmetiniñ mamanı Aqmaral Oljabaeva.

Sonday-aq, elorda äkimdiginiñ saytında narazı analardıñ «maqsatı» turalı Kölginov pen ol basqarıp otırğan wjımnıñ wstanımı resmi habar türinde jariyalandı.

«Belsendilerdiñ maqsatı – basqa analardıñ oyına jañsaq pikir qalıptastıru jäne olardı adastıru. Mwnday zañsız talaptar orındalmaydı. Twrğın üy kezeginde 48 mıñ adam twr, äleumettik päterler tek kezek boyınşa beriledi. Özderin agressivti wstağan belsendilerdiñ arasında bwrın zañğa säykes jäne kezek boyınşa päter alğandar bar ekenin atap ötken jön. Sonday-aq, kelgenderdiñ bäri birneşe ret qabıldauda, onıñ işinde elorda äkiminiñ azamattardı qabıldauında bolğan. Onıñ qorıtındısı boyınşa olarğa zañnamağa säykes barlıq qajetti kömek körsetilgen bolatın», – delingen äkimdik aqparatında.

Bügin särsenbige qarağan tüni äkimdik dälizinde 10-15 äyel tünep şıqtı.

On künge juıq tabaldırıqta otırğan analardıñ nazarınan tıs qızmettik esikten kirip-şığıp jürgen Kölginovtiñ «ünsizdigi» sabırın tausıp, äkim kabinetine barğan. Kölginovtiñ kabinetine kiru «zor mehnat äri ğanibet» ekenin aytqan äyelderdiñ törteuin policiya küştep alıp ketken.

Narazılardıñ aytuınşa, analardıñ «äkim qayda, nege kelmeydi?» degen saualına toğız künnen beri äkimdik qızmetkerleri bergen jauabı – «Altay Kölginov jinalısta».

Bwdan özge 28 aqpan jeksenbi küni keşkisin bir top policey edende otırğan äyelderge qaumalap qısım körsetip, dezinfekcya şarasın «sıltauratıp» şığuğa ügittep baqqanın aytadı. Izalanğan analar äleumettik jelilerde tikeley efirge şıqqannan keyin ketip qalğan.

Apta boyı aqjağalılardıñ közine ilmegen narazılardıñ jağdayı turalı redakciya birneşe material jariyalap, Ortalıq kommunikaciyalar qızmetinde ötken brifingte İİM men Mäjilis ökilderine, äkimdiktiñ baspasöz qızmetine swrau joldadı.

Osıdan keyin seysenbi küni analarğa äkim orınbasarları – Baqtiyar Mäken men Nwrlan Nürkenov, eñbek jäne halıqtı äleumettik qorğau vice-ministri Erlan Äukenov şıqtı. Degenmen analar äkim Kölignov pen Mäjilis deputattarı aldına şığıp, jwrt talabı orındalmayınşa, narazılıqtı jalğastıratının jetkizdi.

"The Qazaq Times"