اتامباەۆقا مەملەكەتتىك توڭكەرىس جاساماق بولدى دەگەن ايىپ تاعىلدى

قىرعىزستاننىڭ ەكس-پرەزيدەنتى المازبەك اتامباەۆقا تاعى بىرنەشە ايىپتار تاعىلدى. ۇلتتىق قاۋىپسىزدىك كوميتەتىنىڭ باسشىسى وروزبەك وپۋمباەۆ بۇرىنعى پرەزيدەنت ونى ۇستاۋ وپەراتسياسى كەزىندە قورعانۋ ءۇشىن ادەيى جەرگىلىكتى تۇرعىنداردى پايدالاندى جانە مەملەكەتتىك توڭكەرىس جاساماق بولدى دەپ مالىمدەدى.

وپۋمباەۆ ارنايى وپەراتسيا كەزىندە اۋىر جاراقات سالدارىنان قازا بولعان ساربازعا اتامباەۆ رەزيدەنتسياسىنداعى مىلتىقتان وق اتىلعانىن ايتتى. «جاۋىنگەرگە اتامباەۆتىڭ ۇيىندە بولعان قارۋدان وق اتىلدى. ونىڭ ۇيىنەن كوپتەگەن قارۋلار، سونىڭ ىشىندە سۆد ۆينتوۆكاسى تابىلدى. وپەراتسيا كەزىندە ول التى رەت وق اتقانىن مويىندادى»، – دەيدى ۇقك باسشىسى.

وپۋمباەۆتىڭ ايتۋىنشا، كۇشتىك قۇرىلىم قىزمەتكەرلەرى اتامباەۆتى ۇستاۋ كەزىندە قارۋ قولدانۋعا قۇقىلى بولعان. «قۇقىق قورعاۋ ورگاندارىنىڭ قىزمەتكەرلەرى اتامباەۆتى ۇستاۋ كەزىندە ءوزىن-ءوزى قورعاۋ ماقساتىندا بۇرىنعى پرەزيدەنتتىڭ جاقتاستارىنا قارسى قارۋ قولدانا الادى. بىراق ولار بەيبىت تۇرعىندار زارداپ شەكپەۋ ءۇشىن مۇنداي ارەكەتكە بارعان جوق. ءبىزدىڭ جاۋىنگەرلەرىمىز بۇل تاپسىرمانى ورىندادى، بۇل باتىرلىق ءىس»، – دەدى ول.

باس پروكۋرور وتكۋربەك جامشيتوۆ: «بۇگىن اتامباەۆقا تارتىپسىزدىك ۇيىمداستىرۋ، زاڭسىز قارۋ اينالىمى، تەرگەۋگە كەدەرگى كەلتىرۋ، ادامداردى كەپىلگە الۋ، ادام ءولتىرۋ، ادام ولتىرۋگە تالپىنىس جاساۋ سياقتى جەتى قىلمىستىق ايىپ تاعىلدى»، – دەپ حابارلادى.

7 تامىزدا قىرعىزستاننىڭ ارنايى جاساعى اتامباەۆتىڭ قوي-تاشتاعى رەزيدەنتسياسىندا ەكس-پرەزيدەنتتى  ۇستاۋ بويىنشا ارنايى وپەراتسيا باستاعان. ول اتامباەۆتىڭ قوي-تاش اۋىلىنداعى ۇيىندە جۇرگىزىلگەن بولاتىن. وپەراتسيا كەزىندە تاراپتار ءبىر-بىرىنە رەزەڭكە وق اتىپ، سالدارىنان ارنايى جاساق وكىلى قازا تاپتى. 45 ادام اۋرۋحاناعا ءتۇستى. ءبىرىنشى وپەراتسيا ناتيجەسىز اياقتالعان سوڭ، 8 تامىز تۇستەن كەيىن ۇلتتىق قاۋىپسىزدىك كوميتەتىنىڭ ارنايى جاساعى ەكىنشى وپەرتسيانى باستاعان. كەيىننەن بۇرىنعى پرەزيدەنت قۇقىق قورعاۋ ورگنادارىنا ءوز ەركىمەن بەرىلدى.

27 ماۋسىمدا قىرعىزستان پارلامەنتى المازبەك اتامباەۆتى ەكس-پرەزيدەنت جانە تيىسپەۋشىلىك مارتەبەسىنەن ايىرعان. جوعارى كەڭەستە قۇرىلعان ارنايى كوميسسيا ەكس-پرەزيدەنت المازبەك اتامباەۆقا جەمقورلىققا جول بەردى، قىزمەتىن اسىرا پايدالاندى سىندى پۋنكتتەر بويىنشا بەس ايىپ تاعىلدى.

ايتا كەتەيىك، المازبەك اتامباەۆ 2011-2017 جىلدارى قىرعىزستان پرەزيدەنتى لاۋازىمىن اتقاردى. ول مەرزىمنەن كەيىن ءوز ەركىمەن قىزمەتتەن كەتكەن العاشقى باسشى.

"The Qazaq Times"