«ابسۋرد شەشىم»: سەنات ترامپ يمپيچمەنتىن زاڭدى دەپ تانىدى

دونالد ترامپ ەكى رەت يمپيچمەنت جاريالانعان اقش-تىڭ العاشقى پرەزيدەنتى رەتىندە تاريحتا قالماق. وتكەن جىلى سەنات اق ءۇي باسشىسىن اقتادى. بىراق بيىل اقش سەناتى كوپشىلىك داۋىسپەن ەكس-پرەزيدەنت دونالد ترامپتىڭ يمپيچمەنت پروتسەسىن كونستيتۋتسياعا قايشى ەمەس دەپ تانىدى.

بۇل شەشىمگە داۋىس بەرگەن جوعارعى پالاتاداعى 50 دەموكراتتارعا التى رەسپۋبليكاشىل قوسىلدى، ونىڭ ىشىندە اقش پرەزيدەنتتىگىنە كانديدات بولعان ميتت رومني دە بار.

بۇرىنعى پرەزيدەنتكە ايىپتاۋدى وكىلدەر پالاتاسىنىڭ سپيكەرى نەنسي پەلوسي تاڭداعان كونگرەسستىڭ توعىز دەموكراتى ۇسىندى. 25 قاڭتاردا ولار سەناتقا ايىپتاۋ قۇجاتىن رەسمي تۇردە تاپسىردى. وسىدان كەيىن جوعارعى پالاتاداعى دەموكراتيالىق كوپشىلىكتىڭ جەتەكشىسى چاك شۋمەر جانە رەسپۋبليكالىق توپ باسشىسى ميتچ ماككوننەلل ترامپتىڭ ادۆوكاتتارىنا ەكس-پرەزيدەنتكە تاعىلعان ايىپتاردى جوققا شىعاراتىن ءوتىنىش دايىنداۋعا قوسىمشا ۋاقىت بەردى.

ساراپشىلاردىڭ پىكىرىنشە، سايلاۋداعى جەڭىلىس، سەناتتاعى سپيكەرلەردىڭ ازايۋى رەسپۋبليكالىق پارتيانىڭ بولىنۋىنە اكەلۋى مۇمكىن. سونىمەن قاتار، بۇرىنعى پرەزيدەنتتى قولدايتىن رەسپۋبليكالىق پارتيا وكىلدەرى: «ترامپقا يمپيچمەنت جاريالاپ، بيلىكتەن شەتتەتۋ – ابسۋرد شەشىم. سەبەبى وكىلەتتىگى توقتاعان ەكس-پرەزيدەنتكە يمپيچمەنت پروتسەسىن جۇرگىزبەۋ قاجەت. ياعني دەموكراتتاردىڭ باستى ماقساتى – رەسپۋبليكالىقتاردىڭ ىقپالىن ازايتىپ، كەلەسى سايلاۋعا ترامپتى قاتىستىرماۋ عانا»، – دەيدى.

قاڭتاردا دەموكراتتارعا تيەسىلى كونگرەسس دونالد ترامپقا يمپيچمەنت جاريالاپ، ونى بۇلىك شىعاردى دەپ ايىپتادى. زاڭ شىعارۋشىلاردىڭ پىكىرىنشە، ترامپ سايلاۋ ناتيجەلەرىن مويىنداماعانى ءۇشىن جانە كاپيتوليدەگى بۇلىك ءۇشىن جاۋاپقا تارتىلۋى ءتيىس.

اق ءۇيدىڭ بۇرىنعى باسشىسى «جاساعان قىلمىستار» تۋرالى 80 بەتتەن تۇراتىن قۇجات 2 اقپاندا سەناتقا تاپسىرىلعان. التى كۇننەن كەيىن، 8 اقپاندا، ترامپ وكىلدەرى ءوز ۇستانىمىن ءبىلدىردى. زاڭگەرلەردىڭ پىكىرىنشە، وكىلەتتىگىن توقتاتقان پرەزيدەنتتىڭ يمپيچمەنتى زاڭعا قايشى.

9 اقپاندا ءتورت ساعاتقا سوزىلعان دەبات كەزىندە تاراپتار وزدەرىنىڭ ارگۋمەنتتەرىن العا تارتىپ، قىزمەتىنەن كەتكەن پرەزيدەنتكە يمپيچمەنت جاريالاۋ پروتسەسىنىڭ زاڭدىلىق ماسەلەسى داۋىسقا سالىندى. ناتيجەسىندە 56 سەناتور (50 دەموكرات جانە 6 رەسپۋبليكاشىل) يمپيچمەنتتى زاڭدى دەپ تانىعان. 44 سەناتور-رەسپۋبليكاشىل اتالعان تۇجىرىممەن كەلىسپەگەن. بۇعان دەيىن ترامپ ادۆوكاتتارى سەناتتىڭ بۇرىنعى پرەزيدەنتكە يمپيچمەنت جاريالاۋ ءىسىن تالقىلاۋعا زاڭنامالىق وكىلەتى جوق دەپ مالىمدەگەن.

"The Qazaq Times"