ەكس-شەنەۋنىك ۇكىم جاريالانعان بويدا سوت زالىنان قاماۋعا الىندى.

استانا سوتى پارا الدى دەپ ايىپتالعان بۇرىنعى قارجى ۆيتسە-ءمينيسترى رۋسلان ەڭسەباەۆقا ۇكىم شىعارىلعانىن حابارلادى.

سۋديا باقىتجان ەسەنوۆ ايىپتالۋشى-شەنەۋنىك ەڭسەباەۆتىڭ بايبوسىنوۆ پەن بۇحاربايدان تسيفرلاندىرۋ جوبالارىن اقپاراتتىق سۇيەمەلدەۋ بويىنشا قىزمەت كورسەتۋدى ساتىپ الۋ كونكۋرسىندا «ال-فارابي Partners» جشس-ءنىڭ جەڭىپ شىعۋى ءۇشىن 1,2 ملن تەڭگە پارا العانىن انىقتادى. ەسكەندىروۆ (اقپارات جانە قوعامدىق كەلىسىم مينيسترلىگى اقپارات كوميتەتىنىڭ توراعا ورىنباسارى) بايبوسىنوۆ پەن بۇحاربايدان  قوسالقى مەردىگەرلىك جۇمىستاردى ورىنداۋعا «استانا قالاسىنىڭ تەلەارناسى» جشس مەن «ال-فارابي Partners» جشس-ءنىڭ اراسىندا كەلىسىم-شارتتار جاساسۋ بارىسىندا قۇجاتتارعا قول قويۋدى جەدەلتەتۋ مەن قامقورلىق جاساعانى ءۇشىن 2,3 ملن تەڭگە كولەمىندە پارا العان.

كۇدىكتىلەردىڭ كىناسى كۋاگەرلەردىڭ كۋالىگى جانە بانك شوتتارى ۇزىندىلەرىمەن دالەلدەنگەن.

ەڭسەباەۆ پەن ەسكەندىروۆ جەمقورلىق جاساعانى ءۇشىن، ال بايبوسىنوۆ پەن بۇحارباي ادامدار توبىنىڭ الدىن الا ءسوز بايلاسۋىمەن بىرنەشە رەت پارا بەرگەنى ءۇشىن كىنالى دەپ تانىلدى.

«پارا بەرگەندىگى ءۇشىن قىلمىستىق كودەكستىڭ 366-بابىنىڭ 2-بولىمىندە 3 جىلدان 7 جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان. سوت قىلمىستىق جازانى اۋىرلاتاتىن ءمان-جاي رەتىندە قابىلدانعان انتتىڭ بۇزىلۋىن تانىدى، سوندىقتان ەنسەباەۆ پەن ەسكەنديروۆكە 4 جىلعا باس بوستاندىعىنان ايىرۋ جازاسىن تاعايىنداۋدى ءادىل دەپ سانادى»، – دەلىنگەن ەسىل اۋدانىنىڭ №2 اۋداندىق سوتى شىعارعان شەشىمدە.

بايبوسىنوۆ پەن بۇحارباي زاڭدا كوزدەلگەن جازانىڭ ەڭ از مەرزىمى – جەتى جىلعا باس بوستاندىعىنان ايىرۋعا تاعايىندالدى.

كۇدىكتىدەن ايىپتالۋشى اينالعانى، تاعىلعان ايىبى راستالعاندار ۇكىم جاريالانعاننان كەيىن بىردەن قاماۋعا الىندى. ولاردىڭ بارلىعى ءومىر بويى مەملەكەتتىك قىزمەتتە قىزمەت اتقارۋ قۇقىعىنان ايىرىلدى.

قازاقستاندا ساياسي جانە مەملەكەتتىك قىزمەتكەرلەرى پاراقورلىق ايىبىمەن ءجيى ءىستى بولىپ جاتادى. بەلسەندىلەر مەن ساراپشىلار جەمقورلىقتىڭ ەلدەگى ەڭ جۋان ءام جۇيەلى №1 ماسەلەگە اينالعانىن كەيىنگى جيىرما جىلدا ۇزدىكسىز سىناپ-ايىپتاپ كەلەدى. دەگەنمەن حالىق سالىمىنان تۇزىلەتىن مەملەكەت قارجىسىن جىمقىرۋ-پارالاۋ ارەكەتى ءالى دە تىيىلا قويمادى. 2019 جىلعى 10 جەلتوقساندا قايتا تولىقتىرىلعان «قر مەملەكەتتىك قىزمەتى تۋرالى» زاڭعا سايكەس:

«ورتالىق مەملەكەتتىك ورگان باسشىلارىنىڭ ورىنباسارلارى – ءوزى جەتەكشىلىك ەتەتىن ۆەدومستۆونىڭ، دەربەس قۇرىلىمدىق بولىمشەنىڭ باسشىسى سىبايلاس جەمقورلىق قىلمىس جاساعان كەزدە وتستاۆكاعا بەرۋى كەرەك»

The Qazaq Times