ازان شاقىرۋعا تيىم سالعان يزرايل ۇلكەن قارسىلىققا ۇشىرادى

يزرايل پارلامەنتى (كنەسسەت) ەل اۋماعىندا داۋىس زورايتقىشپەن ازان شاقىرۋعا تيىم سالۋ تۋرالى قاراردى بەكىتىپ، بىلتىر جىل سوڭىندا ماجىلىسكە ۇسىنعان. وزگە پارتيالاردىڭ قارسىلىعى ارقىلى بۇل زاڭ جوباسىن بەكىتۋ مەن داۋىسقا سالۋ كەيىنگە قالدىرىلعان. الايدا، جاقىندا كنەسسەتتە بۇل شەشىم اقىرى قابىلدانىپ، شۋىل تۋدىرادى، تىنىشتىقتى بۇزادى دەگەن جەلەۋلەرمەن يزرايل اۋماعىندا داۋىس زورايتقىشپەن ازان شاقىرۋعا تيىم سالدى. تۇركيا «اناتولى» اقپاراتتىق اگەنتتىگىنىڭ حابارىنا قاراعاندا، يوردانيا ۇكىمەتى بۇل ەكى ەل اراسىنداعى بەيبىتشىلىك كەلىسىمگە قايشى دەپ ايىپتاعان.

يوردانيا ۇكىمەتىنىڭ رەسمي مالىمدەمەشىسى مۇحاممەد ەل-مۋماني جاساعان مالىمدەمەدە، يزرايل پارلامەنتى قابىلداعان شەشىم، يزرايل مەن يوردانيا جانە وڭىردەگى وزگەدە مۇسىلمان ەلدەرىمەن جاساسقان «بەيبىتشىلىك كەلىسىمىنە» قايشى دەپ ايىپتالدى. يوردانيا-يزرايل اراسىندا 1994 جىلدىڭ 26 قازانىندا جاساسقان كەلىسىمنىڭ 7-ءشى باپ، 2-ءشى تارماعىندا: «يزرايل يەرۋساليمدەگى يسلامنىڭ كيەلى قۇندىلىقتارىن قورعاۋ اياسىنداعى يوردانيانىڭ ارنايى ءرولىن قۇرمەتتەۋ كەرەك»، – دەپ بەلگىلەنگەن. بۇل اتالعان كەلىسىمدە يەرۋساليمدەگى ءال-اكسا مەشىتى، سونداي-اق، وزگە دە يسلامدىق قۇندىلىقتاردى، كيەلى زاتتاردى، تاريحي مۇرالاردى قورعاۋ، يوردانيا اۋماعىنداعى يزرايل قورلارى مەن مۇرالارىن بۇلدىرمەۋ تۋرالى كەلىسىم انىق جازىلعان.

ءيزرايلدىڭ پالەستيناعا شاپقىنشىلىعى، الەمنىڭ كوزىن كولەگەيلەۋ ارقىلى دا، اشىق تا جۇرگىزىلگەنى انىق. كۇللى يسلام ەلدەرىنىڭ قارسىلىعىن تۋدىرعان شەشىم، ەندىگى جەردە تارتىس تۇيىندەرىنىڭ بىرىنە اينالاتىنى داۋسىز. يەرۋساليم قالاسىنىڭ تاريحي داۋى جاڭا عاسىردا جاڭا بەينەدە باس كوتەرىپ، ورتا شىعىستىڭ بۇلىگىنە سەبەپ بولىپ وتىر.

“The Qazaq Times”