فوتو: https://tengrinews.kz

لوندوندا قازاقستان-بريتان ۇكىمەتارالىق كوميسسياسىنىڭ وتىرىسى ءوتىپ، تاراپتار بىرقاتار قۇجاتتارعا قول قويدى. سولاردىڭ ءبىرى – اقتاۋدا باتىس قازاقستاندى كوگىلدىر وتىنمەن ۇزدىكسىز قامتاماسىز ەتۋدى كوزدەيتىن داتا-ورتالىقتى دامىتۋعا ارنالعان تسيفرلىق كاسىپورىن سالۋ.

ۇكىمەتارالىق كوميسسيا وتىرىسىندا ساۋدا-ەكونوميكالىق، عىلىمي-تەحنيكالىق جانە مادەني ىنتىماقتاستىق جونىندە وتكىزىلگەن كەزەكتى التىنشى وتىرىستا قازاقستاننىڭ ازاماتتىق اۆياتسيا يندۋسترياسىن رەتتەۋدىڭ جاڭا مودەلىن قۇرۋ، دەنساۋلىق ساقتاۋ سالاسىنداعى مەملەكەتتىك جانە جەكە ارىپتەستىككە سەرپىن بەرۋ، «استانا» قارجى ورتالىعىندا كورپوراتيۆتىك باسقارۋدى دامىتۋ تالقىلاندى. ناتيجەسىندە، «Artex Construction» جشس مەن «Independent Power Corporation» ەنەرگەتيكالىق كومپانياسى اقتاۋدا جاڭا داتا-ورتالىقتى دامىتۋ بويىنشا تسيفرلىق بىرلەسكەن كاسىپورىن قۇرۋعا كەلىستى. جوبا باتىس قازاقستاندى كوگىلدىر وتىنمەن جانە جاڭارتىلاتىن ەنەرگيا كوزدەرىمەن ۇزدىكسىز قامتاماسىز ەتەتىن بولادى. بۇدان باسقا تاراپتار قۋاتى 250 مۆت ەكولوگيالىق تازا ەنەرگيا وندىرە الاتنن ەنەرگەتيكالىق كومپانيا قۇرۋعا ۋاعدالاسقان. ءوز كەزەگىندە ۇلىبريتانيانىڭ ساۋدا ساياساتى جونىندەگى مەملەكەتتىك ءمينيسترى كونور بەرنس: «قازاقستان – جىلدام دامىعان جانە ەكونوميكاسىن ارتاراپتاندىرىلعان مەملەكەت. ءبىزدىڭ ۇكىمەت ىسكەرلىك قارىم-قاتىناسقا مۇددەلى، جانە ينۆەستيتسيا سالۋ بويىنشا بارلىق قاجەتتى قولداۋ كورسەتۋگە دايىن»، – دەيدى.

ايتا كەتەيىك، بىرىككەن كورولدىك پەن قازاقستان وسىمەن التىنشى مارتە ۇكىمەتارالىق كوميسسيا وتىرىسىن وتكىزىپ وتىر. ۇلىبريتانيانىڭ ساۋدا ساياساتى جونىندەگى مەملەكەتتىك ءمينيسترى كونور بەرنس مەن قر سىرتقى ىستەر ءمينيسترىنىڭ ورىنباسارى رومان ۆاسيلەنكو اتالعان جيىننىڭ تەڭ توراعالارى رەتىندە سايلانعان. ءار جيىن بارىسىندا مۇناي-گاز، تاۋ-كەن ونەركاسىبى، دەنساۋلىق ساقتاۋ، ءبىلىم بەرۋ جانە قارجىلىق قىزمەت كورسەتۋ بويىنشا تالقىلاۋلار بولادى.

"The Qazaq Times"