قازاقستاننىڭ بۇرىنعى پرەزيدەنتى نۇرسۇلتان نازارباەۆ جانە ساياساتكەر زامانبەك نۇرقادىلوۆ. فوتو: https://rferl.org

وسىدان 15 جىل بۇرىن مەملەكەت جانە قوعام قايراتكەرى زامانبەك نۇرقادىلوۆ ءوز ۇيىنەن ءولى كۇيىندە تابىلدى. قازاقستان «مەرزىمىنەن بۇرىن» پرەزيدەنتتىك سايلاۋعا دايىندىق جۇرگىزىپ جاتقان جىلى قازا تاپقان ساياساتكەردىڭ ءولىمى ءالى كۇنگە دەيىن جۇمباق كۇيىندە قالىپ وتىر.

30 جىلداي قازاقستاننىڭ پرەزيدەنتى بولعان نۇرسۇلتان نازارباەۆتى «بيلىكتى زاڭسىز يەمدەنىپ، جەمقورلىق جاسادى» دەپ ايىپتاپ، اشىق سىناعان زامانبەك قالابايۇلى وپپوزيتسيالىق پىكىرلەرىن بىلدىرگەنگە دەيىن ءىرى قىزمەتتەر اتقاردى. ول الماتى قالاسى مەن وبلىسىنىڭ اكىمى، ءماجىلىس دەپۋتاتى، توتەنشە جاعدايلار جونىندەگى اگەنتتىك توراعاسى بولعان.

2004 جىلى ناۋرىزدا نازارباەۆتىڭ ساياساتىن سىناعاننان كەيىن توتەنشە جاعدايلار اگەنتتىگى جەتەكشىسى زامانبەك نۇرقادىلوۆ «قىزمەت مىندەتىن دۇرىس اتقارماعان» دەگەن ۋاجبەن ورنىنان الىندى. كوپ ۇزاماي نۇرقادىلوۆ قازاقستانداعى كوررۋپتسياعا قارسى قوعامدىق كوميتەت قۇراتىنىن جاريالاپ، «ادىلەتتى قازاقستان ءۇشىن» وپپوزيتسيالىق قوزعالىسىنىڭ قۇرىلتاي كوميتەتىنە ەندى.

ءبىر جىلدان كەيىن 12 قاراشادا ساياساتكەر الماتىداعى ۇيىندە جۇمباق جاعدايدا مەرت بولدى. ونىڭ جانسىز دەنەسىنەن ءۇش وقتىڭ ءىزى جانە وقيعا ورنىنان كەزىندە وعان سىيعا تارتىلعان تاپانشا تابىلعانى حابارلاندى. رەسمي تەرگەۋ «نۇرقادىلوۆ ءوز-ءوزىن ەكى رەت كەۋدەسىنەن جانە ءبىر رەت باسىنان تاپانشادان اتىپ قازا بولعان» دەگەن قورىتىندى جاسادى. بىراق وپپوزيتسيا «بيلىكتى سىناعان قايراتكەر قاستاندىق قۇربانى بولعان» دەپ سانايدى.

2005 جىلى الماتى قالاسىنىڭ عىلىم اكاەدمياسىندا وتكەن ساياساتكەردىڭ جەرلەۋ راسىمىندە جۇزدەگەن ادام جينالدى. بىرنەشە ايدان سوڭ ءدال وسى عيماراتتا حالىق ساياساتكەر التىنبەك سارسەنباەۆپەن دە قوشتاستى. ەكى قايراتكەردىڭ دە قازاسى ءالى كۇنگە دەيىن تولىق تەرگەلگەن جوق.

"The Qazaq Times"