پاندەميا كەزىندەگى ءۇي كارانتينى: تاجىريبەلىك كەڭەستەر

كوروناۆيرۋس پاندەمياسى سوزدىك قورىمىزدا بۇرىن-سوڭدى ءجيى قولدانباعان سوزدەردى ەنگىزدى. سولاردىڭ ءبىرى – ءوزىن-ءوزى وقشاۋلاۋ ياعني ءۇي كارانتينى.

ءوزىن-ءوزى وقشاۋلاۋ دەگەندى قاراپايىم تىلمەن «ءوزىڭىزدى كۇندەلىكتى كۇيبەڭنەن سىزىپ تاستاۋ» دەۋگە بولادى. سەبەبى ءۇي كارانتينى كەزىندە ءسىز ۇيدە وتىراسىز، جۇمىسقا، وقۋعا جانە كەز كەلگەن قوعامدىق ورىندارعا بارمايسىز، قوعامدىق كولىك پەن تاكسيگە مىنبەيسىز. تەك ءتورت قابىرعاعا «تەلمىرىپ» تىرشىلىك ەتۋگە كوشەسىز.

كوروناۆيرۋس پاندەمياسى الەم ەلدەرىندە جوعارى قارقىنمەن تاراعاندىقتان، جەر-جەردە كارانتين تالاپتارى كۇشەيتىلىپ، توتەنشە جاعداي رەجيمى ەنگىزىلدى. ماسەلەن، ۇلىبريتانيادا 13 ناۋرىزدان باستاپ تۇماۋعا ۇقساس بەلگىلەرى بار ياعني تەمپەراتۋراسى 37,8 تسەلسيدەن جوعارى بارلىق تۇلعالارعا كەم دەگەندە جەتى كۇن ۇيدەن شىقپاۋ ۇسىنىلدى. شەتەلدەن ورالعان ازاماتتارعا بيلىك پەن دارىگەرلەر 14 كۇن بويىنا ءوزىن-ءوزى وقشاۋلاۋ كەرەكتىگىن ەسكەرتتى. اۋرۋ بەلگىلەرى انىقتالعان ناۋقاستار وزگە ادامداردان كەمىندە ەكى مەتر قاشىقتىق ساقتاۋ كۇندەلىكتى ءتارتىپ رەتىندە بەكىتىلدى.

كوروناۆيرۋستىڭ بەلگىلەرى:

• دەنە قىزۋىنىڭ كوتەرىلۋى
• تۇماۋ
• باس اۋرۋى
• جوتەل
• تاماق اۋرۋى
• السىزدىك
• ءىش ءوتۋ

*يممۋندىق جۇيەسى ءالسىز ءارى تومەن ادامدار دا ءجيى كەزدەسەدى، سابيلەر  مەن قارتتار دا سىرقاتقا ۇشىراۋى مۇمكىن. ينكۋباتسيالىق كەزەڭ – 2 كۇننەن 14 كۇنگە دەيىن.  ادەتتە ۆيرۋس جۇقتىرعاننان كەيىن بەس كۇن ىشىندە سيمپتومدار بىلىنە باستايدى.

دارىگەر ماماندار ءوزىن-ءوزى وقشاۋلاۋ كەزىندە ءبىر ۇيدە تۇراتىن ادامدارمەن فيزيكالىق بايلانىستاردى بارىنشا ازايتۋعا تىرىسۋ كەرەك دەيدى. اڭگىمەلەسۋ كەزىندە ەكى مەتر قاشىقتىق ساقتاپ، ورتاق مۇلىكتەردى پايدالانباۋ قاجەت. اسىرەسە، ۆيرۋس جۇقتىرۋ قاۋپى جوعارى ەگدە جاستاعى ادامادارمەن بايلانىستى ۋاقىتشا بولسىن ۇزگەن ابزال.

ءۇي كارانتينىنىڭ نەگىزگى ەرەجەسى – قولدى ءجيى سابىنمەن جۋ. سىرتتان كەلگەن جاعدايدا انتيسەپتيك قولدانىپ، ماسكا تاعۋ زاڭ. ۇيدەگى وتباسى مۇشەلەرىنە ورتاق سۇلگى، مايلىقتار جانە باسقا دا شارۋاشىلىق زاتتاردى پايدالانباعان ءجون.

"The Qazaq Times"