دونالد ترامپ مەملەكەت باسشىسى قىزمەتىنەن كەتكەننەن كەيىنگى العاشقى مالىمدەمەسىندە 2024 جىلى وتەتىن پرەزيدەنتتىك سايلاۋدا بيلىك قايتادان رەسپۋبليكالىق پارتياعا وتەتىنىنە سەنىم ءبىلدىردى.

اق ءۇيدىڭ بۇرىنعى باسشىسى ورلاندودا (فلوريدا شتاتى) وتكەن اقش كونسەرۆاتيۆتى توپتارىنىڭ كونفەرەنتسياسىندا ءوزىنىڭ الداعى جوسپارلارى مەن بايدەننىڭ ساياساتى تۋرالى پىكىر ءبىلدىردى. بۇل – رەسپۋبليكالىق پارتيانىڭ ەڭ ۇلكەن ءىس-شارالارىنىڭ ءبىرى. شارادا پارتيانىڭ باسىمدىقتارى مەن بولاشاق باعىتى انىقتالادى.

ترامپ شامامەن ءبىر جارىم ساعات سويلەپ، مالىمدەمەسىنىڭ باسىم بولىگىن بايدەندى سىناۋعا ارنادى. ول بايدەندى ەل تاريحىنداعى «امەريكانى سوڭعى ورىنعا قويعان» ەڭ ناشار پرەزيدەنت دەپ سيپاتتادى. ەكس-پرەزيدەنت جاڭا اكىمشىلىكتى كوشى-قون ماسەلەسىن باقىلاۋدى توقتاتىپ، بىرنەشە كەلىسسوزدەردىڭ كۇشىن جويعانى ءۇشىن سىنعا الدى. سونداي-اق، ترامپ ءوز اكىمشىلىگىنىڭ الدىن-الا جاساعان پاندەمياعا قارسى كۇرەس جوسپارىن بايدەن ءتيىمدى پايدالاندى جانە جاڭا سوعىستار باستادى دەپ ايىپتادى.

پرەزيدەنتتىك قىزمەتىنەن كەتكەننەن كەيىن ءبىرىنشى رەت مالىمدەمە جاساعان ترامپ امەريكالىق باق-تىڭ نازارىن اۋداردى. جۋرناليستەردىڭ جاڭا پارتيا قۇرۋ تۋرالى ساۋالىنا ترامپ: «بىزدە رەسپۋبليكالىق پارتيا بار جانە ول بۇرىن-سوڭدى بولماعان جەڭىسكە جەتەدى. 2024 جىلى سايلاۋدا قايتادان كوش باستايدى»، – دەپ جاۋاپ بەردى.

2024 جىلى وتەتىن پرەزيدەنتتىك سايلاۋ جونىندە ترامپ: «سول جىلى اق ءۇي رەسپۋبليكالىق پارتيانىڭ وكىلىنە وتەدى. دەموكراتتار جەڭىلىستى كوتەرە الادى دەپ ويلايمىن. ونىڭ كىم ەكەنى بارىمىزگە دە قىزىق»، – دەدى. كونفەرەنتسياعا دەيىن جۇرگىزىلگەن ساۋالناما بويىنشا قاتىسۋشىلاردىڭ 68%-ى بۇرىنعى پرەزيدەنتتىڭ سايلاۋعا قاتىسۋىنا قولداۋ بىلدىرسە، 55%-ى ترامپ رەسپۋبليكالىق پارتيا وكىلدەرىن سايلاۋعا ۇسىنسا دەپ سانايدى.

"The Qazaq Times"