![](https://qazaqtimes.com/kk/content/uploads/2021/09/CFN-800x480.png?token=d88c965487b338395df9406f25c7807e)
ازاماتتىق بەلسەندى ساناۆار زاكيروۆا جوعارعى سوتتان پرەمەر-مينيستر اسقار ءماميننىڭ رەسەيلىك سبەر كومپانيالار توبىنىڭ باسشىسىمەن قازاقستاننىڭ اقپاراتتىق جۇيەسىن رەسەيلىك پلاتفورماعا كوشىرۋ تۋرالى مەموراندۋمدى زاڭسىز دەپ تانۋدى سۇراپ، اكىمشىلىك شاعىم ءتۇسىردى. شاعىمدى استاناداعى قالالىق مامانداندىرىلعان اۋدانارالىق اكىمشىلىك سوتى قابىلداعان.
بۇگىن، 13 قىركۇيەكتە بەلسەندى Facebooك پاراقشاسىندا شاعىمى مەن جازباسىن جاريالادى.
«پرەمەر-مينيستر اسقار مامين مەن سبەر كومپانيالار توبىنىڭ جەتەكشىسى گەرمان گرەف قول قويعان قر تسيفرلىق ترانسفورماتسياسى بويىنشا جوبالاردى جۇزەگە اسىرۋ سالاسىندا ارىپتەستىك تۋرالى مەموراندۋم قازاقستان كونستيتۋتسياسىنا قايشى جانە قازاقستان ازاماتتارىنا قاۋىپ توندىرەدى دەپ سانايمىن» دەلىنگەن شاعىمدا.
«ازاماتتاردىڭ جەكە مالىمەتىمەن بايلانىستى كەز كەلگەن دۇنيە قازاقستاننان تىس شىقپاۋى ءتيىس. وزگە مەملەكەتتىڭ جەكە دەرەگىمدى وڭدەۋىنە قارسىمىن» دەگەن ۇستانىمداعى بەلسەندىگە QT رەداكتسياسىنىڭ ءتىلشىسى حابارلاسىپ كوردى.
– سبەر اكتسياسىنىڭ 51%-ىنا رەسەي بيلىگى يەلىك ەتەدى. ەلەكتروندى ۇكىمەتتىڭ 400 پلاتفورماسىن الىپ بوتەن ەلدىڭ قولىنا ۇستاتۋ وتە قاۋىپتى... مۇنى رەسەيدەن باسقا ەشكىم جاساي المايدى دەگەنگە سەنبەيمىن، 400 پلاتفورمانى ازىرلەگەن قازاقستاندىق ماماندار بىرىڭعاي ورتاق پلاتفورما جاساي الماۋى مۇمكىن ەمەس. بىلتىر بانكتىڭ تۇتىنۋشىلارىنىڭ دەرەكتەرى كولەڭكەلى نارىقتا ساتىلعانى جونىندە اقپارات تاراعاندىقتان، ولاردىڭ باسشىلىعى قانداي كەپىلدىك بەرسە دە سەنۋگە بولمايدى. ەگەر شەتەل ارالاساتىن بولسا نەلىكتەن تەك رەسەيگە تاپسىرىلدى، نەگە دامىعان باتىس ەلدەرى مەن اقش دەڭگەيىندە اشىق كونكۋرس جۇرگىزىلمەدى؟.. – دەدى ول.
ونىڭ پىكىرىنشە، مامين ۇكىمەتىنىڭ تاپ وسى شەشىمى – تاۋەلسىز قازاقستاننىڭ تسيفرلىق سۋۆەرەنيتەتىنە ۇلكەن قاتەر توندىرەدى. زاكيروۆا رەسەيلىك ءىرى كومپانيانىڭ پلاتفورمانى دايىنداپ بەرگەننەن كەيىن دە «تەحقولداۋ بارىسىندا قازاقستانعا قاتىستى بارلىق اقپاراتقا قول جەتكىزۋى ىقتيمال» دەپ كۇدىكتەنەدى.
«جارتى ميلليارد دوللار دەگەن وتە كوپ قاراجات، ونىڭ بەستەن ءبىر بولىگىنىڭ ءوزى جەتكىلىكتى. نارازىلىعىمىزدى تىڭدامايتىن ۇكىمەتكە زاڭدى قاداممەن ارەكەت ەتۋگە شەشىم قابىلدادىم. رەفەرەندۋم وتكىزۋىن تالاپ ەتەمىن. سوتتان ناتيجە بولماسا، قارسىلىق جالعاسا بەرەدى، ناقتى قادامداردى جوسپارلايمىن»، – دەيدى.
قىركۇيەك ايىنىڭ باسىندا قازاقستان-رەسەي باسشىلارىنىڭ قاتىسۋىمەن «ەستيتىن ۇكىمەت» (قازاقستان) رەسەيلىك سبەر كومپانيالار توبىمەن قازاقستاننىڭ تسيفرلىق ۇكىمەتىنە ارنالعان پلاتفورما قۇرۋ جونىندە مەموراندۋمعا قول قويعاننان كەيىن قوعامدا نارازىلىق كوڭىل-كۇي ارتقان. دەسە دە قازىرگى ۇكىمەت قۇرامى ءتۇرلى ادىسپەن «اماناتتاۋ» قادامىنىڭ دۇرىستىعىن جەتكىزۋگە تىرىسىپ، رايىنان قايتپاي وتىر. ءىت مامانداردىڭ ءبىر توبى «جابىق كابينەت جاعدايىندا قابىلدانعان شەشىمدى» سىنادى، ولار پلاتفورما دايىنداۋعا ۇمىتكەرلەردىڭ اشىق تاسىلمەن تاڭدالماۋىنا نارازى.
وتكەن اپتادا تسيفرلىق دامۋ، يننوۆاتسيا جانە اەروعارىش ونەركاسىبى ءمينيسترى باعدات مۋسين سبەر پلاتفورماسى ەل ءۇشىن «ەڭ قولايلى جۇيە» جانە «ۇقك تالاپتارىنا سايكەس كەلەد» دەپ مالىمدەگەن.ونىڭ ايتۋىنشا، جوباعا شاشامەن 500 ملن دوللار جۇمسالۋى مۇمكىن.