قىرعىزستان مەن تاجىكستان شەكاراداعى قاۋىپسىزدىك شارالارىن كۇشەيتۋ تۋرالى شەشىم قابىلدادى. سونداي-اق، تاراپتار تەرروريزممەن كۇرەس سالاسىنداعى ىنتىماقتاستىقتىڭ تيىمدىلىگىن ارتتىرۋ ماسەلەلەرىن تالقىلادى. بۇل تۋرالى قىرعىزستاننىڭ ۇلتتىق قاۋىپسىزدىك مەملەكەتتىك كوميتەتىنىڭ (ۇقك) ءباسپاسوز ورتالىعى تاراتقان مالىمدەمەدە ايتىلعان.

«كەزدەسۋدىڭ نەگىزگى تاقىرىبى ەكى رەسپۋبليكانىڭ شەكارالاس ايماقتارىنداعى قاۋىپسىزدىكتى قامتاماسىز ەتۋ بولدى. سونداي-اق، تەرروريزم مەن ەكسترەميزمگە قارسى كۇرەستە ۆەدومستۆوارالىق ىنتىماقتاستىقتىڭ تيىمدىلىگىن ارتتىرۋ ماسەلەلەرى تالقىلاندى. قىرعىز رەسپۋبليكاسى مەن تاجىكستان رەسپۋبليكاسىنىڭ مەملەكەتتىك شەكاراسىن دەليميتاتسيا جانە دەماركاتسيالاۋ جونىندەگى ۇكىمەتارالىق كوميسسيانىڭ جۇمىسى ناتيجەلى ءجۇرىپ جاتىر»، — دەلىنگەن حابارلامادا.

ءباسپاسوز ورتالىعىنىڭ حابارلاۋىنشا، يسفارا قالاسىندا وتكەن كەزدەسۋدە قاتىسۋشىلار «ەكى ەلدىڭ شەكاراسىنداعى قاۋىپسىزدىكتى قامتاماسىز ەتۋ، ءدىني ەكسترەميستىك جانە حالىقارالىق تەرروريستىك ۇيىمداردىڭ ديۆەرسيالىق قىزمەتىنە بىرلەسىپ قارسى تۇرۋ ءۇشىن ىنتىماقتاستىقتى نىعايتۋ قاجەتتىلىگى تۋرالى» كەلىسىمگە كەلگەن.

قىرعىزستان مەن تاجىكستان شەكاراسىنىڭ ۇزىندىعى شامامەن 970 كم. ونىڭ تەك 519 شاقىرىمى عانا بەكىتىلگەن. كسرو ىدىراعاننان كەيىن، جەرگىلىكتى تۇرعىندار مەن ەكى رەسپۋبليكانىڭ اسكەري قىزمەتكەرلەرى اراسىنداعىقاقتىعىستار ءجيى ورىن العان. شامامەن ءۇش جىل بۇرىن بىشكەك پەن دۋشانبە ورتاق شەكارا ۋچاسكەسىنىڭ دەماركاتسياسى مەن دەليميتاتسياسىن جانداندىرۋعا كەلىسكەن بولاتىن.

"The Qazaq Times"