رەسەي جاپونياعا قارسىلىق نوتاسىن جىبەردى

رەسەي سىرتقى ىستەر مينيسترلىگى جاپونيا ەلشىسى تويوحيسە كودزۋكيگە كۋريل ارالدارىندا ورىن العان جاعدايعا بايلانىستى قارسىلىق نوتاسىن تابىستادى. بۇل تۋرالى جاپونيالىق كيودو اگەنتتىگى حابارلادى.

رەسەي تارابىنىڭ ايتۋىنشا، كۋريلدىڭ وڭتگۇستىك ايماعىندا ۆيزاسىز رەجيمدى قولدانۋ ەرەجەلەرى بۇزىلعان. ماسكەۋ تاراتقان مالىمدەمەدە: «كۋريل ارالدارىنىڭ باسىم بولىگى ساحالين وبلىسى سانالاتىندىقتان، ءبىز جاپونيانىڭ وسى ۋاقىتقا دەيىنگى نارازىلىعىن قابىلدامايمىز. رەسەي باسشىلىعى وكىلدەرىنىڭ ساحالين وبلىسىنىڭ وسى اۋدانىنا بارۋىنا، سونداي-اق وندا ءتۇرلى ءىس-شارالار، ونىڭ ىشىندە الەۋمەتتىك-ەكونوميكالىق جانە قورعانىس باعىتىنداعى شارالاردى وتكىزۋگە ولىقتاي قۇقىلى. ال رەسمي توكيونىڭ تۇسىنىكتەمەسىن رەسەيدىڭ ىشكى ىستەرىنە ارالاسۋ دەپ بىلەمىز»، – دەلىنگەن.

2 تامىزدا كۋريل ارالدارىنا رەسەيلىك شەندىلەر باسقارۋ توبىمەن بارعاننان كەيىن، جاپونيا سىرتقى ىستەر مينيسترلىگى ماسكەۋگە نارازىلىق حاتىن جولداعان بولاتىن. بۇعان قاتىستى پىكىر بىلدىرگەن رەسەي پرەمەر-ءمينيسترى دميتري مەدۆەدەۆ: «جاپون حالقىنىڭ نارازىلىعى ءبىزدىڭ ەش الاڭداۋشىلىعىمىزدى تۋعىزبايدى. كۋريل ارالدارى رەسەي جەرىنە تيەسىلى. ارالدار ساحالين وبلىسىنا كىرەدى. سول سەبەپتى رەسەيلىكتەردىڭ ول جاققا بارۋعا تولىقتاي قۇقىعى بار»، – دەپ جاۋاپ بەردى. ال 5 تامىزدا رەسەي اسكەرلەرىنىڭ كۋريل ارالدارى ماڭىندا (كۋناشير) اسكەري وقۋ-جاتتىعۋ وتكىزگەنىنە بايلانىستى توكيو نارازىلىق حاتىن جولداعان. الايدا، رەسەي جاپونيانىڭ بۇل جولعى نارازىلىعىن دا «نەگىزسىز» دەپ تانىدى.

جاپونيا مەن رەسەي اراسىنداعى ىنتىماقتاستىق كەلىسىمگە 70 جىلدان بەرى قول قويىلماي كەلەدى. ياعني ەكى ەل ەكىنشى دۇنيەجۇزىلىك سوعىستان كەيىن ارنايى كەلىسىمشارت جاساسقان جوق. جاپونيا جانە رەسەي 1855 جىلدىڭ 7 اقپانىندا يتۋرۋپ جانە ۋرۋپ ارالدارىنىڭ اراسىنداعى شەكارانى انىقتايتىن ءبىرىنشى ورىس-جاپون كەلىسىمشارتىنا (سيمود تراكتاتى) قول قويدى. ەكىنشى دۇنيەجۇزىلىك سوعىس كەزەڭىنەن كەيىن تاراپتار رەسمي كەلىسىمشارتقا قول جەتكىزە الماي كەلەدى. جاپونيا پرەمەر-ءمينيسترى سيندزو ابە مەن رەسەي پرەزيدەنتى ۆلاديمير پۋتين وسى ماسەلەگە قاتىستى 2012 جىلدان بەرى بىرنەشە رەت كەزدەسۋ ۇيىمداستىرعان. بىراق، كەزدەسۋلەردىڭ ەشقايسىسى وڭ ناتيجە بەرگەن جوق.

"The Qazaq Times"