ارمەنياداعى ىقتيمال اسكەري توڭكەرىس: ءوڭىر دەرجاۆالارىنىڭ ۇستانىمى

ارمەنستان جۇرتى تاۋلى قاراباق ماسەلەسى بويىنشا كەلىسىمگە كەلگەنىنە قاراماستان ەلدە بولجاۋلى-بولجاۋسىز ساياسي داعدارىس تەرەڭدەي ءتۇستى. ەل ۇكىمەتىن جەتەكتەۋشى نيكول پاشينيان ارمەنيا قارۋلى كۇشتەرى باس شتاف جەتەكشىسىن ورنىنان الىپ تاستاۋ تۋرالى شەشىم شىعاردى. تاراپتاستارىن ميتينگكە شاقىرعان پاشينيان ەلدە اسكەري توڭكەرىس بولعالى جاتقانىن ەسكەرتتى. دەگەنمەن، باس شتاف جەتەكشىسى تەك پرەزيدەنت بۇيرىعىنان كەيىن عانا ورنىنان كەتۋى ءتيىس.

ارمەنيا ۇكىمەتىنىڭ وپپوزيتسياسى دا بۇل كۇندە ەرەۋىلدە. ولار پرەمەر-ءمينيسترلىڭ ءوز تاراپتارىن تاراتىپ، ماسەلەلەردى كەڭەسۋ ارقىلى شەشۋ تۋرالى ۇسىنىستارىن قۇلاقتارىنا ىلمەي وتىر. وپپوزيا بۇل كۇندە قارۋلى كۇشتەرگە جاقتاس بولىپ تۇرعانى كىم-كىمگە بولسىن بەلگىلى بولىپ قالدى. ولار ۇكىمەت سارايى مەن پارلامەنت سارايىن قورشاپ الىپ، نيكول پاشينيان ورنىنان كەتپەيىنشە تارامايتىنىن ايتۋدا.

ۇكىمەتكە قارسى كوزقاراستاعى ارمياندار پرەمەر-ءمينيستردىڭ قىزمەتىن توقتاتۋ بويىنشا پالمەنتتىڭ شۇعىل جينالۋىن تالاپ ەتكەنى دە بار. دەگەنمەن، پارلامەنتتەگى باسىم كوپ ساياسي توپتار قازىرگى پرەمەر-ءمينيستردى قولدايتىنى دا انىق. ال، ەل پرەزيدەنتى ساركيسيان مالىمدەمە جاساپ بارلىق تاراپتى سابىرعا شاقىردى. ول ەكى كۇن ىشىندە باس شتاف جەتەكشىسى گاسپارياندى قىزمەتىنەن الۋ نەمەسە الماۋ تۋرالى شەشىمىن ءبىلدىرۋى ءتيىس.

نيكول پاشينياننىڭ گاسپارياندى قىزمەتىنەن الۋ تۋرالى شەشىم شىعارۋى ەلدە ساياسي داعدارىس ءورشىپ تۇرعان كەزدە جاسالدى دەپ سانايتىن ساراپشىلار بار. الايدا، نيكول پاشينيان ءۇشىن ەلدەگى ساياسي جاعدايدى رەتكە سالۋ ءۇشىن بۇدان باسقا جول دا كورىنىپ تۇرعان جوق.

ءوڭىر دەرجاۆالارىنىڭ سىڭايى

رەسەي مەن تۇركيا سىندى وڭىردە ىقپالىن اسىرۋعا تىرىساتىن ءىرى ەلدەردىڭ اراسىنداعى شاعىن ەلدەردە قانداي دا ءبىر ەلەۋلى وقيعا بولا قالسا، انكارا مەن ماسكەۋدىڭ قاباق قاعىسى، ءسوز الىسى ماڭىزدى بولا قالاتىنى ءسوزسىز. «مۇنىڭ ارتىندا قايسىسى تۇر؟» دەگەن وداعاي سۇراق تا جاتتاندى بولا تۇسكەندەي.

