فوتو: https://7sunews.kz

قازاقستاندا ەكى جىلدا 66 ميلليارد تەڭگە جىمقىرىلعان. بۇل جونىندە قر باس پروكۋراتۋراسىنىڭ ءباسپاسوز قىزمەتى حابارلادى.

باس پروكۋراتۋرا القاسىنىڭ وتىرىسىندا مەملەكەتتىك باعدارلامالارعا بولىنگەن قارجى جىمقىرىلعان قىلمىستىق ىستەردى تەرگەۋدىڭ زاڭعا سايكەستىگى، تۇرعىنداردى ءدارى-دارمەكپەن قامتاماسىز ەتۋ ماسەلەلەرى تالقىلانعان. جيىندا ايتىلعان رەسمي مالىمەتتەرگە سۇيەنسەك، 2017 جىلدان بەرى قۇقىق قورعاۋ ورگاندارى تەرگەگەن 6 مىڭ (5940) قىلمىستىق ءىستىڭ فيگۋرانتتارى 66 ملرد تەڭگەنى قولدى قىلعان. سول قىلمىستىق ىستەردىڭ قازىرگە دەيىن 2 685-ءى سوتقا جىبەرىلگەن. پروكۋرورلاردىڭ ايتۋىنشا، ۇكىمەت دەنساۋلىق ساقتاۋ مينيسترلىگىندە جۇرگىزىلگەن تەكسەرىس كەزىندە انىقتالعان قۇقىق بۇزۋشىلىقتار بويىنشا ۇسىنىستى قاراعان. پروكۋراتۋرانىڭ اكتىلەرى بويىنشا 48 لاۋازىمدى تۇلعا جاۋاپقا تارتىلىپ، ۇشەۋى قىزمەتىنەن كەتكەن.

سونىمەن قاتار، جيىندا ءسوز سويلەگەن دەنساۋلىق ءمينيسترى ەلجان ءبىرتانوۆ احۋالدى جاقسارتۋ ءۇشىن قولدانىلاتىن شارالاردىڭ جول كارتاسىنا توقتالدى. وسى رەتتە مينيسترلىككە شەتەلدەردىڭ دەنساۋلىق ساقتاۋ جۇيەسىن تسيفرلاندىرۋ تاجىريبەسىن ۇيرەنۋ ۇسىنىلىپ، ءدارى-دارمەك باعاسىن بەلگىلەۋدى اشىق ەتۋ، سىبايلاس جەمقورلىققا جول بەرمەۋ قاجەتتىگى ايتىلدى.

"The Qazaq Times"