Mäskeudegi 7 sağattıq kelissöz: Süriyadağı orıs pen türik müddesi ortaqtastı ma?

Resey men Türkiya basşıları Mäskeude bas qosıp, Idlibtegi qaqtığıs turalı kelissöz ötkizdi. Eki el basşıları arasındağı 5 sağat 40 minutqa sozılğan kelissözden keyin atıstı toqtatuğa kelisti.

Wzaq kelissöz arasında Putin pen Erdoğan 3 sağat erkin keñesken.

Süriya qaqtığısınıñ neden payda bolğanın jäne Orta Şığısta orıs wşaqtarı ne üşin jürgenin közqaraqtı jwrt biledi. Al, Idlib dep atalatın Süriya topırağındağı äñgime bärinen de kürdeli. Üytkeni, bwl jerde bosqındar da, Mäskeu men Damask terrorister dep sanaytın oppoziciyalıq toptar da, Türkiya men Iran qoldauındağı qarulı toptar da bar. Süriya ğana emes bwl aumaq Türkiya üşin de strategiyalıq basım salmaqqa ie. Eger bwl aymaqta äleumettik dağdarıs ornasa ol Orta Şığıs ğana emes jaqın Europa elderi üşin de oñay şarua bolmaydı. Bosqındardıñ jaña ağımı birneşe kün işinde grekterdi qanşalıqtı äurege salğanı belgili.

Sonımen, Mäskeu men Ankara kelisimge keldi, ötken tünnen bastap Idlib jerindegi qauipsiz aymaqtarda oq atu toqtatıldı. Eki eldiñ prezidentteri de bwl kelisim aymaqtağı qaqtığıstı tejep, beybit twrğındardıñ azabın jeñildetedi dep bağalastı.

Solay boladı dep seneyik, biraq, Süriyadağı orıs pen türik müddesin ortaqtastıru oñay bolmaytını belgili. Sebebi, eki elde «Süriya batbağına» belşesinen batqan elder. Soğıs lañı äli örşip twrğan bwl jerde jeke orıs pen türik müddesi ğana emes, saban astınan su jügirtip, özderi beybitsüygiş bolıp tanılğan talay eldiñ müddesi qozdap jatır.

“The Qazaq Times”