Pfizer جانە BioNTech فارماتسەۆتيكالىق كومپانياسى جاساعان ۆاكتسينا بارلىق سىناقتان ءساتتى ءوتىپ، 90% دالدىك كورسەتكەن. ەكى كومپانيا وسىعان دەيىن ۆاكتسينانىڭ ادامعا تەرىس اسەرى بولماعانىن مالىمدەدى. قازىر Pfizer مەن BioNTech اقش بيلىگىنەن وسى ايدا ۆاكتسينانى توتەنشە جاعدايدا قولدانۋعا رۇقسات الماق.

مالىمەتتەر بويىنشا،عىلىمي زەرتتەۋ جۇمىسىنا الەمنىڭ 6 ەلىنەن 43 مىڭ 500 ەرىكتى قاتىسقان. ماماندار پرەپاراتتىڭ ءبىر دە ءبىر جاناما اسەر بەرمەگەنىن سەنىممەن ايتىپ وتىر. امەريكالىق Pfizer جانە ونىڭ گەرمانيالىق سەرىكتەسى BioNTech كومپانياسى بىرلەسىپ ازىرلەگەن ۆاكتسينانىڭ تيىمدىلىگى كلينيكالىق سىناقتا 90%-دان ارتىق وڭ ناتيجە كورسەتكەن.

زەرتتەۋ جۇمىستارىنا اقش، گەرمانيا، برازيليا، وڭتۇستىك افريكا، ارگەنتينا مەن تۇركيا ەلدەرىنەن شامامەن 43 مىڭنان استام ادام قاتىسقان. ەرىكتىلەرگە پرەپاراتتىڭ ەكى دوزاسى ەگىلگەن. شىلدە ايىندا باستالعان كلينيكالىق سىناق قورىتىندىسى بويىنشا ەكىنشى رەت ەگىلگەن ەكپەدەن كەيىن 7 كۇن وتىسىمەن ادام اعزاسىنداعى كوروناۆيرۋسقا قارسى قورعانىس 90 پروتسەنت بولدى. ءسويتىپ بۇل – جاپپاي سىناقتان ءساتتى وتكەن العاشقى ەكپە. ەندى Pfizer مەن BioNTech اقش بيلىگىنەن وسى ايدا ۆاكتسينانى توتەنشە جاعدايدا قولدانۋعا رۇقسات الماق.

Pfizer باسشىسى البەرت بۋرلا: «بۇگىن – ادامزات پەن عىلىم ءۇشىن ۇلى كۇن. قانشا حالىق، كاسىپكەرلەر مەن مەملەكەتتەر ءۇمىت ۇزبەي سەنىپ ارتتى. الەمدە ۆيرۋس جۇقتىرعاندار كوبەيىپ، اۋرۋحانالار تولۋ الدىندا تۇرعاندا، ەكونوميكا زارداپ شەگىپ جاتقان تۇستا ۆاكتسينا دايىنداۋ شەشۋشى ءسات بولىپ تۇر. ۆاكتسينانىڭ ءوندىرىسى باستالىپ كەتتى. جوسپار بويىنشا جىل سوڭىنا دەيىن 50 ملن دوزا، الداعى جىلى تاعى 1 ملرد 300 ملن دوزا وندىرىلەدى»، – دەيدى.

قازىر الەمدە ونداعان ۆاكتسينا سىناقتىڭ سوڭعى كەزەڭى – ءۇشىنشى فازاعا كەلدى. ال Pfizer ۆاكتسيناسى – قانداي دا ءبىر ناتيجە كورسەتكەن العاشقى ەكپە.

امەريكا مەن نەمىس كومپانياسى بىرلەسىپ جاساعان ۆاكتسينانىڭ تيىمدىلىگى حابارلانعاننان كەيىن الەم نارىعىندا مۇناي باعاسى وسە باستادى. سوڭعى مالىمەت بويىنشا قارا التىننىڭ Brent ماركاسى 8%-عا قىمباتتاپ، ءبىر باررەلى 42,5 دوللاردان اسىپ ءتۇستى.

"The Qazaq Times"