بۇل جولى رەسەي ماسەلەنى ارمەنيانىڭ ىشكى ءىسى دەسە، تۇركيا اسكەري توڭكەرىستى ايىپتادى. بۇعان قاراعاندا ماسكەۋ ماسەلەگە باس قاتىرمايتىن، ال تۇركيا ءسال قاراي المايتىن بولىپ كورىنەدى. شىن مانىسىندە مۇنىڭ كەرىسىنشە سەكىلدى. تاۋەلسىز ساراپشىلار اسكەري توڭكەرىس بولا قالسا ونىڭ ارتىندا رەسەيدىڭ تۇراتىنىن ايتادى. سەبەبى، بۇل ەلدەگى اسكەري شەندىلەر رەسەيمەن تىعىز بايلانىستا دەگەندى العا تارتادى.

ەۋرووداق بولسا تاراپتاردى سابىرعا شاقىردى. ەلدەگى بيلىك الماسۋعا ارميانىڭ ارالاسپاۋىن ءۇمىت ەتتى. ارينە، وڭتۇستىك كاۆكاز ءۇشىن ەو-نىڭ وزىندىك مۇددەسى بار. ول دا وڭىرگە ىقپال ەتۋشى ءۇشىنشى تاراپ رەتىندە سانالادى. بۇنداي دا ول دا ءوزىنىڭ مۇددەسىنە لايىق ءسوز سويلەپ، قادام جاسايتىنى ءسوزسىز.

انكارا ءوز پىكىرىن اشىق قانا ايتا سالدى: «ۇكىمەتتى سىنداۋ، ونىڭ بيلىكتەن كەتۋىن تالاپ ەتۋ ورىندى ءىس. بىراق، وعان ارميانىڭ ارالسۋىن قالامايمىز»، – دەدى تۇرىك ءسىم تارابى.

وزىندىك بولجام:

بۇدان بىرەر كۇن بۇرىن نيكول پاشينيان امەريارەسەيدەن العان قارۋ-جاراقتارىنىڭ ساپاسى تۋرالى سىني پىكىردە مالىمدەمە جاسادى. ول رەسەيلىك «ەسكەندىر» زىمىراندارى تاۋلى قاراباق سوعىسىندا كوپ پايداعا اسپاعانىن، ءتىپتى باسىم كوپ زىمىرانداردىڭ جارىلماي قالعانى تۋرالى دا ايتقان. ال، رەسەي تارابى كەشە عانا بۇعان قارسى مالىمدەمە جاساپ، تاۋلى قاراباق سوعىسىندا «ەسكەندىر» زىمىراندارى قولدانىلعان جوق دەگەن ءۋاج كەلتىردى.

وسى ماسەلەلەردەن قاراعاندا اسكەري توڭكەرىسكە مۇددەلى تاراپ رەتىندە ماسكەۋدىڭ توبەسىن كورەر ەدىك. ارمەنياداعى اسكەريلەر رەسەيلىك اسكەري تەحنيكا مەن ءىس-قيمىل تاجىريبەلەرىنە كوبىرەك سۇيەنەدى. باس شتافتىڭ جوعارى جەتەكشىلەرىنىڭ كوبى رەسەيدىڭ اسكەري وقۋ ورىندارىندا ءبىلىم العانى تۋرالى قارابا سوعىسى كەزىندە تالاي ينفورماتسيالار تاراپ ەدى.

«ماسكەۋ وعان نەگە مۇددەلى بولدى؟» دەگەن سۇراققا جاۋاپ بەرۋدىڭ كوپ نۇسقاسى بولسا كەرەك. ەڭ اۋەلى، ۋىسىنان سۋسىپ شىعىپ بارا جاتقان زاتتى ۇستاپ قالۋ ءۇشىن ادەتتەگىدەن قارقىندى جانە كۇشتىرەك ارەكەت ەتەتىن ادامدى ەسكە تۇسىرۋگە بولادى. قالاي دەگەن كۇندە دە پاشينيان ارمەنيا ازاماتتىق بيلىگىنە ەرەۋىل جولىمەن كەلدى. ول ماسكەۋمەن بەلگىلى دەڭگەيدەگى جاقىندىقتى ساقتاعان بولىپ، ىشكى جاقتا باتىسقا بەيىمدىلىككە، ەو-مەن ىنتىماقتاسۋعا ۇمتىلدى. بۇل ارينە گرۋزيانى جوعالتۋ سەكىلدى ماسكەۋ ءۇشىن ۇلكەن شىعىننىڭ ءبىرى بولار ەدى.

“The Qazaq Times”