كورنەكى سۋرەت. https://tengrinews.kz

ۋكراينادا جاڭادان سايلانعان ۇكىمەت مەملەكەتتىك قىزمەتكەرلەر مەن ۆەدومستۆولار سانىن قىسقارتىپ، ءتورت مينيسترلىك جۇمىسىن توقتاتتى. مەملەكەت قۇرىلىمىنداعى اۋىس-ءتۇيىس «ەسكى ساياساتكەرلەر ەسكى جۇيەنى تاڭدايدى. سەبەبى، بۇل وزدەرىنىڭ ساياسي ومىرلەرىن ۇزارتۋعا مۇمكىندىك بەرەدى»، – دەپ ۋكراينالىقتارعا ساياساتتاعى جاڭاشىلدىقتى قولداۋعا ۇندەۋ جاساعان ۆلاديمير زەلەنسكيدىڭ باستاماسىمەن جۇزەگە اسىپ وتىر. ءبىر قىزىعى، ۋكراينا ۇكىمەتىنىڭ العاشقى جۇمىسى ەسكى كادرلاردان ارىلۋ مەن جاس بۋىندارعا مۇمكىندىك بەرۋدەن باستالعان. 

«ۋكراينفورم» مالىمەتىنشە، «اۋىلشارۋاشىلىق ساياسات مينيسترلىگى» ەكونوميكالىق دامۋ، ال ەكولوگيا مينيسترلىگى ەنەرگەتيكا مينيسترلىگىنە قوسىلعان. سونىمەن قاتار، جاڭادان قوعامدىق دامۋ مينيسترلىگىنىڭ جۇمىسى تانىستىرىلدى. ۆەدومسۆتو سانىن قىسقارتقان جاڭا ۇكىمەت الداعى اپتادا 450 دەپۋتاتتى 300-گە ازايتاتۋ تۋرالى شەشىمگە كەلدى. ولاردىڭ باسىم بولىگى «قارتتىق جاسىنا» جەتكەن شەنەۋنىكتەر.

نەگىزىنەن ۋكراينادا ۇكىمەت اۋىسقالى بەرى, مەملەكەتتىك قۇرىلىمدا ايتارلىقتاي جاڭالىقتار ورىن الا باستادى. قىزمەتىنە كىرىسكەلى، بيلىكتەگى جاسى ۇلكەن، سانى ساپاسىنان ارتىق شەندىلەرگە قاتىستى مالىمدەمە جاساعان ەل پرەزيدەنتى ۆلاديمير زەلەنسكي پارلامەنت دەپۋتتارىنىڭ سانىن قىسقارتۋ ماسەلەسىن كوتەرگەن بولاتىن. ارنايى وتىرىس كەزىندە ول قاۋىپسىزدىك قىزمەتى باسشىسى، قورعانىس ءمينيسترى جانە باس پروكۋرور وتستاۆكاعا كەتۋى ءتيىس دەگەن. سونىمەن قاتار، پرەزيدەنت ۇكىمەتتى تۇتاس وتستاۆكاعا كەتۋگە شاقىرىپ، جوعارعى رادانى تاراتاتىنىن مالىمدەگەن.

وتكەن اپتادا ەكس-پرەمەر ۆلاديمير گرويسماننىڭ مينيسترلەر كابينەتى وتستاۆكاعا كەتىپ، ورنىنا قازىرگى باسشىنىڭ «حالىق كەڭەسشىسى» فراكتسياسى ۇسىنعان الەكسەي گونچارۋك سايلانعان بولاتىن. مۇنىمەن قاتار، جاس مينيسترلەر سانى بۇرىنعىدان ارتتى. مالىمەتتەر بويىنشا، ۋكراينا كابينەتى مينيسترلىگىندەگى ورتاشا جاس – 35. جوعارى راداداعى ەڭ جاس دەپۋتاتتىڭ جاسى 23-تە. تاياۋدا عانا 28 جاستاعى ميحايل فەدوروۆ تسيفرلىق ترانسفورماتسيا ۆيتسە-ءمينيسترى لاۋازىمىنا تاعايىندالدى.

ۋكرايناداعى ساۋاتتى جاستارعا قولداۋ بويىنشا ماقساتتى تۇردە قولعا الىنعان جۇيەمەن تانىسا وتىرىپ، ءوزىمىزدىڭ قازاقستانداعى بيلىك جۇيەسى مەن ەسكى كادرلار ويعا ورالادى. قازىرگى ۋاقىتتا پارلامەنت سەناتىنىڭ ءبىر وزىندە 60-تان 79 جاسقا دەيىنگى 20 شاقتى الپىستان اسقان سەناتور-دەپۋتات بار. ال پارلامەنت ءماجىلىس پالاتاسىندا 61-دەن 82 جاس ارالىعىنداعى 32 دەپۋتات بار. پرەزيدەنت قاسىم-جومارت توقاەۆ 66 جاستا بولسا، ەلباسى نۇرسۇلتان نازارباەۆتىڭ جاسى – 79-دا. وسى تسيفرلاردى كوزى شالعان قاۋىم اراسىندا «قازاقستان قارتستانعا اينالىپ بارا ما؟» دەگەن ساۋال پايدا بولعان...

ايتا كەتەر جايت، 2 قىركۇيەكتە العاشقى جولداۋىن جاساعان مەملەكەت باسشىسى ق.توقاەۆ 2020 جىلى مەملەكەتتىك قىزمەتكەرلەر سانى قىسقارتىلاتىنا توقتالىپ ءوتتى. ياعني جولداۋدا 2024 جىلى مەملەكەتتىك قىزمەتكەرلەر جانە ۇلتتىق كومپانيا قىزمەتكەرلەرىنىڭ سانى 25%-عا قىسقارتىلاتىنى ءمالىم بولدى. پرەزيدەنتتىڭ ايتۋىنشا، جەرگىلىكتى بيلىك وكىلدەرى كوپ رەتتە حالىق بازىناسىنا سالعىرتتىق تانىتىپ، الەۋمەتتى ماسەلەلەردى شەشۋگە تىرىسپايدى. سول سەبەپتى «ساپاسىنان سانى كوپ قىزمەتكەرلەر» قىسقارتۋعا ۇشىراماق. بۇل دا ءبىر ناتيجەلى قادام بولار دەپ سەنەيىك.

"The Qazaq Times"