ترامپ شتابى New York Times باسىلىمىن سوتقا بەردى

دونالد ترامپتىڭ سايلاۋ الدى شتابى The New York Times گازەتىنىڭ رەداكتسياسىن «پرەزيدەنت تۋرالى جالعان اقپارات تاراتتى جانە جالا جاپتى» دەپ سوتقا بەردى. باسىلىمنىڭ اتقارۋشى رەداكتورى ماكس فرەنكەلدىڭ «رەسەي مەن ترامپتىڭ ۋاعدالاستىعى قالاي جۇزەگە استى» دەگەن ماقالاسى پرەزيدەنت شتابىنىڭ سوتقا جۇگىنۋىنە سەبەپ بولعان.

نيۋ-يورك شتاتىنىڭ جوعارعى سوتىنا بەرىلگەن سەگىز بەتتىك تالاپ ارىزدا ترامپ سايلاۋ شتابىنىڭ وكىلدەرى New York Times اقش پرەزيدەنتىنە «اسا الاۋىزدىق پەن دۇشپاندىق كوزقاراسى تانىتتى» دەپ جازىلعان. سونىمەن قاتار وتكەن جىلى قاراشادا وتكەن كونگرەستىڭ ارالىق سايلاۋ ناتيجەسىنە بۇرمالاۋعا تىرىستى دەلىنگەن.

نەگىزىنەن 1964 جىلى اقش-تىڭ جوعارعى سوتى ساياساتكەرلەر مەن جوعارى لاۋازىمدى شەنەۋنىكتەردىڭ تىلشىلەرگە ايىپ تاعۋ قۇقىعىن شەكتەۋ تۋرالى زاڭ قابىلداعان. وسىعان سايكەس، تالاپكەر سوت پروتسەسى باستالعانعا دەيىن بارلىق ناقتى دەرەكتەردى ۇسىنۋى ءتيىس.

2016 جىلى قاراشادا اقش-تا كەزەكتى پرەزيدەنتتىك سايلاۋ ءوتتى. ناتيجەسىندە، رەسپۋبليكالىق پارتيا ۇسىنعان كاسىپكەر، ساياساتكەر دونالد ترامپ جەڭىسكە جەتىپ، امەريكانىڭ 45-ءشى پرەزيدەنتى اتاندى. سول ۋاقىتتان بەرى اقش-تاعى سايلاۋعا رەسەي ارالاسىپ، دەرەكتەردى قولدى ەتتى دەگەن گيپوتەزا ايتىلىپ كەلەدى.

اقش-تاعى 58-ءشى پرەزيدەنتتىك سايلاۋعا كرەمل «قول سۇقتى» دەگەن تاقىرىپتا الەم باسىلىمدارى جارىسا جازعاننان كەيىن اقش بارلاۋ قىزمەتى ارنايى تەكسەرۋ جۇرگىزىپ، رەسەيدىڭ ارالاسۋىمەن جەرگىلىكتى پارتيانىڭ سەرۆەرى بۇزىلدى دەگەن قورىتىندى شىعاردى. بۇدان بولەك، تەكسەرۋ بارىسىندا جاريالانعان ارنايى قۇجاتتا ۆلاديمير پۋتين اقش سايلاۋىنا ارالاسۋ ءۇشىن كومپانيالارعا تىكەلەي تاپسىرما بەرگەندىگى دە جازىلعان. سودان بەرى رەسەي امەريكا قوعامىنداعى بىتىراڭقىلىقتى كوزدەپ، ەلدىڭ ىشكى ساياساتىن رەگرەسسكە ۇشىراتۋدى كوزدەيتىندىگى ايتىلىپ تا، جازىلىپ تا كەلەدى. سايلاۋ جونىندە ۋاشينگتون مەن كرەمل ارنايى كەلىسسوز جاساعان جوق دەگەن اق ءۇي باسشىسى دونالد ترامپ تا رەسەي كەز كەلگەن مەملەكەتكە قارسى «اگرەسسيالىق ساياسات» ۇستاناتىندىعىن ايتىپ، بىرنەشە مارتە سانكتسيالار ەنگىزگەن.

"The Qazaq Times"