قىتاي مەن اۋستراليا اراسىندا ديپلوماتيالىق شيەلەنىس تاعى دا تەرەڭدەي ءتۇستى. بۇل جولى داۋ قىتايلىق جويعىش ۇشاقتاردىڭ وڭتۇستىك قىتاي تەڭىزىندە اۋستراليانىڭ بارلاۋ ۇشاعىن ۇستاۋىنان شىقتى. تاراپتاردىڭ ءبىرى ايىپتاپ، ءبىرى جوققا شىعارعان وقيعا وتكەن ايدىڭ سوڭىندا بولان.

اۋستراليانىڭ جاڭا پرەمەر-ءمينيسترى ەنتوني البانيز قىتايلىق ۇشاقتاردىڭ ارەكەتىن اگرەسسيا دەپ ايىپتادى. ول  جاكارتاداعى ساپارى كەزىندە جاساعان مالىمدەمەسىندە بارلاۋ ۇشاعى حالىقارالىق قۇقىقتارعا ساي وڭتۇستىك قىتاي تەڭىزىندە بارلاۋ جۇرگىزگەنىن، قىتايلىق جويعىش ۇشاقتار ونى زاڭسىز ءارى اۋستراليالىق ەكيپاجدىڭ ومىرىنە قاۋىپ توندىرە وتىرىپ ۇستاعانىن ايتتى.

رەسمي بەيجىڭ ءالبانيزدىڭ مالىمدەمەسىنە قايتارعان جاۋابىندا تاعىلعان ايىپتى جوققا شىعاردى جانە «اۋستراليا اق پەن قارانى وزگەرتتىپ، قايتا-قايتا جالعان اقپاراتتار تاراتىپ، تەكە-تىرەس جاعداي ورناتۋعا تىرىستى» دەپ مالىمدەدى.

قىتاي قورعانىس مينيسترلىگى اتالمىش وقيعا تۋرالى 26 مامىردا مالىمدەمە جاساعان ەكەن. وندا اۆستراليالىق ر-8ا سۇڭگۋىر قايىقتارعا قارسى پاترۋلدىك ۇشاعى قىتايدىڭ سيشاۋ قالاسىنا جاقىن اۋە كەڭىستىگىندە بارلاۋ جۇرگىزىپ، ەسكەرتۋلەرگە قاراماستان سيشاۋ قالاسىنىڭ كەڭىستىگىنە جاقىنداعان. قىتاي حاا اۋە كۇشتەرىنە تيەسىلى ۇشاقتار وعان ەسكەرتۋ جاسادى جانە جاقىن اۋە كەڭىستىتەن شىعارۋعا ارەكەت ەتتى دەلىنگەن.

اۋستراليا بيلىگى بولسا بۇنى قىتاي اۋە كۇشتەرى J-16 ۇشاعىمەن شابۋىل قاۋپىن تۋعىزدى، اۋستراليالىق ۇشاق پەن ەكيپاجعا قاۋىپ ءتوندىردى دەپ ايىپتايدى. ەلدىڭ قورعانىس مينيسترلىگى جاساعان مالىمدەمەدە بارلاۋ ۇشاعىنىڭ قوزعالتقىشىن ءبۇلدىرۋ ماقساتىندا اليۋميني كەسەكتەرىن شاشتى دەگەن.

اۋستراليا مەن قىتايدىڭ بارلاۋشى جانە جويعىش ۇشاقتارىنىڭ كەزدەسىپ قالۋى ەكى ەل ورتاسىنداعى ديپلوماتيالىق قايشىلىقتىڭ بىردەن ءبىر سەبەبى ەمەس. ەكى ەل ءۇندى جانە تىنىق مۇحيت ايماعىنداعى اسكەري-ساياسي ىقپالدارىن كەڭەيتۋ بويىنشا جانە ساۋدا قارىم-قاتىناستارىندا بىرقاتار كەلىسپەۋشىلىكتەرگە يە.

The Qazaq Times