الەم بويىنشا كوروناۆيرۋس دەرتى قايتادان دەندەپ بارادى. Bloomberg مالىمەتىنشە، الەمدە 34 ميلليوننان استام كەيس تىركەلگەن. پاندەميانىڭ ەكىنشى تولقىنىنىڭ الدىن الۋ ماقساتىندا ەۋروپانىڭ بىرقاتار مەملەكەتتەرىندە قايتادان توتەنشە جاعداي ەنگىزىلە باستاعان.

سوڭعى مالىمەتتەر بويىنشا، بىرىككەن كورولدىكتە كۇن سايىن 7 مىڭنان استام ادام جۇقتىرۋدا. كورولدىك ۆيرۋستان قازا تاپقاندار بويىنشا دا ەۋروپادا الدىڭعى ورىندا. جالپى بۇل ەلدە ۆيرۋستى جۇقتىرعاندار سانى 450 مىڭنان اسقان. وسىعان بايلانىستى ەل پرەمەر-ءمينيسترى بوريس دجونسرن بريتاندىقتارعا ەسكەرتۋ جاسادى.

بوريس دجونسون: «ەلدە كوروناۆيرۋستان قايتىس بولعاندار سانىنىڭ ءوسۋى ءبىزدى قاتتى الاڭداتادى. سوندىقتان وسىنداي ماڭىزدى شارالاردى قابىلدادىق. ال ازاماتتار دەرتپەن كۇرەسۋگە باعىتتالعان بارلىق شەكتەۋلەردى ورىنداۋى ءتيىس. قازاننىڭ سوڭىنان باستاپ كۇن سايىن 500 مىڭ تەست الامىز»، – دەيدى.

چەحياداعى احۋال دا ءماز ەمەس. مۇندا العاش رەت 12 ناۋرىزدا توتەنشە جاعداي جاريالانىپ، ول 17 مامىرعا دەيىن سوزىلعان ەدى. بۇل مەملەكەت – قازىر ەۋروپا بويىنشا كوروناۆيرۋس جىلدام تاراپ جاتقان ەلدەردىڭ ءبىرى. سوندىقتان بيلىك اراعا 4 جارىم اي سالىپ، قايتادان قاتاڭ شارالار قابىلداۋعا ءماجبۇر. ياعني الداعى دۇيسەنبىدەن باستاپ مۇندا ءبىر ايعا توتەنشە جاعداي ەنگىزىلەدى. ەكونوميكالىق داعدارىستىڭ اللدىن الۋ ءۇشىن بيلىك بۇل ءتارتىپتىڭ كوكتەمگىدەن جەڭىلىرەك بولاتىنىن بىردەن ەسكەرتتى.

ەلدىڭ دەنساۋلىق ساقتاۋ ءمينيسترى رومان پريمۋلا: «توتەنشە جاعداي – قازىرگى ەپيدەميولوگيالىق احۋال كەزىندە تەز ارەكەت ەۋگە مۇمكىندىك بەرەتىن زاڭنامالىق قۇرال. ماسەلەن، ءبىز مەديتسينالىق فاكۋلتەتتە وقيتىن ستۋدەنتتەردى اۋرۋحانالارعا كومەككە تارتا الامىز. قازىرگى شەكتەۋ شارالارى كوكتەمگى توتەنشە جاعدايمەن سالىستىرعاندا جەڭىلىرەك بولماق. ماسەلەن، دۇكەندەر، تاماقتانۋ ورىندارى مەن شەكارالار جابىلمايدى. دەگەنمەن كەلەسى دۇيسەنبىدەن باستاپ جابىق ورىنداردا 10 ادامنان ارتىق جينالۋعا بولمايدى. ال دالادا 20-دان اسپاۋى ءتيىس»، – دەپ مالىمدەدى.

يسپانيا ۇكىمەتى كوروناۆيرۋستىق جاعدايدىڭ ناشارلاۋىنا بايلانىستى مادريدتە كارانتين جاريالادى. مۇندا سوڭعى ەكى اپتادا تىركەلگەن COVID-19 جاعدايلارىنىڭ ۇشتەن بىرىنەن كوبى مادريدكە تيەسىلى. مادريد تۇرعىندارى بەلگىلى سەبەپتەرمەن عانا، سونىڭ ىشىندە جۇمىس بابىمەن قالادان كەتە الادى. سونداي-اق مەيرامحانالار جۇمىس ۋاقىتىن قىسقارتىپ، قوعامدىق ورىنداردا التىدان كوپ ادامنىڭ جينالۋىنا تىيىم سالىنعان. يسپانيادا پاندەميا باستالعالى بەرى 749 مىڭ ادام ينفەكتسيانى جۇقتىرىپ، 31 مىڭنان استام ادام قايتىس بولدى.

"The Qazaq Times"