فوتو: https://kaluga

الەمدە كوروناۆيرۋس جۇقتىرعاندار سانى 23 ميلليون ادامنان اسىپ، 805 مىڭعا جۋىق ادام قايتىس بولعان. ۆيرۋس دەرەگى تىركەلگەندەر سانى ارتىپ، لاتىن امەريكاسى، ەۋروپا، ازيانىڭ بىرقاتار ەلدەرىندە انتيرەكورد ورناعان.

وسى اپتادا دۇنيەجۇزىلىك دەنساۋلىق ساقتاۋ ۇيىمى (ددسۇ) 12 جاستان اسقان بالالار مەن ەرەسەكتەر مىندەتتى تۇردە ماسكا تاعۋى ءتيىس دەپ حابارلادى. سونىمەن قاتار حالىقارالىق ۇيىم وكىلدەرىنىڭ بولجاۋىنشا، پاندەميا ەكى جىلدا اياقتالادى. ددسۇ ساراپشىسى ماريا ۆان كەركحوۆە: «ينفەكتسيانىڭ جاس ەرەكشەلىگىنە بايلانىستى تارالۋىن انىقتايتىن زەرتتەۋلەر جۇرگىزىلدى. مىسالى، 5 پەن 10 جاسقا دەيىن جانە جەتكىنشەكتەر مەن ورتا جاستاعى ادامدار تەكسەرىلدى. بۇل جۇمىستار ءالى دە جالعاسىپ جاتىر. ناتيجەسىندە ۆيرۋس ادامداردىڭ جاس ەرەكشەلىگىنە بايلانىستى ءار ءتۇرلى تارالاتىن كورىنەدى»، – دەيدى.

گەرمانيا مەن يتاليادا ۆيرۋس دەرەگى ارتتى. ۆيرۋس جۇقتىرعانداردىڭ باسىم بولىگى گەرمانيانىڭ باتىسى مەن وڭتۇستىگىندە، بەرليندە تىركەلگەن. COVID-19 پاندەميا دەپ جاريالانعان ۋاقىتتان باستاپ كوروناۆيرۋسپەن 232 082 ادام اۋىرىپ، ودان 9267 ادام كوز جۇمعان. ال يتاليا دەنساۋلىق ساقتاۋ مينيسترلىگى سوڭعى تاۋلىكتە مۇندا كوروناۆيرۋس جۇقتىرۋدىڭ جاڭا 1071 وقيعاسى تىركەلگەنىن ايتتى.

ۋكراينانىڭ بۇرىنعى پرەمەر-ءمينيسترى يۋليا تيموشەنكونىڭ كوروناۆيرۋس جۇقتىرىپ، اۋىر حالدە اۋرۋحاناعا تۇسكەن. وپپوزيتسيالىق پارتيا جەتەكشىسىنەن بولەك، ىندەتتى ونىڭ قىزى مەن كۇيەۋ بالاسى دا جۇقتىرعان. ەلدە 105 مىڭ ادام ۆيرۋس جۇقتىرعان. كيەۆتە ءبىر كۇندە 307 جاڭا وقيعا تىركەلىپ، تاۋلىكتىك انتيرەكورد ورنادى.

وڭتۇستىك كورەيادا ناۋرىزبەن سالىستىرعاندا، اۋرۋدىڭ ەڭ جوعارى تاۋلىكتىك كورسەتكىشى تىركەلدى. سەۋلدەگى شىركەۋدە 800-دەن استام ادامنىڭ دەرتكە شالدىققانى ءمالىم بولدى. جەرگىلىكتى باسىلىمدار ەپيدەميانىڭ ەكىنشى تولقىنى كەلە جاتقانىن جانە ونىڭ سالدارى بىرىنشىگە قاراعاندا الدەقايدا اۋىر بولاتىنىن جازدى.

ءۇندىستاندا ءۇش ميلليوننان استام COVID-19 دەرەگى تىركەلدى. ساراپشىلاردىڭ پىكىرىنشە، ەلدە جاپپاي تەستىلەۋ جۇيەسىنىڭ ورناتىلماۋىنا بايلانىستى قاۋىپتى دەرتكە شالدىققاندار سانى كۇن ساناپ ارتىپ بارادى. دەليدەگى جانە باسقا دا ءىرى قالالارداعى ستاتيستيكا ازايعنمەن، ەلدىڭ شالعاي اۋداندارىندا جاڭا وشاقتار پايدا بولۋدا.

قازىرگى ۋاقىتتا لاتىن امەريكاسى ۆيرۋستىڭ وشاعىنا اينالعان. ءبىر عانا برازيليادا 4 ميلليونعا جۋىق دەرەك تىركەلسە، 115 مىڭ اجدام اجال قۇشقان. وسى رەتتە برازيلياداعى سان-پاۋلۋ ۋنيۆەرسيتەتى مەديتسينالىق مەكتەبىنىڭ جانە Omni-electronica ستارتاپىنىڭ زەرتتەۋشىلەرى جاڭا كوروناۆيرۋستىڭ ۇلگىلەرىن اۋادا جيناۋعا مۇمكىندىك بەرەتىن تەحنولوگيانى جاساپ شىعاردى. Spiri اتاۋىنا يە بولعان قۇرىلعى بۇرىن دا بار بولاتىن. ونى ستارتاپتىڭ نەگىزىن قالاعان ۋنيۆەرسيتەتتىڭ پوليتەحنيكالىق مەكتەبىنىڭ بۇرىنعى ستۋدەنتتەرى جاساعان. قۇرىلعىنىڭ اۋەلدەگى ماقساتى عيمارات ىشىندەگى اۋا ساپاسىن باعالاۋ بولاتىن. ەكى اي بويى زەرتتەۋشىلەر جەرگىلىكتى اۋرۋحانالاردىڭ ىشىندەگى اۋاعا ساراپتاما جۇرگىزگەن.

قازاقستاندا ەپيدەميا باستالعالى بارلىعى 104 718 ادامنىڭ كوروناۆيرۋس ينفەكتسياسىن جۇقتىرعانى انىقتالدى. اي باستالعالى COVID-19 كلينيكاسى بار 22 744 پنەۆمونيا، 258 ءولىم جاعدايى تىركەلدى. رەسمي ستاتيستيكاعا سەنسەك، وسى ۋاقىت ارالىعىندا اۋىرعانداردىڭ 4519-ى ايىققان.

وزبەكستاندا 40 مىڭعا جۋىق ادام دەرتكە شالدىقسا، قىرعىزستاندا تاۋلىك ىشىندە 134 ادامنان كوروناۆيرۋس انىقتالعان. ەلدە كوروناۆيرۋس باستالعاننان بەرى 1 مىڭ 56 ادام وسى قاۋىپتى دەرتتەن كوز جۇمعان.

"The Qazaq Times"