فوتو: inbusiness.kz

قازاقستاننىڭ بۇرىنعى قورعانىس ءمينيسترى مۇرات بەكتانوۆ 2022 جىلعى قاڭتار قىرعىنى كەزىندە زاڭسىز بۇيرىق بەرىپ، اسكەري ستراتەگيالىق نىسانداردى قورعاۋسىز قالدىردى دەپ ايىپتالدى. بۇل تۋرالى ورتالىق ازيا جاڭالىقتار قىزمەتى جازدى.

بۇل اقپاراتتى ەلدىڭ باس پروكۋرورى بەرىك اسىلوۆ 5 قاڭتاردا ماجىلىستە قاڭتار قانتوگىسىنە قاتىستى سۇراقتارعا جاۋاپ بەرۋ كەزىندە ايتتى.

قاڭتار قانتوگىسى كەزىندە كەمىندە 238 ادام قازا بولعان. 19-ى - كۇشتىك قۇرىلىم وكىلى. مارقۇمداردىڭ ءتىزىمىن قۇراستىرعان قۇقىق قورعاۋشىلار مەن بەلسەندىلەردىڭ ايتۋىنشا، قازا بولعانداردىڭ باسىم بولىگى – قارۋى جوق ەشقانداي اگرەسسيا كورسەتپەگەن قاراپايىم ادامدار.

قازىر بەكتانوۆ تەرگەۋ اباقتىسىندا وتىر. وعان اسكەري جاعدايدا بيلىگىن اسىرا پايدالاندى دەگەن ايىپ تاعىلعان.

باس پروكۋرور 5 قاڭتار كۇنگى ماجىلىستەگى قاڭتار تىڭداۋى كەزىندە 238 ادامنىڭ 151-ءى – الماتىدا قازا بولعانىن ايتتى. ول 238 ادامنىڭ 142-ءسىن "توتەنشە جاعداي رەجيمىن بۇزعاندار" دەپ اتادى. مارقۇمداردىڭ 67-ىنە "جاپپاي تارتىپسىزدىك" بابى بويىنشا ايىپ تاعىلعان. 4 ادام "باسقا دا قىلمىس جاساۋ كەزىندە ولگەن".

"ەڭ كوپ ادام - 151 ادام الماتى قالاسىندا قازا بولعان. كوبى پرەزيدەنت رەزيدەنتسياسىنا شابۋىل كەزىندە [ولگەن]. وسىعان ۇقساس ادام ءولىمى قىزىلوردا، شىمكەنت جانە تارازدا بولدى" دەدى باس پروكۋرور.

اسىلوۆتىڭ ايتۋىنشا، قاڭتار وقيعاسى بويىنشا 5300 قىلمىستىق ءىس قوزعالعان. باسىم بولىگىن (ادام ءولىمى، ۇرلىق-قارلىق، قارۋ-جاراق ۇرلاۋ ت.ب) ءىىم تەرگەگەن. باس پروكۋراتۋرا جاپپاي تارتىپسىزدىك، تەرروريزم، ازاپتاۋعا قاتىستى 720 قىلمىستىق ءىستى تەرگەگەن. ونىڭ ايتۋىنشا، وسى ىستەر اياسىندا "تىيىم سالىنعان ەكسترەميستىك توپتىڭ 25 مۇشەسى", "ۇيىمداسقان قىلمىستىق توپتاردىڭ 42 مۇشەسى" ۇستالعان. ودان بولەك، "كۇدىكتىلەر اراسىندا دەسترۋكتيۆتى ءدىني اعىمنىڭ 8 جاقتاۋشىسى بار" دەدى اسىلوۆ.

ونىڭ ايتۋىنشا، جاپپاي تارتىپسىزدىك بويىنشا كۇدىككە ىلىنگەندەر اراسىندا رەسەي، وزبەكستان، قىرعىزستان، تاجىكستان ازاماتتارى بار.

ساراپشىلار كەمىندە 238 ادامنىڭ ءومىرىن قاڭتار قانتوگىسىنەن بەرى ءبىر جىل وتسە دە، قاڭتاردىڭ نەگىزگى سۇراقتارىنا جاۋاپ تابىلمادى دەپ سانايدى. قۇقىق قورعاۋشىلار ادام ءولىمى بويىنشا قىلمىستىق ىستەردىڭ باسىم بولىگى توقتاتىلعانىن، ازاپتاۋ شاعىمدارىنىڭ باسىم بولىگىنىڭ قارالماعانىن ايتادى. رەسمي استانا قاڭتاردى حالىقارالىق تەرگەۋ تۋرالى ۇسىنىستان باس تارتقان.