بۇگىن ماسكەۋدە رەسەي مەن تۇركيا باسشىلارى باس قوسپاق. كەزدەسۋ تاقىرىبى كوپشىلىككە بەلگىلى – سۇرياداعى قاقتىعىس. وسىعان دەيىن كرەمل ءسۇريا ءىسى بويىنشا سوچي كەلىسىمىنەن اينىمايتىنىن، ءسۇريانىڭ تەرريتوريالىق تۇتاستىعى نەگىزىندە رەسمي بيلىكتى جاقتاپ، تەررورلىق توپتارعا قارسى كۇرەسەتىنىن ءبىلدىرىپ كەلدى. ال، تۇركيا پرەزيدەنتى رەسەيدى باشار اسادتى ءوز بەتىنشە قالدىرۋعا شاقىردى.

رەسەي دە، تۇركيادا تىكەلەي قارسىلاسۋعا بارعىسى جوق ەكەنى ولاردىڭ قادامدارىنان كورىنىپ تۇر. دەگەنمەن، جەمە-جەمگە كەلسە ماسكەۋ كوبىرەك تاباندى بولارى بەلگىلى، ۇيتكەنى رەسەي سوناۋ شام ماڭىنداعى سوعىسقا نە ءۇشىن قاتىسقانىن كوزقاراقتى جۇرت جاقسى بىلەدى. ماسكەۋ ءوز كەزەگىندە ءسۇريانىڭ لەگيتيمدى بيلىگىنىڭ سۇرانىسى بويىنشا ارەكەت ەتىپ جاتقانىن بىلدىرگەن. ولار ءسۇريا جەرىندە شەتەلدىك كۇشتەر حالىقارالىق قۇقىقتارعا قايشى جاعدايدا ءجۇر دەپ سانايدى.

يدليب جەرىندە ورىس پەن تۇرىك اسكەري تەحنيكالارى كەزدەسۋدەن بۇرىن دا ماسكەۋ انكارانى سوچي كەلىسىمىن اتقارماي كەلەدى دەپ ايىپتاپ ەدى. ورىس ۇشاقتارىنا ارقا سۇيەگەن ءسۇريا رەجيم كۇشتەرى 27 قاڭتاردا 33 تۇرىك جاۋىنگەرىن ولتىرگەن بولاتىن. بۇعان تۇركيا ارمياسىنىڭ قايتارما جاۋابى دا وڭاي بولعان جوق. ءسۇريانىڭ ۇكىمەت كۇشتەرىنە قاراستى بارلىق تەحنيكالارى تۇرىكتىڭ ۇشقىشسىز ۇشۋ قۇرىلعىلارىنىڭ نىساناسىنا اينالدى.

دەگەنمەن، كوپتەگەن ساراپشىلار يدليب قاقتىعىسىنىڭ بولۋى ەردوعاننىڭ سىرتقى ساياساتىنداعى قاتەلىك رەتىندە باعالايدى. ايتالىق، تۇركيا باسشىسى سىرتقى ساياساتتا ماسكەۋ مەن ۋاشينگتوننىڭ سالماعىن تەڭ ۇستاي الماي قالدى. ونىڭ ۇستىنە يدليب شايقاسىنان كەيىن ماسكەۋدىڭ سۇرياداعى سالماعى ارتا ءتۇستى.

 

“The Qazaq Times”