فوتوبايان: جالىنعا ورانعان جاسىل قۇرلىق

اۋستراليا ءورت قۇرساۋىندا قالدى. ورمان ءورتى ءبۇتىن ءبىر ماتەريكتى شارپىپ، 5.5 ميلليون گەكتاردان استام اۋماق ورتكە ورانعان. سوڭعى مالىمەتتەر بويىنشا، 500 ميلليوننان استام اڭ-قۇس قىرىلىپ قالعان. ونىڭ 8000-ى كوالا ايۋى. 1400-دەن استام ءۇي ءتىلسىز جاۋدىڭ شىرماۋىندا كەتسە، 10 ملن-نان استام ادام گازدان ۋلانعان. اۋا ساپاسى قاۋىپتى مەجەدەن 26 ەسەگە تومەندەپ كەتكەن. جالىنعان ورانعان جاسىل قۇرلىق جونىندە فوتوبايان ۇسىنعاندى ءجون كوردىك.

Deutche Welle مالىمەتىنشە، ءورت الدىمەن جاڭا وڭتۇستىك ۋەلس پەن كۆينسلەند شتاتىندا باستالىپ، ۆيكتوريا، وڭتۇستىك اۋستراليا مەن تاسمانياعا وتكەن.  سالدارىنان ماتەريكتەگى جان-جانۋارلاردىڭ ۇشتەن ءبىرى قىرىلىپ قالعان. سيدنەي ۋنيۆەرسيتەتىنىڭ ەكولوگتەرى كەلتىرگەن دەرەكتەرگە سۇيەنسەك، ورتەنىپ كەتكەن سۇتقورەكتىلەردىڭ، قۇستاردىڭ جالپى سانى جارتى ميللياردقا جەتەدى.

فوتو: REUTERS

ءدال قازىرگى ۋاقىتتا اۋستراليا حالقى تابيعي اپاتپەن كۇرەسۋگە قاۋقارسىز. حالىق قايىقپەن تەڭىز بەتىنە شىعىپ، كومەك كۇتۋدە. قۇتقارۋعا جىبەرىلگەن كەمەگە مىڭ ادام سىيادى. تاعى 3 مىڭ حالىق تەڭىز بەتىندە كومەك كۇتىپ قالعان. الداعى ۋاقىتتا تىكۇشاق جىبەرۋ قاراستىرىلعان.

وتقا ورانعان ءۇي. فوتو: ۆۆس

مەملەكەت استاناسى كانبەررادا اۋا لاستانۋىنىڭ يندەكسى شەكتى نورمادان 26 ەسە اسىپ كەتكەن. ورمان ءورتىنىڭ زاردابى تەك اۋسترالياعا عانا ەمەس، كورشىلەس ايماقتاعى ەلدەرگە دە زالال كەلتىرە باستادى: ءورت سالدارىنان جاڭا زەلاندياداعى مۇزدىقتار قوڭىر تۇسكە بويالعان.

فوتو: REUTERS

تابيعي اپات حرونيكاسىنا كوز جۇگىرتسەك، بۇعان دەيىن جاسىل قۇرلىقتا بىرنەشە مارتە ءورت بولعان. بىراق، جىل باسىنداعى ورتتەن كەلگەن زالال-زيان مولشەرى وتە كوپ. 2009 جىلعى ءورت سالدارىنان مۇندا 173 ادام قايتىس بولعان.

اۋسترالياداعى ورتتەن زارداپ شەككەن كوالا. فوتو: instagram.com/wildlifepla

بۇل كۇن ەل تاريحىندا «قارالى جەكسەنبى» اتالىپ كەتكەن. ەكولوگتار بيىل ادام شىعىنى ايتارلىقتاي از بولسا دا، ءورتتىڭ كۇشتى ەكەنىن ايتادى. وت جالىنى قاتتى بولعانى سونشا، تەز تاراپ، گەكتارلاردى ءاپ-ساتتە شارپىپ وتەدى.

فوتو: instagram.com/wildlifepla

مەملەكەتتە 2009 جىلدان بەرى قۇرعاقشىلىق. مەتەورولوگيا بيۋروسىنىڭ اقپاراتىنا سۇيەنسەك، 2019 جىلدىڭ جەلتوقسانى ەڭ قۇرعاق ماۋسىم رەتىندە تىركەلگەن. اۋا تەمپەراتۋراسى 40 گرادۋس تسەلسيدەن تۇسپەگەن.

فوتو: instagram.com/wildlifepla

بيىل ەستەرىڭىزدە بولسا، امازون ورماندارى ورتەنىپ، 7 ملن گەكتار جەردى قامتىعان ەدى. مەملەكەتتىڭ قورشاعان ورتا ءمينيسترى سيۋزان لەي ءورت سالدارىنان اۋستراليادا عانا مەكەندەيتىن كوالالاردىڭ ۇشتەن ءبىرى قىرىلىپ قالعانىن مالىمدەدى.

فوتو: REUTERS

اۋسترالياداعى جاعداي الەم نازارىندا. گرەتا تۋنبەرگ، لەوناردي دي كاپريو، ەۆا لونگوريا جانە تاعى دا باسقا تانىمال تۇلعالار Instagram جەلىسىندەگى پاراقشالارىندا قولداۋ سۇرادى. ءورتتىڭ قاشان سوندىرىلەتىنى ازىرگە بەلگىسىز.

فوتو: ۆۆس

فوتو: ارر

"The Qazaq Times"