ماسكەۋدەگى كەلىسسوز. فوتو: BBC

رەسەي مەن تۇركيا باسشىلارى ماسكەۋدە باس قوسىپ، يدليبتەگى قاقتىعىس تۋرالى كەلىسسوز وتكىزدى. ەكى ەل باسشىلارى اراسىنداعى 5 ساعات 40 مينۋتقا سوزىلعان كەلىسسوزدەن كەيىن اتىستى توقتاتۋعا كەلىستى.

ۇزاق كەلىسسوز اراسىندا پۋتين پەن ەردوعان 3 ساعات ەركىن كەڭەسكەن.

ءسۇريا قاقتىعىسىنىڭ نەدەن پايدا بولعانىن جانە ورتا شىعىستا ورىس ۇشاقتارى نە ءۇشىن جۇرگەنىن كوزقاراقتى جۇرت بىلەدى. ال، يدليب دەپ اتالاتىن ءسۇريا توپىراعىنداعى اڭگىمە بارىنەن دە كۇردەلى. ۇيتكەنى، بۇل جەردە بوسقىندار دا، ماسكەۋ مەن داماسك تەرروريستەر دەپ سانايتىن وپپوزيتسيالىق توپتار دا، تۇركيا مەن يران قولداۋىنداعى قارۋلى توپتار دا بار. ءسۇريا عانا ەمەس بۇل اۋماق تۇركيا ءۇشىن دە ستراتەگيالىق باسىم سالماققا يە. ەگەر بۇل ايماقتا الەۋمەتتىك داعدارىس ورناسا ول ورتا شىعىس عانا ەمەس جاقىن ەۋروپا ەلدەرى ءۇشىن دە وڭاي شارۋا بولمايدى. بوسقىنداردىڭ جاڭا اعىمى بىرنەشە كۇن ىشىندە گرەكتەردى قانشالىقتى اۋرەگە سالعانى بەلگىلى.

سونىمەن، ماسكەۋ مەن انكارا كەلىسىمگە كەلدى، وتكەن تۇننەن باستاپ يدليب جەرىندەگى قاۋىپسىز ايماقتاردا وق اتۋ توقتاتىلدى. ەكى ەلدىڭ پرەزيدەنتتەرى دە بۇل كەلىسىم ايماقتاعى قاقتىعىستى تەجەپ، بەيبىت تۇرعىنداردىڭ ازابىن جەڭىلدەتەدى دەپ باعالاستى.

سولاي بولادى دەپ سەنەيىك، بىراق، سۇرياداعى ورىس پەن تۇرىك مۇددەسىن ورتاقتاستىرۋ وڭاي بولمايتىنى بەلگىلى. سەبەبى، ەكى ەلدە «ءسۇريا باتباعىنا» بەلشەسىنەن باتقان ەلدەر. سوعىس لاڭى ءالى ءورشىپ تۇرعان بۇل جەردە جەكە ورىس پەن تۇرىك مۇددەسى عانا ەمەس، سابان استىنان سۋ جۇگىرتىپ، وزدەرى بەيبىتسۇيگىش بولىپ تانىلعان تالاي ەلدىڭ مۇددەسى قوزداپ جاتىر.

“The Qazaq Times”