بۇگىن، 7 قازاندا استاناداعى اپەللياتسيا سوتى «استانا LRT جوباسىنداعى اقشا جىمقىرۋ ءىسى» بويىنشا شىققان ۇكىمنىڭ كۇشىن جويىپ، پروكۋراتۋراعا قايتاردى. بۇل تۋرالى قازاقستاندىق باق وكىلدەرى حابارلادى.

ەلوردانىڭ قىلمىستىق ىستەر جونىندەگى سوت القاسىنىڭ شەشىمىن مالىمدەگەن سۋديا اباي كوكجالوۆ قىلمىستىق ىستەگى «ەلەۋلى زاڭسىزدىقتاردى جويۋ ءۇشىن جانە قىلمىستىق-پروتسەستىك نورمالاردىڭ بۇزىلۋىنا جول بەرمەس ءۇشىن» ءىستى پروكۋرورعا كەرى جىبەردى. دەگەنمەن سوتتالۋشىلار ءىستى قايتا قاراۋ بارىسىندا قاماۋدان شىعارىلمايدى.

اسا ءىرى جوبانىڭ قۇرىلىسى بارىسىندا 5,8 ملرد تەڭگە قارجىنى جىمقىرۋ ءىسى بويىنشا سوت پروتسەسى 2020 جىلعى 29 قازاندا باستالعان. بىرنەشە اي بۇرىن، 28 مامىردا استانا سوتى اتالعان ءىس بويىنشا ايىپتالعان جەتى كۇدىكتىگە ۇكىم شىعارعان. ەڭ اۋىر جازا – 10 جىل تۇرمە جازاسى. ولارعا «ۇيىمداسقان توپ قۇرۋ جانە وعان جەتەكشىلىك ەتۋ» جانە «وزىنە سەنىپ تاپسىرىلعان مۇلىكتى يەمدەنۋ جانە جۇمساۋ» باپتارى بويىنشا ايىپتار تاعىلعان ەدى. سوتتالعاندار تاعىلعان ايىپتاردى مويىنداماعان.

حالىق پەن ساراپشىلار اراسىندا «قازاقستانداعى جەمقورلىقتىڭ ءىرى سومۆولى» اتالىپ كەتكەن ءىس بويىنشا سوت پروتسەسى بىلتىر كۇزدە قارالا باستاعان ەدى. بيىل ءساۋىر ايىندا ءىس اياقتالۋعا جاقىن قالعاندا بىرقاتار جايتتاردى انىقتاۋ ءۇشىن قايتا سوزىلدى.

وسىعان دەيىن ءىستى تەرگەگەن جەمقورلىقپەن كۇرەس ءىس-قيمىل اگەنتتىگى «اقشا جىمقىرۋ سحەماسىن استانا اكىمىنىڭ بۇرىنعى ورىنباسارى قانات سۇلتانبەكوۆ، «استانا LRT» كومپانياسىنىڭ بۇرىنعى باسشىسى تالعات اردان ۇيىمداستىرعان» دەپ مالىمدەگەن ەدى. ولارعا حالىقارالىق ىزدەۋ جاريالانعان.

تەرگەۋ ورگاندارىنىڭ مالىمەتىنشە، شەنەۋنىكتەر كاسىپكەرلەرمەن بىرگە جوبا قۇنىن ادەيى قىمباتتاتىپ، جالعان كاسىپورىنداردىڭ كومەگىمەن ميلليارد تەڭگە جىمقىرۋعا تىرىسقان.

قازاقستانداعى العاشقى جەڭىل رەلستى ترانسپورت جۇيەسى استانانىڭ سول جاعالاۋىنان اۋەجاي جانە تەمىر جول ۆوكزالىنا دەيىن جولاۋشىلار تاسىمالداۋى ءتيىس بولعان. قۇرىلىس رەسمي تۇردە 2017 جىلى مامىر ايىندا باستالعان. ەلوردادا جۇرت جاقسى بىلەتىن «ساقالدى باعاندار» سول كەزدە پايدا بولعان. جوباعا سالىنعان اقشانى العان «استانا بانكى» 2018 جىلى ليتسەنزياسىنان ايىرىلدى. سالدارىنان كولىك جۇيەسى قۇرىلىسىنا بولىنگەن شامامەن 258 ملن دوللار بۇعاتتالعان.

توقاەۆ 2019 جىلى كۇزدە جوبانى اشىق سىناپ، «داۋلى جوبا» دەپ اتاعان. الايدا استانا بيلىگى كەيىنىرەك LRT قۇرىلىسىن جالعاستىرا بەرەتىنىن حابارلادى. جاڭارعان جوسپار بويىنشا، ستانتسيالار مەن جەراستى جاياۋ جۇرگىنشىلەر وتكەلى قىسقارادى. قازىر اكىم التاي كولگىنوۆ جوبانىڭ بويىنا قان جۇرگىزەتىن ينۆەستيتسيا-قارىز ىزدەۋمەن اينالىسىپ جاتقانىن ايتادى.

اقپارات قۇرالدارىنىڭ ءبىرى قازتاگ-تىڭ جازۋىنشا، «استانا LRT» جشس اتاۋى جەمقورلىق داۋىنان كەيىن City Transportation Systems (CTS) بولىپ وزگەرگەن.

The Qazaq Times