Qırğızstan men Täjikstan şekaradağı qauipsizdik şaraların küşeytu turalı şeşim qabıldadı. Sonday-aq, taraptar terrorizmmen küres salasındağı ıntımaqtastıqtıñ tiimdiligin arttıru mäselelerin talqıladı. Bwl turalı Qırğızstannıñ Wlttıq qauipsizdik memlekettik komitetiniñ (WQK) baspasöz ortalığı taratqan mälimdemede aytılğan.

«Kezdesudiñ negizgi taqırıbı eki respublikanıñ şekaralas aymaqtarındağı qauipsizdikti qamtamasız etu boldı. Sonday-aq, terrorizm men ekstremizmge qarsı küreste vedomstvoaralıq ıntımaqtastıqtıñ tiimdiligin arttıru mäseleleri talqılandı. Qırğız Respublikası men Täjikstan Respublikasınıñ memlekettik şekarasın delimitaciya jäne demarkaciyalau jönindegi ükimetaralıq komissiyanıñ jwmısı nätijeli jürip jatır», — delingen habarlamada.

Baspasöz ortalığınıñ habarlauınşa, Isfara qalasında ötken kezdesude qatısuşılar «eki eldiñ şekarasındağı qauipsizdikti qamtamasız etu, dini ekstremistik jäne halıqaralıq terroristik wyımdardıñ diversiyalıq qızmetine birlesip qarsı twru üşin ıntımaqtastıqtı nığaytu qajettiligi turalı» kelisimge kelgen.

Qırğızstan men Täjikstan şekarasınıñ wzındığı şamamen 970 km. Onıñ tek 519 şaqırımı ğana bekitilgen. KSRO ıdırağannan keyin, jergilikti twrğındar men eki respublikanıñ äskeri qızmetkerleri arasındağıqaqtığıstar jii orın alğan. Şamamen üş jıl bwrın Bişkek pen Duşanbe ortaq şekara uçaskesiniñ demarkaciyası men delimitaciyasın jandandıruğa kelisken bolatın.

"The Qazaq Times"