قوعام بەلسەندىلەرى ا.سارسەنبايۇلىنىڭ ولىمىنە قاتىستى ءىستى قايتا قاراۋدى تالاپ ەتتى

«التىنبەك سارسەنبايۇلىنىڭ ولىمىنە قاتىستى قىلمىستىق ءىستى قايتا تەكسەرىپ، تاپسىرىس بەرۋشىلەردىڭ كىم ەكەنىن اشىپ كورسەتۋ كەرەك!» بۇگىن، 11 اقپان كۇنى الماتىدا وتكەن مەملەكەت جانە قوعام قايراتكەرى التىنبەك سارسەنبايۇلىن ەسكە الۋعا ارنالعان شارادا وسىنداي تالاپتار قويىلدى. «استانا» قوناق ۇيىندە وتكەن شارانى ا.سارسەنبايۇلىنىڭ قازا بولعان كۇنىنە وراي «التىنبەك سارسەنبايۇلى قورى» جانە جاڭادان قۇرىلعان «دەموكراتيالىق پارتيا» تارابىنان ۇيىمداستىرىلعان.

بىرقاتار ساياساتكەرلەر مەن قوعام قايراتكەرلەرى، زيالى قاۋىم وكىلدەرى جانە ازاماتتىق بەلسەندىلەر قاتىسقان جيىندا التىنبەك سارسەنبايۇلىنىڭ اعاسى، قوعام بەلسەندىسى، جۋرناليست ىرىسبەك سارسەنبايۇلى ارنايى بايانداما جاسادى. ول «ساياسي تەرروردىڭ قالاي جاسالعانىن جانە تاپسىرىس بەرۋشىنىڭ كىمدەر ەكەنىن اشىپ ايتاتىن كەز كەلدى» دەگەن تاقىرىپتاعى بايانداماسىندا التىنبەك سارسەنبايۇلىنىڭ ولىمىنە قاتىستى بىرقاتار تۇيتكىلدى ماسەلەلەردى ورتاعا سالدى جانە قازىرگى بيلىكتەن التىنبەك سارسەنبايۇلىنا جاسالعان قاستاندىقتى اشىپ تەكسەرۋدى تالاپ ەتتى.

ىرىسبەك سارسەنبايۇلى ءىنىسىن التىنبەك پەن زامانبەك نۇرقادىلوۆتى ساياسي تەررورلىق قۇربانى دەپ سانايدى جانە ز. نۇرقادىلوۆتىڭ جەرلەسى، التىنبەك سارسەنبايۇلىنىڭ اعاسى رەتىندە زاڭ بويىنشا جابىرلەنۋشى ەكەنىن العا تارتا وتىرىپ، اتتارى اتالعان مەملەكەت جانە قوعام قايراتكەرلەرىنە، باۋىرجان بايبوسىن مەن ۆاسيلي جۋراۆلەۆكە وق اتقىزعانداردى، وق اتقانداردى انىقتاۋدى، قىلمىستىق جازاعا تارتۋدى تالاپ ەتەتىنىن ءبىلدىردى.

«بۇرىنعى پرەزيدەنت ن.نازارباەۆتى 2005 جىلعى 13 قاراشاداعى، 2006 جىلعى 11 اقپانداعى قىلمىستىق ىستەرگە قاتىسى بار دەپ ەسەپتەيمىن! قازىرگى سەنات توراعاسى داريعا نازارباەۆانى ر.اليەۆ پەن ءا.مۋساەۆقا قاتىستى قوزعالعان №14001901100001 قىلمىستىق ىسكە كۇدىكتى رەتىندە قوسىپ، تەرگەۋگە الۋدى تالاپ ەتەمىن! سول ەكى قاندى وقيعانىڭ قوعامداعى قاۋپىن ەسكەرىپ، تەرروريزم بابى بويىنشا جاڭادان ءىس جۇرگىزۋدى تالاپ ەتەمىن!» – دەدى ىرىسبەك سارسەنبايۇلى.

ازاماتتىق قوعام وكىلدەرى قاتىسقان جيىندا التىنبەك سارسەنبايۇلى مەن زامانبەك نۇرقادىلوۆتىڭ ءولىمى قازاقستاننىڭ دەموكراتيالانۋى مەن قۇقىقتىق كەمەلدەنۋىن كەرى شەگەرگەن تاريحي-ساياسي وقيعا دەپ باعالاندى.

ىرىسبەك سارسەنبايۇلى ءسوز سوڭىندا: «پرەزيدەنت ق.توقاەۆ، پارلامەنت ءماجىلىسىنىڭ توراعاسى ن.نىعماتۋلين قوعامنىڭ بۇل تالابىن جەدەلدەتىپ ورىنداسىن! مىنە، سوندا عانا بارلىق ازاماتتاردىڭ قۇقىعى تەڭەلەدى. مەملەكەتتىك بيلىكتى جەكەشەلەندىرىپ الىپ، اسا اۋىر قىلمىس جاساۋشىلاردىڭ جولى كەسىلەدى. زاڭ الدىندا بارلىق ادامداردىڭ بىردەي جاۋاپتىلىعى جانىندەگى تالاپ سوندا عانا ىسكە اسادى. ال ول ءوز كەزەگىندە ءار دەڭگەيدەگى «نازارباەۆتاردىڭ» استامشىلىعى مەن زاڭبۇزارلىعىن توقتاتۋعا سەپتەسەدى»، – دەگەن ءۋاجىن ءبىلدىردى.

بۇدان كەيىن كەزەگىمەن ءسوز العان جيىنعا قاتىسۋشىلار بۇگىنگى قازاقستان قوعامىندا التىنبەك سارسەنبايۇلى سىندى تۇلعالاردىڭ ورىنى ويسىراپ تۇرعانىن ايتا كەلىپ، قازىرگى بيلىكتىڭ قازاقستاننىڭ ساياسي تاريحىنداعى وسىعان ۇقساس ىستەردىڭ اق-قاراسىن ايىرىپ، شىن مانىسىندەگى ازاماتتاردىڭ قۇقىقتىق تەڭدىگىن جۇزەگە اسىرۋدى تالاپ ەتتى.

“The Qazaq Times”