ميلليونداعان ادامعا رەسەي مەن قىتاي ەكپەسىن مەملەكەت قارجىسىنا سالعىزعان ءماميننىڭ مينكابينەتى ەل كوپتەن ۇزدىگە كۇتكەن، سۇرانىس جوعارى، حالىقارالىق قاۋىمداستىق بىرىڭعاي مويىنداعان Pfizer ۆاكتسيناسىن الەۋمەتتىك ءۇش توپقا كىرمەيتىن كوپشىلىك ءۇشىن اقىلى ەتۋدى قاراستىرىپ وتىر. 16 قاراشا 2021 جىل. فوتو: قر ۇكىمەت كەڭسەسى

قازاقستان ۇكىمەتى شەتەلدىك بىرنەشە ۆاكتسينانى تەگىن، بىراق ەل كوپتەن كۇتكەن، قوعام سۇرانىسى زور  Pfizer ەكپەسىن اقىلى ەتەتىن قۇجات قابىلداماق.

«قازاقستان اۋماعىندا كوروناۆيرۋستىق ينفەكتسيانىڭ تارالۋىنا جول بەرمەۋ جونىندەگى ۆاك (ۆەدومستۆوارالىق كوميسسيا – QT) تاپسىرماسىنا سايكەس، جۇرتتى ەرىكتى تۇردە اقىلى نەگىزدە ۆاكتسيناتسيالاۋ ءۇشىن Pfizer كومپانياسىنىڭ Comirnaty ۆاكتسيناسىن نارىقتا ساتۋ مۇمكىندىگى تۋرالى ۇكىمەت قاۋلىسىنىڭ جوباسى ازىرلەندى»، – دەدى دەنساۋلىق ساقتاۋ ءمينيسترى الەكسەي تسوي.

سەيسەنبىدەگى ءداستۇرلى ۇكىمەت وتىرىسىندا پرمەر-مينستر اسقار مامين الدىن الا ءسوز بايلاسقانداي كەيىپتە مينيستر الەكسەي تسويدىڭ  ۇسىنىسىن قۋانا قولدادى.

«ادامداردىڭ وزدەرىنىڭ تانداۋى بويىنشا قاجەت ۆاكتسينانى اقىلى تۇردە الۋ مۇمكىندىگى بولۋى ءۇشىن ۆاكتسينانى كوممەرتسيالىق نارىق سەگمەنتىنە جەتكىزۋ تۋرالى ۇسىنىستى قولدايمىن»، – دەدى ۇكىمەت باسشىسى.

ءماميننىڭ ايتۋىنشا، كوروناۆيرۋسقا قارسى ۆاكتسينا الاتىن حالىق ساناتى كەڭەيەدى. قازىر 7 وڭىردە سالىنىپ جاتىر. ولار – الماتى مەن شىمكەنت قالالارى، استانا جانە جامبىل، قىزىلوردا، قاراعاندى، تۇركىستان وبلىستارىندا باستالعان. ال ۆاكتسينانىڭ ەكىنشى پارتياسى 20 قاراشاعا دەيىن جەتكىزىلمەك.

ازىرگە كولەمى 4 ملن دوزا بولاتىن Pfizer ۆاكتسيناسى تەك جۇكتى، بالا ەمىزەتىن جانە كامەلەتكە تولماعاندارعا سالىنادى. دەنساۋلىق ساقتاۋ مينيسترلىگىنىڭ مالىمەتىنشە، 2 ملن ادامدى يممۋنداۋعا جەتكىلىكتى. ستاتيستيكاعا سايكەس، قازاقستاندا 12-18 جاس ارالىعىندا 1,7 ملن بالا بار، جىلىنا 400 مىڭ بالا دۇنيەگە كەلەدى. بيلىك ايشىقتاعان ساناتقا جاتپايتىن ازاماتتار ءۇشىن مينيستر تسوي Pfizer ۆاكتسيناسىمەن كوممەرتسيالىق يممۋنداۋ ماسەلەسى قاراستىرىلىپ جاتقانىن حابارلادى. دەگەنمەن بىرقاتار ساراپشىلار رەسەيلىك سپۋتنيك V ۆاكتسيناسى مەن وزگە دە قىتايلىق ەكپەلەر وسى ۋاقىتقا دەيىن ميلليونداعان ادامعا تەگىن سالىنعانىن ەسكەرسەك، بيلىكتىڭ بۇل قادامى قيسىنسىز، ادىلدىك پرينتسيپىنە قايشى دەگەن كوزقاراستا.

10 قاراشا كۇنى قازاقستانعا Pfizer كومپانياسىنان 379 080 دوزا ۆاكتسينا جەتكىزىلگەن.

22 قاراشادا ەلدە رەۆاكتسيناتسيا ناۋقانى باستالادى. وسى تۇستا ءۇشىنشى دوزا رەتىندە Pfizer ەكپەسىن الۋعا مۇمكىندىك بەرىلمەك. الايدا ءاۋ باستا 2 ملن ادامعا قوس دوزادان 4 ملن كومپونەنت مولشەرىندە جوسپارلانعان مىندەتتىڭ ازىرگە تولىق نۇسقاۋى بەكىتىلمەدى.

The Qazaq Times