ANOM موبيلدىك باعدارلاماسى. فوتو: The Australian

اقش فەدەرالدىق بارلاۋ قىزمەتى (FBI) ANOM اتتى جاڭا موبيلدىك باعدارلاما ارقىلى ۇيىمداسقان جانە شەكارا اتتاعان قىلمىستىق توپتاردى تۇزاققا ءتۇسىرىپ، قىلمىسقا قاتىسى بار دەلىنگەن 800-دەن استام ادامدى تۇتقىنعا العان. اۋقىمدى وپەراتسيانى اۋستراليانىڭ قۇقىق قورعاۋ ورگاندارىمەن بىرلەسە وتىرىپ جۇرگىزگەن.

فەدەرالدىق بارلاۋ قىزمەتى جاڭا دان جاسالعان ANOM ۇيالى تەلەفون باعدارلاماسى قىلمىسكەرلەر اراسىندا تاراتۋ ارقىلى كونتراباندالىق، ەسىرتكى اتكەزشىلىگى، ادام ساۋداسى، ادام ءولتىرۋ جانە وزگە دە قىلمىستارمەن اينالىساتىن شەكارا اتتاعان ۇيىمداسقان قىلمىستىق توپ مۇشەلەرىن قۇرىققا تۇسىرگەن.

اۋستراليالىق ارىپتەستەرىمەن ىنىتماقتاسا جاسالعان وپەراتسيادا كونتراباندالىق توپتار مەن قىلمىستىق مافيا توپتارىن باستى نىساناعا العان. ناتيجەسىندە 8 توننا ۋلى شەگىمدىك، 250 اۆتومات قارۋى، قۇنى 48 ملن اقش دوللارى تۇرتىن ءتۇرلى ۆاليۋتاداعى اقشانى تاركىلەگەن. اۋستراليا پرەمەرى ارنايى وپەراتسيانىڭ ناتيجەسىن جوعارى باعالاي وتىرىپ، «حالىقارالىق ۇيىمداسقان توپتارعا قارسى ەڭ اۋىر سوققى جاسالعانىن» مالىمدەگەن.

ANOM باعدارلاماسى قىلمىستىق توپتاردى قالاي قۇرىققا ءتۇسىردى؟

بۇعان دەيىن FBI پايدالانعان جاسىرىن قوسىمشانىڭ ەكەۋى تالقاندالعان. قىلمىستىق توپ مۇشەلەرى ساقتىعىن كۇشەيتىپ، قاۋىپسىز ۇيالى تەلەفوندارعا مۇقتاج بولا باستاعان. FBI وسى جاعدايدى پايدالانا وتىرىپ، ANOM باعدارلاماسىن جاسىرىن دەلدالدار ارقىلى قىلمىستىق ءتوپتاردىڭ ەڭ ماڭىزدى دەگەن مۇشەلەرى اراسىنا تاراتقان. سول ارقىلى قاۋىپسىز دەلىنگەن پلاتفورماعا قىلمىستىق توپ جەتەكشىلەرىنىڭ سەنىمىن ارتتىرعان.

اۋستراليا پوليتسياسىنىڭ ايتۋىنشا، ادەتتەگى باعدارلامالار ارقىلى (Android, IOS) قوڭىراۋ سوعۋ نەمەسە ەلەكتروندى حات ساندىعىن پايدالانۋ، حابارلاما جىبەرۋ ارەكەتتەرى وڭاي اشىققا شىعىپ قالاتىندىقتان قىلمىستىق توپتاعىلار قاۋىپسىز باعدارلامانى ىزدەستىرەدى. ANOM باعدارلاماسى تەك وسى باعدارلامانى عانا قولداناتىندار اراسىنداعى حابار-بايلانىستى قامتاماسىز ەتەدى. بۇل قىلمىستىق توپ مۇشەلەرىنە «قاۋىپسىز» دەگەن سەنىم ۇيالاتادى. الايدا، باعدارلاما فەدەرالدىق بارلاۋ قىزمەتى جاعىنان باقىلانادى دا، حابار-بايلانىتاردىڭ بارلىق مالىمەتى جينالىپ وتىرادى. وسىلايشا شەكارا اتتاعان قىلمىستىق توپتار قولعا تۇسكەن.

“The Qazaq Times”