كۇندىز 9 جانە 10 سىنىپ وقۋشىلارى اراسىندا بولعان توبەلەس تۇنگە قاراي قازاق-ۇيعىر ەرەسەكتەرىنىڭ اراسىنداعى داۋعا ۇلاسقان. 27 قازان 2021 جىل. فوتو: الەۋمەتتىك جەلىدە تاراعان ۆيدەولاردان سكرينشوت

الماتى وبلىسىندا «ۇلتارالىق قاقتىعىس» رەتىندە سيپاتتالا باستاعان پەنجىمدەگى وقيعا تۋرالى بيلىك وكىلدەرى رەسمي تۇسىنىكتەمە بەردى.

پانفيلوۆ اۋدانىنىڭ اكىمى تالعات ومىراليەۆ سارسەنبى كۇنى پەنجىم اۋىلىندا بولعان وقيعانى «جاستار بۇزاقىلىعى» دەپ اتاعان. بەيسەنبى كۇندىز «مادەنيەت ۇيىندە» وتكەن جيىن بارىسىنان تىكەلەي ەفيردە اقپارات تاراتقان ازاتتىق راديوسىنىڭ مالىمەتىنە قاراعاندا، ونداعان بالانىڭ اراسىندا بولعان توبەلەستەن ءبىر بالا جاراقات العان.

«ول نەدەن شىقتى؟ روزىباكيەۆ اتىنداعى مەكتەپتە بالالار توبەلەسىپ قالىپ، ءبىر بالا اۋرۋحاناعا تۇسكەن. جاراقات العان، بالا امان-ەسەن. مەن بۇگىن كىرىپ شىقتىم. باس دارىگەردى كوردىك. اياق-قولى ساۋ، ءسوزى دۇرىس، تۇندە وپەراتسيا جاسادى. باسىنان جاراقاتتانعان. گەماتومانى الىپ تاستادى. بالانىڭ وزىمەن سويلەسكەن كەزدە «جاعدايىم جاقسى، ءبارى دۇرىس» دەدى. سول ءۇشىن تۇندە جاستار ۇلتتىق ماسەلەنى كوتەرىپ جينالعان. بۇل جەردە ۇلتتىق ماسەلەنىڭ ەش قاتىسى جوق. وبلىس اكىمىنىڭ تاپسىرماسىمەن شتاب قۇرىلدى» دەگەن اۋدان اكىمى ومىراليەۆ

ۇلتى قازاق دەپ ايتىلاتىن زارداپ شەككەن 16 جاستاعى جوعارى سىنىپ وقۋشىسى پانفيلوۆ اۋدانارالىق كوپسالالى اۋرۋحاناسىنا تۇسكەن. دارىگەرلەردىڭ ايتۋىنشا، اۋىر دارەجەلى اشىق باس سۇيەك-مي جاراقاتى دياگنوزى قويىلعان.

قازاننىڭ 27-ءسى ون مىڭنان اسا قازاق-ۇيعىر ارالاس تۇراتىن پەنجىم وكرۋگى ورتا مەكتەپتەرىنىڭ بىرىندە وقۋشىلار توبەلەسىپ، اياعى تارتىپسىزدىككە اينالعان. الەۋمەتتىك جەلىلەردە وقيعا قاتىسى بار دەگەن بىرنەشە ۆيدەو جاريالانعان. تۇندە 30 شاقتى ادام جينالىپ، كەي ءۇيدىڭ اينەگىن شاققان، كولىكتەردى بۇلدىرگەن. پوليتسيا تۇندە جاستاردى تاراتقانىن ايتادى. سونىمەن قوسا، «توپپەن جاسالعان بۇزاقىلىق» بابى بويىنشا قىلمىستىق ءىس قوزعالعان. قانشا ادامنىڭ ۇستالعانى بەلگىسىز.

قازاق-قىتاي شەكاراسىنىڭ تۇبىندە ورنالاسقان اۋىلدىڭ «ۇلكەندەرى» مەن جەرگىلىكتى بيلىگى «ەكى بالانىڭ شەكىسى ءۇشىن ءبۇتىن ەلدى بۇلىككە ۇشىراتۋ ورىنسىز» دەپ ەسەپتەيدى.

كوپشىلىك جيىندا سويلەگەن جەرگىلىكتى تۇرعىندار ۇلتارالىق قاقتىعىستىڭ ءۇشىنشى رەت قايتالانىپ وتىرعانىن ايتادى. كەيبىر تۇرعىندار قازاقتار «ۇنەمى تاياق جەپ، كەيىننەن كەشىرىم بەرۋگە» ادەتتەنگەنىن العا تارتتى. ۇيعىر ۇلتىنىڭ اتىنان بىرنەشە ازامات كەشىرىم سۇراپ، پىكىر ءبىلدىردى. جينالىستا ءسوز العان ايتىسكەر جانداربەك بۇلعاقوۆ «ەشكىم زاڭسىز قۋدالانباۋى كەرەك جانە شاڭىراققا قاراپ، قازاقتى سىيلاۋعا مىندەتتى» دەگەن تالاپ قويدى.

The Qazaq Times