ترامپ قازاقستانعا سانكتسيا ەنگىزۋدەن باس تارتتى

اقش پرەزيدەنتى دونالد ترامپ قازاقستانعا سانكتسيا ەنگىزۋدەن باس تارتتى، – دەپ حابارلايدى قر ەنەرگەتيكا مينيسترلىگى.

2018 جىلى شىلدەدە اقش ساۋدا مينيسترلىگى قازاقستاننىڭ ۋران يمپورتىنا ساۋدا شەكتەۋلەرىن ەنگىزۋ تۋرالى باستاما كوتەرگەن بولاتىن. تاياۋدا اق ءۇي باسشىسى بۇل شەشىمدى قولداۋدان باس تارتتى. قازىرگى ۋاقىتتا ەنەرگەتيكالىق ارىپتەستىك جونىندەگى بىرلەسكەن كوميسسيا شەڭبەرىندە يادرولىق قاۋىپسىزدىك، اتوم ونەركاسىبى، مۇناي جانە گاز، جاڭارتىلاتىن ەنەرگيا كوزدەرىن جانە ەلەكتر ەنەرگەتيكاسىن دامىتۋ سالاسىنداعى ىنتىماقتاستىق ماسەلەلەرى تالقىلانۋدا.

قر ەنەرگەتيكا مينيسترلىگى تاراتقان حابارلامادا: «قازاقستان اتوم ونەركاسىبىندەگى ەكى جاقتى ىنتىماقتاستىقتى دامىتۋعا جانە تاراتپاۋ رەجيمىن نىعايتۋعا زور ءمان بەرەدى. ەكى جاقتى كوميسسيالار، ءىس-شارالار مەن جەكە كەزدەسۋلەر شەڭبەرىندە ەنەرگەتيكا، سىرتقى ىستەر جانە ۇلتتىق ەكونوميكا مينيسترلىكتەرى قر ۇلتتىق مۇددەلەرىن قورعاۋ جانە ۋران يمپورتىنا سانكتسيالاردى قولدانۋدى بولدىرماۋ جونىندە جۇمىستار اتقاردى. قازاقستان رەسپۋبليكاسى ۋران وندىرىسىندە كوشباسشى مەملەكەت جانە بۇكىل الەم بويىنشا اقش-تى قوسا العاندا اەس-ءتىڭ ۇزدىكسىز جۇمىس ىستەۋ كەپىلدەرىنىڭ ءبىرى بولىپ تابىلادى. قازاقستاندا جەر استى ۇڭعىلما سىلتسىزدەندىرۋ ادىسىمەن ۋران ءوندىرۋ تەحنولوگياسى ماگاتە-مەن ەڭ ەكولوگيالىق جانە قاۋىپسىز ءتاسىل دەپ تانىلدى»، – دەلىنگەن.

2015 جىلى قازاقستاننان اقش-قا تابيعي ۋراننىڭ ەكسپورتى 1153,5 توننا، 2016 جىلى 1813 توننا بولعان. 2017 جىلى 948 تونناعا جەتىپ، بۇل ەكسپورت جالپى كولەمىنىڭ 4,1%-ىن كورسەتكەن (23 258 توننا). ال 2018 جىلى 399,8 توننا بولدى، بۇل ەكسپورت جالپى كولەمىنىڭ 1,95%-ى (20452 توننا).

"The Qazaq Times"