فوتو: https://tengrinews.kz

قىرعىزستاننىڭ بۇرىنعى پرەزيدەنتى المازبەك اتامباەۆ قۇقىق قورعاۋ ورگاندارىنا ءوز ەركىمەن بەرىلدى. اسكەريلەر ونى قوي-تاشتاعى رەزيدەنتسياسىن قورشاۋعا العاننان كەيىن ۇستاعان. بۇل تۋرالى ەلدىڭ ىشكى ىستەر مينيسترلىگى حابارلادى.

قازىرگى ۋاقىتتا اتامباەۆتان بىشكەكتە ورنالاسقان ىشكى ىستەر مينيسترلىگىنىڭ تەرگەۋ قىزمەتىدە جاۋاپ الىپ جاتىر. بۇرىنعى پرەزيدەنتتىڭ جانىندا جاقتاستارى كۋندۋز جولدۋباەۆا مەن فاريد نيازوۆ بار.

7 تامىزدا قىرعىزستاننىڭ ارنايى جاساعى اتامباەۆتى ۇستاۋ بويىنشا ارنايى وپەراتسيا باستاعان. ول اتامباەۆتىڭ قوي-تاش اۋىلىنداعى ۇيىندە جۇرگىزىلگەن بولاتىن. وپەراتسيا كەزىندە تاراپتار ءبىر-بىرىنە رەزەڭكە وق اتىپ، سالدارىنان ارنايى جاساق وكىلى قازا تاپتى. 45 ادام اۋرۋحاناعا ءتۇستى. وسىدان كەيىن بۇرىنعى پرەزيدەنت وقيعاعا بايلانىستى مالىمدەمە جاسادى. ەكس-پرەزيدەنتتىڭ ۇندەۋى ءوز باقىلاۋىنداعى «اپرەل» تەلەارناسىندا كورسەتىلدى. رەسمي ۇندەۋدە اتامباەۆ اسكەريلەردى ءوز حالقىنا وق اتپاۋعا شاقىردى جانە اتىستان كىناسىز ادامداردىڭ زارداپ شەگۋىنە بايلانىستى وكىنىش ءبىلدىرىپ، قازىرگى بيلىكتىڭ قاتىگەزدىگى تاڭقالدىراتىنىن ايتتى. سونداي-اق ۇندەۋ بارىسىندا ءوزىن تۇتقىنداۋعا جول بەرمەي، امان الىپ قالعان ادامدارعا العىس ايتتى.

ءبىرىنشى وپەراتسيا ناتيجەسىز اياقتالعان سوڭ، 8 تامىز تۇستەن كەيىن ۇلتتىق قاۋىپسىزدىك كوميتەتىنىڭ ارنايى جاساعى ەكىنشى وپەرتسيانى باستاعان. قىرعىزستان دەنساۋلىق مينيسترلىگى ەكىنشى رەت ورىن العان جانجال كەزىندە بەس ادام جارالانعانىن حابارلادى. ونىڭ تورتەۋى - پوليتسەي.

27 ماۋسىمدا قىرعىزستان پارلامەنتى المازبەك اتامباەۆتى ەكس-پرەزيدەنت جانە تيىسپەۋشىلىك مارتەبەسىنەن ايىرعان. جوعارى كەڭەستە قۇرىلعان ارنايى كوميسسيا ەكس-پرەزيدەنت المازبەك اتامباەۆقا جەمقورلىققا جول بەردى، قىزمەتىن اسىرا پايدالاندى سىندى پۋنكتتەر بويىنشا بەس ايىپ تاعىپ وتىر. قىرعىزستان ىشكى ىستەر مينيسترلىگىنىڭ ترەگەۋ توبى جاۋاپ الۋ ماقساتىندا ءۇش رەت شاقىرعان. دەگەنمەن، ۇشەۋىنە دە بارۋدان باس تارتقان اتامباەۆ كونستيتۋتسيالىق پالاتاعا حات جولداعان.

ايتا كەتەيىك، المازبەك اتامباەۆ 2011-2017 جىلدارى قىرعىزستان پرەزيدەنتى لاۋازىمىن اتقاردى. ول مەرزىمنەن كەيىن ءوز ەركىمەن قىزمەتتەن كەتكەن العاشقى باسشى.

"The Qazaq Times"